Ñayóꞌo káꞌa̱n xa̱ꞌa̱ to̱ꞌon ña ni̱ka̱ꞌa̱n Ndios xíꞌin ta̱Abram, ña kasa ndivi ra circuncisión
17
Ta ta̱Abram kómí ra ko̱mi̱ si̱ko̱ xa̱ꞌo̱n ko̱mi̱ kui̱ya̱,
ta tuku na̱ti̱vi Ndiosa no̱o̱ ra,
ta ni̱ka̱ꞌa̱n Ndios xíꞌin ra,
káchí ra saá:
―Yi̱ꞌi̱ kúu Ndios,
Ta̱a ta̱ Kómí Ndiꞌi Ndee̱,
ta yi̱ꞌi̱ kéꞌé i̱ ndiꞌi ñava̱ꞌa.
Ta xíni̱ ñóꞌó kandixa ún yi̱ꞌi̱,
ta vivíi ndii kutaku̱ ún no̱o̱ i̱.
2 Ta chindúꞌu̱ i̱ to̱ꞌon ña kindo̱o i̱ xíꞌin ún.
Taxi i̱ ña koo kua̱ꞌa̱ ní sa̱ꞌya ñani síkuá ún ―káchí Ndios.
3 Ta saá xi̱kuxítí ta̱Abram a̱nda̱ ni̱to̱nda̱a ta̱ꞌya̱ ra no̱o̱ ñoꞌo̱.
Ta ki̱xáꞌá Ndios káꞌa̱n ka̱ ra xíꞌin ra,
káchí ra saá:
4 Tata,
ñayóꞌo kúu to̱ꞌon ña kíndo̱o i̱ xíꞌin ún:
yóꞌó kuu ún yivá kua̱ꞌa̱ ní tiꞌvi ni̱vi na kuu kua̱ꞌa̱ ní ñoo,
5 ta o̱n kunaní ka̱ ún Abram.b
Ta vitin chinóo i̱ ki̱vi̱ ún kunaní ún Abraham,c
chi taxi i̱ ña kuu ún yivá kua̱ꞌa̱ ní ni̱vi na kutaku̱ ndiꞌi saá xiiña no̱o̱ ñoꞌo̱.
6 Taxi i̱ ña koo kua̱ꞌa̱ ní sa̱ꞌya ñani síkuá ún
ña kutaku̱ na ndiꞌi saá xiiña no̱o̱ ñoꞌo̱,
ta nduu na ñoo náꞌno,
ta ti̱xin ni̱vi yóꞌo nakuita nata̱a na kuu rey.
7 Vitin chíndúꞌu̱ i̱ to̱ꞌon ña ki̱ndo̱o i̱ xíꞌin yóꞌó,
ta xíꞌin ndiꞌi nasa̱ꞌya ñani síkuá ún na kutaku̱ kui̱ya̱ ña va̱xi,
ta nda̱ ñii ki̱vi̱ o̱n ndiꞌi xa̱ꞌa̱ to̱ꞌon yóꞌo.
Ta to̱ꞌon yóꞌo káchí ña
ndí yi̱ꞌi̱ kúu Ndios no̱o̱ yóꞌó
ta no̱o̱ ndiꞌi nasa̱ꞌya ñani síkuá ún ndiꞌi saá kui̱ya̱ ña va̱xi.
8 Ta ndiꞌi saá ñoꞌo̱ Canaán no̱o̱ táku̱ ún vitin,
taxi i̱ ña ndaꞌa̱ ún
xíꞌin ndaꞌa̱ nasa̱ꞌya ñani síkuá ún
ña kuu ña ñoꞌo̱ na ndiꞌi saá ki̱vi̱;
yi̱ꞌi̱ kuu i̱ Ndios no̱o̱ nasa̱ꞌya ñani síkuá ún ndiꞌi saá kui̱ya̱ ña va̱xi,
káchí Ndios xíꞌin ta̱Abraham.
