Ñayóꞌo káꞌa̱n xa̱ꞌa̱ ndasaá ni̱ka̱ku ta̱Lot, ke̱ꞌé ta̱Abram xíꞌin ra
14
Ta kui̱ya̱ yóꞌo ta̱Amrafel xi̱kuu ra ta̱rey ñoo Sinar;
ta ta̱Arioc xi̱kuu ra ta̱rey ñoo Elasar;
ta ta̱Quedorlaomer xi̱kuu ra ta̱rey ñoo Elam;
ta ta̱Tidal xi̱kuu ra ta̱rey ñoo Goim.
2 Ta ki̱xáꞌá ñii kua̱chi káꞌno ta káni táꞌan ko̱mi̱ narey yóꞌo xíꞌin inka̱ narey na xi̱kuu ta̱Bera ta̱ xi̱kuu ta̱rey ñoo Sodoma,
xíꞌin ta̱Birsa ta̱ xi̱kuu ta̱rey ñoo Gomorra,
xíꞌin ta̱Sinab ta̱ xi̱kuu ta̱rey ñoo Adma,
xíꞌin ta̱Semeber ta̱ xi̱kuu ta̱rey ñoo Zeboim,
xíꞌin ta̱rey ñoo Bela.
Ta ñoo Bela xi̱komí ña inka̱ ki̱vi̱ ña,
xi̱naní ña Zoar.
3-4 Saá chi xa u̱xu̱ o̱vi̱ kui̱ya̱ xáꞌnda chiño ta̱rey Quedorlaomer no̱o̱ o̱ꞌo̱n narey yóꞌo,
ta ni̱to̱nda̱a kui̱ya̱ u̱xu̱ u̱ni̱,
ta o̱ꞌo̱n saá narey yóꞌo ni̱‑xiin ka̱ na kaꞌnda chiño ta̱rey Quedorlaomer no̱o̱ na,
ta chi̱kaa̱ ini na kani táꞌan na xíꞌin ra.
Ta saá na̱koo yuꞌú o̱ꞌo̱n narey yóꞌo,
ta na̱kaya na natropa ña nakutáꞌan na ñii yoso̱ na̱ní ña Sidim,
no̱o̱ yóo Mi̱ni Yo̱ꞌva̱.
5 Ta ni̱to̱nda̱a inka̱ kui̱ya̱,
kui̱ya̱ u̱xu̱ ko̱mi̱,
ta ta̱Quedorlaomer xíꞌin narey táꞌan ra ke̱e na kua̱ꞌa̱n na kani táꞌan na,
ta ku̱ndeé nayóꞌo no̱o̱ naRefa ñoo Astarot Karnaim;
ta ku̱ndeé na no̱o̱ naZuz ñoo Ham;
ta ku̱ndeé na no̱o̱ naEm ñoo Save‑quiriataim,
6 ta ku̱ndeé na no̱o̱ naHor yuku̱ Seir,
ta ku̱chiño na ta̱xín ñaꞌá na a̱nda̱ yoso̱ na̱ní Parán,
ña yóo yatin no̱o̱ ñoꞌo̱ yi̱chí.
7 Ta ndi̱kó ta̱Quedorlaomer kua̱ꞌa̱n ra xíꞌin natáꞌan ra,
ta ki̱xaa̱ na ñoo En‑mispat,
ta yóo inka̱ ki̱vi̱ ñoo yóꞌo na̱ní ña Cades.
Ta ku̱ndeé na no̱o̱ ndiꞌi naAmalec ta sa̱ndiꞌi na xa̱ꞌa̱ ndiꞌi ña ni̱xi̱yo no̱o̱ ñoꞌo̱ no̱o̱ xi̱taku̱ na,
ta ku̱ndeé na no̱o̱ ndiꞌi naAmor na xi̱taku̱ ñoo Hazezontamar.
8 Ta saá o̱ꞌo̱n narey na xáꞌnda chiño no̱o̱ ñii ñii ñoo mi̱i na,
ña kúu Sodoma,
Gomorra,
Adma,
Zeboim xíꞌin Bela,
ta ñoo Bela inka̱ ki̱vi̱ ña kúu Zoar,
kua̱ꞌa̱n narey yóꞌo xíꞌin ndiꞌi natropa na a̱nda̱ yoso̱ na̱ní ña Sidim.
