Ñayóꞌo káꞌa̱n xa̱ꞌa̱ ndasaá na̱ta̱ꞌvi̱ táꞌan ta̱Abram xíꞌin ta̱Lot
13
Ta ta̱Abram xíꞌin ñásíꞌí ra ke̱e na no̱o̱ ñoꞌo̱ Egipto,
ta ndiꞌi ña kómí na kua̱ꞌa̱n ña xíꞌin na,
ta kua̱ꞌa̱n na yichi̱ ña yáꞌa no̱o̱ ñoꞌo̱ Neguev.
Ta xa̱xi̱n ra ta̱Lot kua̱ꞌa̱n ra xíꞌin na.
2 Ta ta̱Abram ta̱kuíká ní kúu ra.
Kómí ra kua̱ꞌa̱ ní kiti̱ sa̱na̱ ra,
xíꞌin kua̱ꞌa̱ ní ñaplata ta kua̱ꞌa̱ ní ñaoro.
3 Ta nda̱ Neguev ki̱xáꞌá ra loꞌo loꞌo ndi̱kó ra a̱nda̱ ndi̱xaa̱ ra ñoo Bet‑el.
Ta ndi̱xaa̱ ra no̱o̱ siꞌna ni̱xi̱yo veꞌe mandiado ra ma̱ꞌñó ñoo Bet‑el xíꞌin ñoo Hai.
4 Ta no̱o̱ ndi̱kó ra ndi̱xaa̱ ra yóꞌo xa yóo ñii na̱ma̱ xíꞌin yu̱u̱ ña xa ki̱sa va̱ꞌa ra,
ta tuku ni̱ka̱ꞌa̱n ra xíꞌin Ndiosa ta ki̱sa to̱ꞌó ñaꞌá ra.
5 Ta ta̱Lot xíka ra xíꞌin sito ra ta̱Abram,
ta kuíká ní ra.
Kómí ra kua̱ꞌa̱ ní ndikachi,
xíꞌin ti̱súꞌu̱,
xíꞌin si̱ndi̱ki̱,
xíꞌin kua̱ꞌa̱ ní veꞌe mandiado.
6 Ta saá o̱n vása ní‑kunani ka̱ kaxaꞌan ndiꞌi kiti̱ sa̱na̱ na,
ni ni̱‑kivi kutaku̱ ndiꞌi na no̱o̱ ñoꞌo̱ yóꞌo.
7 Ta nata̱a na ndáa sa̱na̱ ta̱Abram káni táꞌan na xíꞌin nata̱a na ndáa sa̱na̱ ta̱Lot.
Ta naCanaán xíꞌin naFerez táku̱ ka̱ na no̱o̱ ñoꞌo̱ yóꞌo.
8 Ta saá ñii ki̱vi̱ ta̱Abram ni̱ka̱ꞌa̱n ra xíꞌin ta̱Lot,
káchí ra saá:
―Naveꞌe ní kúu yó,
ta saá o̱n vása va̱ꞌa koo kua̱chi xíꞌin yó,
ta o̱n vása va̱ꞌa naa xíꞌin táꞌan nata̱a na ndáa kiti̱ sa̱na̱ yó.
9 Yóꞌo yóo ndiꞌi ñoꞌo̱,
ta ka̱xin ún ndá xiiña va̱ꞌa kóni ún ko̱ꞌo̱n ún kutaku̱ ún.
Vitin keta síín ún ko̱ꞌo̱n ún kutaku̱ ún inka̱ xiiña.
Tá kóni ún ko̱ꞌo̱n ún chí yitin,
ta yi̱ꞌi̱ ko̱ꞌo̱n i̱ chí kuaꞌá;
tá yóꞌó kóni ún ko̱ꞌo̱n ún chí kuaꞌá,
ta yi̱ꞌi̱ ko̱ꞌo̱n i̱ chí yitin ―káchí ta̱Abram xíꞌin ta̱Lot.
10 Ta saá na̱koto ta̱Lot ndiꞌi yoso̱ yuꞌu̱ yu̱ta Jordán,
nda̱ ñoo Zoar ña nákaa̱ chí sur,
ta xi̱ni ra yóo kua̱ꞌa̱ ní takuií.