9 Ta tuku ni̱ka̱ꞌa̱n ka̱ Ndios,
káchí ra saá xíꞌin ta̱Abraham:
―Ta yóꞌó xíꞌin ndiꞌi nasa̱ꞌya ñani síkuá ún na kaku kui̱ya̱ ña va̱xi,
xíni̱ ñóꞌó kasa ndivi ndó to̱ꞌon kíndo̱o i̱ xíꞌin ún.
10 Ñayóꞌo kuu ña sanáꞌa ndí ndixa yóo yuꞌú ndó xíꞌin to̱ꞌon ña kíndo̱o i̱ xíꞌin ndó:
Ndiꞌi nata̱a xíni̱ ñóꞌó kasa ndivi na costumbre ña na̱ní circuncisión.
11 Xíni̱ ñóꞌó ta̱ꞌnda̱ loꞌo ñii̱ si̱ni̱ ñate̱e ndiꞌi ta̱a,
ta ñayóꞌo kuu ñii seña ña sanáꞌa ndí ndixa yóo to̱ꞌon ña kíndo̱o i̱ xíꞌin ndó.
12-13 Ta nda̱ ki̱vi̱ vitin ta̱nda̱ ndiꞌi ki̱vi̱ ña va̱xi,
xíni̱ ñóꞌó ta̱ꞌnda̱ ndiꞌi ta̱válí sa̱ꞌya ndó ta̱ xa ni̱xi̱no̱ o̱na̱ ki̱vi̱ ka̱ku.
Ñii ki̱ꞌva saá kasa ndivi ndó xíꞌin ndiꞌi ta̱esclavo,d
án ta̱ ka̱ku veꞌe ndó kúu ra,
án ta̱ sa̱ta ndó inka̱ xiiña kúu ra.
Ña ta̱ꞌnda̱ ndó kuu ñii seña ña kindo̱o ña ko̱ñu ndó xa̱ꞌa̱ ña nakáꞌán ndó ndí yóo to̱ꞌon ña kíndo̱o i̱ xíꞌin ndó,
ta o̱n ndiꞌi xa̱ꞌa̱ to̱ꞌon yóꞌo nda̱ ñii ki̱vi̱.
14 Tá yóo ñii ta̱a,
tá o̱n vása ní‑taꞌnda̱ loꞌo ñii̱ si̱ni̱ ñate̱e ra,
ta saá xíni̱ ñóꞌó taxín ndó ra ña ná kee ra ko̱ꞌo̱n ra,
chi ta̱yóꞌo ni̱yaꞌa ndoso ra to̱ꞌon ña kíndo̱o i̱ xíꞌin ndó ―káchí Ndios.
15 Ta tuku ni̱ka̱ꞌa̱n Ndios xíꞌin ta̱Abraham:
Ta ñásíꞌí ún,
o̱n kunaní ka̱ ñá Sarai.
Ta vitin kunaní ñá Sara.e
16 Ta keꞌé i̱ ñava̱ꞌa xíꞌin ñá,
ta koo ñii ta̱a sa̱ꞌya ún xíꞌin ñá.
Ndixa keꞌé i̱ ñava̱ꞌa xíꞌin ñá.
Kuu ñá siꞌí kua̱ꞌa̱ ní ni̱vi na kutaku̱ ndiꞌi saá xiiña no̱o̱ ñoꞌo̱,
ta ti̱xin nasa̱ꞌya ñani síkuá ñá nakuita nata̱a na kuu rey,
káchí Ndios.
17 Ta xi̱kuxítí ta̱Abraham ta̱nda̱ ni̱to̱nda̱a ta̱ꞌya̱ ra no̱o̱ ñoꞌo̱,
ta ni̱xaku̱ si̱i̱ ní ra,
xáni ini ra saá:
“¿Án ndixa kuchiño koo sa̱ꞌya ñii ta̱a ta̱ xa kómí ñii ciento kui̱ya̱?
¿Án ndixa kuchiño koo sa̱ꞌya ñáSara ñá xa kómí ko̱mi̱ si̱ko̱ u̱xu̱ kui̱ya̱?”,
saá xáni ini ra.