9 Ta yoso̱ yóꞌo o̱ꞌo̱n saá narey yóꞌo ka̱ni táꞌan na xíꞌin ko̱mi̱ narey na kúu ta̱Quedorlaomer,
ta̱Tidal,
ta̱Amrafel xíꞌin ta̱Arioc,
ta ñii ñii narey yóꞌo xáꞌnda chiño na no̱o̱ ñoo mi̱i na,
ña kúu Elam,
Goim,
Sinar xíꞌin Elasar.
10 Ta ndiꞌi no̱o̱ yoso̱ Sidim yóꞌo ni̱xi̱yo kua̱ꞌa̱ ní pozo no̱o̱ ni̱xi̱no nduta̱ to̱ón tá kisín na̱ní asfalto.
Ta narey ñoo Sodoma xíꞌin ñoo Gomorra kóni na saka̱ku xíꞌin mi̱i na no̱o̱ káni táꞌan na,
ta xi̱no na ta sava natropa ni̱ko̱yo na ini pozo yóꞌo.
Inka̱ na sa̱ka̱ku xíꞌin mi̱i,
xi̱no na kua̱ꞌa̱n na yuku̱.
11 Ta saá ko̱mi̱ narey yóꞌo na̱kuiso na ndiꞌi ñakuíká xíꞌin ñaxíxi ña ni̱xi̱yo ñoo Sodoma xíꞌin ñoo Gomorra,
ta ke̱e na kua̱ꞌa̱n noꞌo̱ na.
12 Ta ta̱Lot xa̱xi̱n ta̱Abram ni̱xi̱yo ra ñoo Sodoma;
ta ti̱in na ra ta ki̱sa ndu̱xa̱ na xíꞌin ra kua̱ꞌa̱n ra xíꞌin na ta kua̱ꞌa̱n ndiꞌi ñakuíká ra xíꞌin na.
13 Ta ni̱xi̱yo ñii ta̱a ta̱ ni̱ka̱ku no̱o̱ ka̱ni táꞌan na,
ta xíno ra ni̱xa̱ꞌa̱n ra nda̱to̱ꞌon ra xíꞌin ta̱Abram ndiꞌi ña ni̱ndoꞌo nañoo yóꞌo.
Ta ta̱Abram,
ta̱ xi̱kuu ta̱hebreo,
xi̱taku̱ ra no̱o̱ yóo kua̱ꞌa̱ ní tón na̱ní tatá,
yito̱n tón yóo no̱o̱ ñoꞌo̱ ta̱Mamre,
ta̱ xi̱kuu ta̱ñoo Amor.
Ta ta̱Mamre xi̱kuu ñani ta̱Escol xíꞌin ta̱Aner,
ta ndiꞌi nata̱a yóꞌo xa ki̱ndo̱o yuꞌú na xíꞌin ta̱Abram ña chindeé táꞌan na.
14 Ta xi̱ni̱ so̱ꞌo ta̱Abram yukía̱ ni̱ndoꞌo xa̱xi̱n ra,
ta na̱kaya ra ndiꞌi na kísa chiño no̱o̱ ra na ka̱ku veꞌe ra,
na xa sa̱kuáꞌá kani táꞌan,
ta u̱ni̱ ciento xa̱ꞌo̱n u̱ni̱ ta̱a xi̱kuu na,
ta ke̱e na kua̱ꞌa̱n na xíꞌin ra sa̱ta̱ narey a̱nda̱ ñoo na̱ní Dan.
15 Ñii ñoó kúu ña,
ta ta̱Abram xíꞌin natropa ra ni̱xaa̱ na no̱o̱ ndóo ko̱mi̱ narey yóꞌo,
ta ka̱ni táꞌan na ta ku̱chiño na ta̱xín na narey yóꞌo,
ta kua̱ꞌa̱n na sa̱ta̱ nayóꞌo a̱nda̱ ñoo na̱ní Hoba ña nákaa̱ chí norte ñoo Damasco.
16 Ta na̱kiꞌin na ndiꞌi ñakuíká ña ki̱ndaa narey yóꞌo ñoo Sodoma.
Ta saá ta̱Abram sa̱ka̱ku ra xa̱xi̱n ra ta̱Lot xíꞌin ndiꞌi ñakuíká ra.
Ta sa̱ka̱ku ra ndiꞌi násíꞌí xíꞌin inka̱ ni̱vi.
