Ñayóꞌo káꞌa̱n xa̱ꞌa̱ ña ka̱ku sa̱ꞌya ta̱Abram xíꞌin ñáAgar
16
Ta ñáSarai ñásíꞌí ta̱Abram o̱n vása ki̱ví koo sa̱ꞌya ñá,
ta yóo ñii ñaꞌa̱ ñáesclava ñá kísa chiño no̱o̱ ñáSarai na̱ní ñá Agar;
ñáñoo Egipto kúu ñá.
2 Ta ñáSarai ni̱ka̱ꞌa̱n ñá xíꞌin ta̱Abram,
káchí ñá saá:
―Tata,
xíni̱ ún ndí Ndiosa o̱n vása táxi ra koo sa̱ꞌya i̱,
ta xáku ndáꞌví i̱ no̱o̱ ún ná to̱nda̱a ún ñaꞌa̱ ñá kísa chiño no̱o̱ i̱ ñáAgar,
ta saá kivi kaku sa̱ꞌya ñá ta ñapáꞌá kaku yóꞌo kuu ña sa̱ꞌya i̱ ―káchí ñáSarai.
Ta ta̱Abram ni̱xi̱yo yuꞌú ra xíꞌin ña ni̱ka̱ꞌa̱n ñáSarai xíꞌin ra.
3 Ta saá ñáSarai ta̱xi ñá ñáAgar ndaꞌa̱ ta̱Abram.
Ñayóꞌo ke̱ꞌé na ki̱vi̱ xa ni̱yaꞌa u̱xu̱ kui̱ya̱ táku̱ na no̱o̱ ñoꞌo̱ Canaán.
4 Ta saá ta̱Abram ni̱ki̱si̱n ra xíꞌin ñáAgar,
ta ni̱ke̱e sa̱ꞌya ñá,
ta ki̱vi̱ ku̱nda̱a̱ ini ñáyóꞌo ñóꞌo sa̱ꞌya ñá,
ta ki̱xáꞌá ñáAgar chíkaa̱ ni̱no̱ ini ñá xíni ñá ñáSarai.
5 Ta saá ñáSarai ni̱ka̱ꞌa̱n ñá xíꞌin ta̱Abram,
káchí ñá saá:
―Tata,
yóꞌó ndíso kua̱chi xa̱ꞌa̱ ña chíkaa̱ ni̱no̱ ini ñáAgar xíni ñá yi̱ꞌi̱.
Ta̱xi i̱ ñáyóꞌo ndaꞌa̱ ún,
ta vitin xa ku̱nda̱a̱ ini ñá ndí ñóꞌo sa̱ꞌya ñá,
ta saá chíkaa̱ ni̱no̱ ini ñá xíni ñá yi̱ꞌi̱.
Ta va̱ꞌa Ndios ná ka̱ꞌa̱n ra án yóꞌó án yi̱ꞌi̱ kómí kua̱chi xa̱ꞌa̱ ñayóꞌo ―káchí ñá.
6 Ta nda̱kuii̱n ta̱Abram,
káchí ra saá:
―ÑáAgar yóꞌo kúu ñáesclava mi̱i ún.
Ta va̱ꞌa keꞌé ún xíꞌin ñá nda̱tán káchí ini mi̱i ún ―káchí ra.
Ta ñáSarai ki̱xáꞌá ñá sáxo̱ꞌvi̱ ñá ñáAgar,
ta ni̱‑kundeé ka̱ ini ñáAgar ta ke̱e ñá xi̱no ñá kua̱ꞌa̱n ñá.
7 Ta ni̱xaa̱ ñá no̱o̱ yóo ñii pozo takuií ña nákaa̱ no̱o̱ ñoꞌo̱ yi̱chí,
ta pozo yóꞌo yóo ña no̱o̱ yáꞌa yichi̱ ña kua̱ꞌa̱n ñoo Shur.
Ta ñaángel ña xíka chiño no̱o̱ Ndios na̱kutáꞌan ña xíꞌin ñáyóꞌo,
8 ta ñaángel ni̱nda̱ka̱ to̱ꞌon ña ñáAgar,
káchí ña saá xíꞌin ñá:
―Nana Agar,
yóꞌó kúu ñá kísa chiño no̱o̱ ñáSarai.
¿Míchí ki̱xi yóꞌó,
ta míchí ko̱ꞌo̱n ún vitin?
―káchí ñaángel xíꞌin ñá.
Ta nda̱kuii̱n ñá,
káchí ñá saá:
―Yi̱ꞌi̱ kée i̱ xíno i̱ no̱o̱ ñáSarai ñákáꞌno no̱o̱ i̱ ―káchí ñáAgar.
9 Ta saá ñaángel ni̱ka̱ꞌa̱n ña,
káchí ña saá xíꞌin ñá:
―Vitin ndikó ún noꞌo̱ ún veꞌe ñaꞌa̱ ñá kísa chiño ún no̱o̱,
ta kasa ndivi ún ndiꞌi ña ka̱ꞌa̱n ñáyóꞌo xíꞌin ún ―káchí ñaángel.
10 Ta tuku ni̱ka̱ꞌa̱n ñaángel,
káchí ña saá:
―Ta to̱ꞌon yóꞌo káꞌa̱n Ndios xíꞌin ún:
Yi̱ꞌi̱ taxi i̱ ña koo kua̱ꞌa̱ ní sa̱ꞌya ñani síkuá ún,
ta nda̱ ñii ni̱vi o̱n kuchiño kaꞌvi na ndasaá kuu na.
11 Vitin ñóꞌo sa̱ꞌya ún ta kaku ñii ta̱loꞌo,
ta sakunaní ún ra Ismael,b
saá chi yi̱ꞌi̱ Ndios xi̱ni̱ so̱ꞌo i̱ ña xáku ní ún xa̱ꞌa̱ ña xóꞌvi̱ ún
ndúkú ún ña chindeé i̱ yóꞌó.
12 Sa̱ꞌya ún kuu ra ta̱a ta̱ ndeé ní kue̱ꞌe̱,
koo ra nda̱tán yóo ñii burro yukú;
kani táꞌan ra xíꞌin ndiꞌi ni̱vi,
ta ndiꞌi ni̱vi kani táꞌan na xíꞌin ra;
o̱n vása koo va̱ꞌa ra xíꞌin nda̱ ñii ñani ra,
káchí Ndios xíꞌin ún
―káchí ñaángel xíꞌin ñáAgar.
13 Xa̱ꞌa̱ ña ni̱ka̱ꞌa̱n Ndios to̱ꞌon yóꞌo xíꞌin ñáAgar,
ñáyóꞌo sa̱kunaní ñá Ndios:
“Yóꞌó kúu ún Ndios ta̱a ta̱ xíto”,
káchí ñá,
chi xa̱ni si̱ni̱ ñá:
“Xa xi̱to yó Ndios,
ta̱a ta̱ xíto no̱o̱ mi̱i yó”.
14 Ña̱kán pozo yóꞌo na̱ní ña Pozo Ndios,
ta̱a ta̱ táku̱ ta xíto ra yi̱ꞌi̱.
Ta nákaa̱ pozo yóꞌo yatin ñoo Cades xíꞌin ñoo Bered.