Ñayóꞌo káꞌa̱n xa̱ꞌa̱ Ndios ña chi̱ndúꞌu̱ ra ñii to̱ꞌon ña ki̱ndo̱o ra xíꞌin ta̱Abram
15
Ta ñii ki̱vi̱ Ndiosa xíꞌin ñii xa̱ni ni̱ka̱ꞌa̱n ra xíꞌin ta̱Abram,
káchí ra saá:
Abram,
o̱n kuyi̱ꞌví ún,
chi yi̱ꞌi̱ kúu ta̱a ta̱ kundaa yóꞌó.
Yi̱ꞌi̱ kúu ta̱ taxi ñava̱ꞌa ndaꞌa̱ ún,
káchí Ndios.
2-3 Ta ta̱Abram nda̱kuii̱n ra:
―Tata Ndios,
Ta̱a ta̱Káꞌno no̱o̱ i̱ kúu yóꞌó,
¿nda̱chun ví taxi ún ñava̱ꞌa káꞌno ndaꞌa̱ i̱ tá o̱n ko̱ó nda̱ ñii sa̱ꞌya i̱ kómí i̱?
Tá o̱n taxi ún ñii sa̱ꞌya i̱ ndaꞌa̱ i̱,
ta saá ñii ta̱ kísa chiño no̱o̱ i̱ na̱ní ra Eliezer,
ta̱ñoo Damasco kúu ra,
táná kivi̱ i̱ ta ta̱yóꞌo nakiꞌin ra ndiꞌi ñakuíká i̱ ―káchí ta̱Abram.
4 Ta Ndios nda̱kuii̱n ra saá,
káchí ra:
―¡O̱n si̱ví saá!
Ndixa ta̱a ta̱ nakiꞌin ñakuíká ún táná kivi̱ ún,
ta̱yóꞌo kuu sa̱ꞌya mi̱i ún,
ta o̱n sívi ta̱ kísa chiño no̱o̱ ún kuu ra ―káchí Ndios xíꞌin ra.
5 Ta saá ta̱Abram ke̱e ra ke̱ꞌe xíꞌin Ndios,
ta ni̱ka̱ꞌa̱n Ndios,
káchí ra saá:
―Koto ún ñoyívi síkón kaa̱.
Tá kuchiño ún,
kaꞌvi ún ndasaá kúu ki̱mi xíto ún kaa̱.
Ta ñii ki̱ꞌva saá koo kua̱ꞌa̱ ní sa̱ꞌya ñani síkuá ún ―káchí ra.
6 Ta ta̱Abram ka̱ndixa ra Ndios,
ta xa̱ꞌa̱ ñayóꞌo,
Ndios ni̱ka̱ꞌa̱n ra ndí ta̱Abram kúu ta̱a ta̱ndii ta̱ o̱n ko̱ó kua̱chi ndíso no̱o̱ ra.
7 Ta ni̱ka̱ꞌa̱n Ndios saá:
―Yi̱ꞌi̱ kúu Ndios.
Yi̱ꞌi̱ ta̱va i̱ yóꞌó ñoo Ur ña nákaa̱ no̱o̱ ñoꞌo̱ Caldea,
xa̱ꞌa̱ ña taxi i̱ ñoꞌo̱ yóꞌo ndaꞌa̱ ún,
xíꞌin ndaꞌa̱ nasa̱ꞌya ñani síkuá ún ―káchí Ndios.
8 Ta ta̱Abram nda̱kuii̱n ra,
káchí ra saá:
―Tata Ndios,
ta̱a ta̱káꞌno no̱o̱ i̱ kúu ún,
¿ndasaá kuchiño kunda̱a̱ ini i̱ ndí yi̱ꞌi̱ ndixa nakiꞌin i̱ ñoꞌo̱ yóꞌo?
―káchí ra.
9 Ta Ndios nda̱kuii̱n ra,
káchí ra saá:
―Ta xa̱ꞌa̱ ña kunakaa̱ ña kundaa ini ún ndí kasa ndivi i̱ to̱ꞌon ña ki̱ndo̱o i̱ xíꞌin ún,
ñayóꞌo xíni̱ ñóꞌó keꞌé ún.
Taxi ún ndaꞌa̱ i̱ ñii si̱ndi̱ki̱ siꞌí loꞌo,
xíꞌin ñii ti̱súꞌu̱ siꞌí,
xíꞌin ñii ndikachi chée,
tí u̱ni̱ kui̱ya̱ kúu ñii ñii rí,
ta taxi ún ñii sa̱ta xíꞌin ñii ndúlú ña kixi rí xíꞌin ún no̱o̱ i̱ ―káchí Ndios xíꞌin ra.
10 Ta ta̱Abram na̱ka̱xin ra ndiꞌi kiti̱ yóꞌo ta kua̱ꞌa̱n rí xíꞌin ra no̱o̱ Ndios,
ta ni̱xaa̱ ra ta xa̱ꞌni ra rí,
ta xa̱ꞌnda sava ra ñii ñii rí,
ta chi̱nóo ra ñii sava ñii ñii rí no̱o̱ ñoꞌo̱,
ta ña inka̱ sava ñii ñii rí chi̱nóo ra inka̱ táꞌví yatin.
Ta ma̱ꞌñó no̱o̱ ndóo o̱vi̱ saá ñayóꞌo,
ki̱ndo̱o ñii ñandíka̱ loꞌo ña na̱taꞌví ñaꞌá.