Ñayóꞌo káꞌa̱n xa̱ꞌa̱ ta̱Melquisedec, ndu̱kú ra no̱o̱ Ndios ña keꞌé ra ñava̱ꞌa xíꞌin ta̱Abram
17 Ta ndi̱kó ta̱Abram kua̱ꞌa̱n noꞌo̱ ra chi ku̱ndeé ra no̱o̱ ta̱rey Quedorlaomer xíꞌin inka̱ narey táꞌan ra,
ta ta̱rey ñoo Sodoma ke̱ta ra ña nakiꞌin va̱ꞌa ra ta̱Abram no̱o̱ yóo yoso̱ na̱ní ña Save,
inka̱ ki̱vi̱ ña kúu Yoso̱ ta̱Rey.
18 Ta ta̱Melquisedec,
ta̱ xi̱kuu ta̱rey no̱o̱ nañoo Salem,a
ta xi̱kuu ra ta̱su̱tu̱ ta̱ kísa chiño no̱o̱ Ndios,
Ta̱a ta̱ kúu ta̱Káꞌno no̱o̱ ndiꞌi ña yóo,
ta ke̱e ra ta na̱kutáꞌan ra xíꞌin ta̱Abram yichi̱ no̱o̱ va̱xi ra,
ta ta̱va ra si̱ta̱ va̱ꞌa xíꞌin vino ndíso ra ta xi̱xi ra ta xi̱ꞌi ra xíꞌin ta̱Abram.
19 Ta ni̱ka̱ꞌa̱n ra ñava̱ꞌa xíꞌin ta̱Abram,
káchí ra saá:
Ta Ndios,
Ta̱a ta̱Káꞌno no̱o̱ ndiꞌi ña yóo,
ná keꞌé ra ñava̱ꞌa xíꞌin ún,
chi ta̱ ki̱sa va̱ꞌa ñoyívi síkón xíꞌin ñoyívi yóꞌo kúu ra;
20 ná kasa to̱ꞌó yó Ndios Ta̱a ta̱Káꞌno yóꞌo,
chi ke̱ꞌé ra ña ku̱ndeé ún no̱o̱ ni̱vi na o̱n xi̱in koni yóꞌó,
káchí ta̱Melquisedec.
Ta ta̱Abram,
ndiꞌi ña kua̱ꞌa̱ ní ñakuíká xa na̱kiꞌin ra no̱o̱ ka̱ni táꞌan ra tá ku̱ndeé ra no̱o̱ narey,
ta saá ndiꞌi ña na̱kiꞌin ra yóꞌo ta̱ꞌví ra ña u̱xu̱ koꞌndo,
ta ñii koꞌndo yóꞌo ta̱xi ra ña ndaꞌa̱ ta̱su̱tu̱ Melquisedec.
21 Ta ta̱Bera ta̱rey ñoo Sodoma ni̱ka̱ꞌa̱n ra xíꞌin ta̱Abram,
káchí ra saá:
―Tata,
nataxi ún ndiꞌi ni̱vi nañoo i̱ ndaꞌa̱ i̱,
ta saá ná kindo̱o ndiꞌi ñakuíká ndaꞌa̱ ún ―káchí ra.
22 Ta nda̱kuii̱n ta̱Abram,
káchí ra saá:
―Tata,
xa nda̱níꞌi i̱ ndaꞌa̱ i̱ no̱o̱ Ndios,b
Ta̱a ta̱ kúu ta̱Káꞌno no̱o̱ ndiꞌi ña yóo,
ta ki̱sa va̱ꞌa ra ñoyívi síkón xíꞌin ñoyívi yóꞌo,
ta ndixa ni̱ka̱ꞌa̱n i̱ xíꞌin ra,
23 ndí nda̱ ñii ñakuíká ún o̱n kiꞌin i̱ ndaꞌa̱ ún,
ni nda̱ ñii yiꞌva̱,
ni nda̱ ñii ña nóꞌni ndu̱xa̱n o̱n kiꞌin i̱ ndaꞌa̱ ún,
ko̱to̱ ka̱ꞌa̱n ún xíꞌin inka̱ ni̱vi ndí yóꞌó kúu ta̱a ta̱ ki̱sa kuíká yi̱ꞌi̱.
24 O̱n xi̱in i̱ kiꞌin i̱ nda̱ ñii ñakuíká xa̱ꞌa̱ mi̱i i̱,
ta ndasaá kuiti ña xi̱xi natropa i̱ yichi̱ kúu ña na̱kiꞌin i̱.
Ta ni̱vi natáꞌan i̱ na ni̱xa̱ꞌa̱n xíꞌin i̱ na kúu ta̱Aner xíꞌin ta̱Escol xíꞌin ta̱Mamre,
va̱ꞌa ná kiꞌin na sava ñakuíká ndaꞌa̱ ún ―káchí ta̱Abram.