Nda̱tán livi ní náꞌa no̱o̱ ni̱xi̱yo tón ta̱ta̱ no̱o̱ na̱ní Edén kui̱ya̱ xi̱na̱ꞌá,
saá náꞌa ña.
Ta náꞌa ñoꞌo̱ yóꞌo nda̱tán náꞌa no̱o̱ ñoꞌo̱ Egipto ña nákaa̱ yatin yu̱ta Nilo.
Saá náꞌa laton ñoꞌo̱ yóꞌo no̱o̱ xi̱to ta̱Lot,
chi ki̱vi̱ o̱n ta̱ꞌán ka̱ sandiꞌi Ndios xa̱ꞌa̱ ñoo Sodoma xíꞌin ñoo Gomorra kúu ña.
11 Ta saá ta̱Lot na̱ka̱xin ra kutaku̱ ra yoso̱ yuꞌu̱ yu̱ta Jordán,
ta ke̱e ra kua̱ꞌa̱n ra chí no̱o̱ va̱xi kana ño̱ꞌo.
Saá ke̱ꞌé ta̱Abram xíꞌin ta̱Lot ki̱vi̱ na̱ta̱ꞌvi̱ táꞌan na.
12 Ta ta̱Abram ki̱ndo̱o ra no̱o̱ ñoꞌo̱ Canaán,
ta ta̱Lot ni̱xaa̱ ra ta ki̱xáꞌá ra táku̱ ra yatin ñoo ña ñóꞌo yoso̱,
ta ka̱ta ndichi ra yito̱n no̱o̱ ka̱tón ra veꞌe mandiado ra yatin no̱o̱ nákaa̱ ñoo Sodoma.
13 Ta ndiꞌi nañoo Sodoma xi̱kuu na ni̱vi na o̱n váꞌa,
na ni̱ki̱ꞌvi kua̱chi náꞌno ní no̱o̱ Ndios xi̱kuu na.
14 Tá ndi̱ꞌi na̱ta̱ꞌvi̱ táꞌan ta̱Lot xíꞌin ta̱Abram,
ta Ndios ni̱ka̱ꞌa̱n ra xíꞌin ta̱Abram,
káchí ra saá:
Koto ún ndiꞌi saá xiiña no̱o̱ ñoꞌo̱ yóꞌo,
koto ún chí no̱o̱ va̱xi kana ño̱ꞌo,
chí no̱o̱ kua̱ꞌa̱n ke̱tá ño̱ꞌo,
chí yitin,
ta chí kuaꞌá.
15 Ndiꞌi saá ñoꞌo̱ yóꞌo ña xíto ún vitin taxi i̱ ña ndaꞌa̱ ún,
ta xíꞌin ndaꞌa̱ nasa̱ꞌya ñani síkuá ún,
ta kuu ña ñoꞌo̱ ndó ndiꞌi saá ki̱vi̱ ña va̱xi.
16 Keꞌé i̱ ña koo kua̱ꞌa̱ ní sa̱ꞌya ñani síkuá ún,
nda̱tán yóo yaa̱ no̱o̱ ñoꞌo̱,
saá koo na.
Nda̱ ñii ni̱vi o̱n ki̱ví kaꞌvi na ndasaá kúu yaa̱ no̱o̱ ñoꞌo̱,
ta saá o̱n kívi kaꞌvi na ndasaá kuu sa̱ꞌya ñani síkuá ún.
17 Nakundichi ún ta ko̱ꞌo̱n ún ndiꞌi saá no̱o̱ ndíka̱ xíꞌin no̱o̱ káni̱ no̱o̱ ñoꞌo̱ yóꞌo,
chi taxi i̱ ña ndaꞌa̱ ún,
káchí Ndios.
18 Ta saá ta̱Abram nda̱níꞌi ra veꞌe mandiado ra,
ta ke̱e ra kua̱ꞌa̱n ra kutaku̱ ra no̱o̱ yóo ní yito̱n tón na̱ní tatá,
yito̱n yóꞌo yóo nó no̱o̱ ñoꞌo̱ ta̱a ta̱ na̱ní Mamre,
ña nákaa̱ yatin ñoo Hebrón.
Ta ta̱Abram ni̱xaa̱ ra,
ta ki̱sa va̱ꞌa ra ñii na̱ma̱ xíꞌin yu̱u̱ no̱o̱ ki̱sa to̱ꞌó ra Ndios.