18 Ta saá ni̱ka̱ꞌa̱n ra xíꞌin Ndios:
―Tata Ndios,
tá kuchiño ví,
ta yi̱ꞌi̱ kóni i̱ ña nakiꞌin ta̱Ismael ñava̱ꞌa káꞌa̱n ún xa̱ꞌa̱ ―káchí ta̱Abraham.
19 Ta nda̱kuii̱n Ndios:
―¡O̱n si̱ví saá!
Ndixa yi̱ꞌi̱ ni̱ka̱ꞌa̱n i̱ xíꞌin ún ndí kaku ñii ta̱loꞌo sa̱ꞌya ñáSara,
ta sakunaní ún ra Isaac.f
Xíꞌin ta̱yóꞌo ta xíꞌin ndiꞌi nasa̱ꞌya ñani síkuá ra kasa ndivi i̱ to̱ꞌon ña kíndo̱o i̱ xíꞌin ún,
ta to̱ꞌon yóꞌo koo ña ndiꞌi saá ki̱vi̱ ña va̱xi.
20 Ta ta̱Ismael,
xíni̱ so̱ꞌo i̱ ña ndúkú ún xa̱ꞌa̱ ra,
ta yi̱ꞌi̱ keꞌé i̱ ñava̱ꞌa xíꞌin ra.
Taxi i̱ ña koo kua̱ꞌa̱ ní sa̱ꞌya ra xíꞌin nasa̱ꞌya ñani síkuá ra.
Kuu ta̱Ismael yivá u̱xu̱ o̱vi̱ ta̱a nanáꞌno na kaꞌnda chiño,
ta taxi i̱ kua̱ꞌa̱ ní sa̱ꞌya ñani síkuá ra ña nduu na ñii ñoo káꞌno.
21 Ta saá ni,
to̱ꞌon ña kíndo̱o i̱ xíꞌin ún kúu ña kindo̱o i̱ xíꞌin ta̱Isaac,
ta̱ kuu sa̱ꞌya ñáSara xíꞌin ún ta kaku ra ti̱xin kui̱ya̱ vitin ―káchí Ndios.
22 Ta ndi̱ꞌi ni̱ka̱ꞌa̱n Ndios xíꞌin ta̱Abraham,
ta ke̱e Ndios kua̱ꞌa̱n ra.
23 Tá mií ki̱vi̱ yóꞌo ta̱Abraham xa̱ꞌnda ra loꞌo ñii̱ si̱ni̱ ñate̱e sa̱ꞌya ra ta̱Ismael,
ta ñii ki̱ꞌva saá ke̱ꞌé ra xíꞌin ndiꞌi nata̱a naesclavo na kísa chiño no̱o̱ ra,
án na ka̱ku veꞌe ra kúu na,
án nata̱a na sa̱ta ra inka̱ ñoo xíyo kúu na.
Ta saá ki̱sa ndivi ra costumbre circuncisión xíꞌin ndiꞌi nata̱a veꞌe ra,
nda̱tán yóo ña ni̱ka̱ꞌa̱n Ndios xíꞌin ra.
24 Ta kómí ta̱Abraham ko̱mi̱ si̱ko̱ xa̱ꞌo̱n ko̱mi̱ kui̱ya̱ ta xa̱ꞌnda xíꞌin mi̱i ra loꞌo ñii̱ si̱ni̱ ñate̱e ra.
25 Ta kómí ta̱Ismael u̱xu̱ u̱ni̱ kui̱ya̱ ta ni̱ta̱ꞌnda̱ ra.
26 Mi̱i ki̱vi̱ yóꞌo ni̱ta̱ꞌnda̱ ta̱Abraham xíꞌin sa̱ꞌya ra ta̱Ismael,
27 ta ñii ki̱ꞌva saá ndiꞌi nata̱a válí xíꞌin nata̱a náꞌno na táku̱ veꞌe ra,
ta kísa chiño na no̱o̱ ra,
án nata̱a na ka̱ku veꞌe ra kúu na,
án nata̱a na sa̱ta ra inka̱ ñoo xíyo kúu na,
ni̱ta̱ꞌnda̱ ndiꞌi na mi̱i ki̱vi̱ yóꞌo.