Saá xa̱ꞌnda ma̱ꞌñó ra ñii ñii kiti̱ náꞌno yóꞌo,
ta o̱n vása saá ní‑keꞌé ra xíꞌin tísa̱ta ni tíndúlú,
tíyóꞌo chi̱nóo níí ra ñii ñii rí,
ñii táꞌví chi̱nóo níí ra tísa̱ta,
ta inka̱ táꞌví chi̱nóo níí ra tíndúlú,
ndíko̱n rí ndóo rí xíꞌin tíkiti̱ náꞌno yóꞌo.
11 Ta kua̱ꞌa̱ títio̱ko chée án mbeꞌlo ndáchí rí káva rí va̱xi noo rí yatin no̱o̱ ndóo tí ni̱xiꞌi̱ yóꞌo,
ta ta̱Abram táxín ra ndiꞌi tíyóꞌo.
12 Ta ki̱xáꞌá kúnaa,
ta ndeé ní ka̱ni maꞌná ta̱Abram,
ta ni̱ki̱si̱n ra.
Ta xi̱ni ra ndeé ní kini naa no̱o̱ yóo ra,
ta ni̱yi̱ꞌví ní ra.
13 Ta Ndios ni̱ka̱ꞌa̱n ra,
káchí ra saá:
Xíni̱ ñóꞌó kunda̱a̱ ini ún ndí nasa̱ꞌya ñani síkuá ún kutaku̱ na inka̱ ñoo xíyo,
ta ko̱mi̱ ciento kui̱ya̱ xo̱ꞌvi̱ na ñoo yóꞌo.
Saá chi nduu na esclavo ña kasa chiño na no̱o̱ napatrón na,
ta o̱n vása kukomí na nda̱yí ña sandakoo na chiño yóꞌo.
14 Tá ndiꞌi yaꞌa ko̱mi̱ ciento kui̱ya̱,
ta yi̱ꞌi̱ Ndios saxo̱ꞌvi̱ i̱ ni̱vi na ñoo xíyo yóꞌo,
na kuu na saxo̱ꞌvi̱ nasa̱ꞌya ñani síkuá ún.
Ta saá taxi i̱ ña kee nasa̱ꞌya ñani síkuá ún ña ko̱ꞌo̱n ndíka̱ na xíꞌin kua̱ꞌa̱ ní ñakuíká ñoo xíyo yóꞌo.
15 Ta yóꞌó,
o̱n xo̱ꞌvi̱ ún nda̱tán xo̱ꞌvi̱ nasa̱ꞌya ñani síkuá ún,
ta va̱ꞌa kutaku̱ ún kua̱ꞌa̱ ní kui̱ya̱,
ta saá kivi̱ ún,
ta sandúxu̱n na yóꞌó.
16 Ta ko̱mi̱ ciento kui̱ya̱ xo̱ꞌvi̱ nasa̱ꞌya ñani síkuá ún,
chi naAmor na táku̱ no̱o̱ ñoꞌo̱ yóꞌo o̱n ta̱ꞌán xi̱no̱ sakutú na ña o̱n váꞌa keꞌé na no̱o̱ i̱,
a̱nda̱ to̱nda̱a na ña o̱n kundeé ka̱ ini i̱ xíꞌin na,
ta saá kixaa̱ ki̱vi̱ ña ndixaa̱ nasa̱ꞌya ñani síkuá ún no̱o̱ ñoꞌo̱ yóꞌo,
ta saxo̱ꞌvi̱ i̱ ni̱vi naAmor
ta taxín i̱ na ña kee na no̱o̱ ñoꞌo̱ yóꞌo,
káchí Ndios.
17 Ta ni̱ke̱tá ño̱ꞌo ta naa ní,
ta na̱ti̱vi ñii ña tá káa ki̱si ta no̱o̱ ña kána ñi̱ꞌma̱ no̱o̱ xíxi̱ ñoꞌo̱,
ta na̱ti̱vi inka̱ ñii ñakáni̱ síkón ta no̱o̱ ña yóo ñoꞌo̱ xíxi̱,
ta o̱vi̱ ñoꞌo̱ xíxi̱ yóꞌo yáꞌa ma̱ꞌñó ña no̱o̱ ki̱ndo̱o ndíka̱ na̱taꞌví kiti̱ tí ni̱xiꞌi̱ ndóo no̱o̱ ñoꞌo̱.
18 Tá mií ki̱vi̱ yóꞌo Ndios chi̱ndúꞌu̱ ra to̱ꞌon ña ki̱ndo̱o ra xíꞌin ta̱Abram,
káchí ra saá:
Ndaꞌa̱ nasa̱ꞌya ñani síkuá ún taxi i̱ ñoꞌo̱ yóꞌo ña kutaku̱ na,
ñoꞌo̱ ña yóo nda̱ yu̱ta no̱o̱ ñoꞌo̱ Egipto ta̱nda̱ yu̱ta káꞌno na̱ní ña Éufrates.
19 Ñoꞌo̱ yóꞌo kúu no̱o̱ táku̱ naCen xíꞌin naCenez xíꞌin naCadmon,
20 xíꞌin naHet xíꞌin naFerez xíꞌin naRefa,
21 xíꞌin naAmor xíꞌin naCanaán xíꞌin naGerges xíꞌin naJebus,
káchí Ndios xíꞌin ta̱Abram.