Ñayóꞌo káꞌa̱n xa̱ꞌa̱ Ndios, na̱ka̱xin ra ta̱Abram
12
Ta Ndiosa xa ni̱ka̱ꞌa̱n ra xíꞌin ta̱Abram,
ka̱chí ra saá:
“Kee ún ñoo ún,
sandakoo ún natáꞌan ún xíꞌin naveꞌe yivá ún,
ta ko̱ꞌo̱n ún kutaku̱ ún inka̱ xiiña ña sanáꞌa i̱ no̱o̱ ún.
2 Keꞌé i̱ ña nasa̱ꞌya ñani síkuá ún kuu na ñii ñoo káꞌno,
ta keꞌé i̱ ñava̱ꞌa xíꞌin ún,
ta kuu ún ñii ta̱a ta̱ kánóo síkón ñato̱ꞌó,
ta yóꞌó kuu ún ñii ta̱va̱ꞌa,
ta keꞌé ún ñava̱ꞌa xíꞌin kua̱ꞌa̱ ní ni̱vi.
3 Ta keꞌé i̱ ñava̱ꞌa xíꞌin ni̱vi na kéꞌé ñava̱ꞌa xíꞌin ún,
ta ni̱vi na kéꞌé ña o̱n váꞌa xíꞌin ún,
ta yi̱ꞌi̱ sata̱vi̱ chiꞌña i̱ nayóꞌo.
Ta xa̱ꞌa̱ mi̱i ún,
ni̱vi na ndiꞌi saá ñoyívi nakiꞌin na ñava̱ꞌa keꞌé i̱ xíꞌin na”,
ka̱chí Ndios.
4 Ta saá ta̱Abram ke̱e ra kua̱ꞌa̱n ra,
nda̱tán yóo ña ni̱ka̱ꞌa̱n Ndios xíꞌin ra.
Ta ta̱Lot kua̱ꞌa̱n ra xíꞌin ra.
Ki̱vi̱ ke̱e ta̱Abram ñoo Harán ta kua̱ꞌa̱n ra,
kómí ra u̱ni̱ si̱ko̱ xa̱ꞌo̱n kui̱ya̱.
5 Ta ñásíꞌí ra ñáSarai,
xíꞌin xa̱xi̱n ra ta̱Lot kua̱ꞌa̱n na xíꞌin ra,
ta na̱kiꞌin ra ndiꞌi ña kómí ra kua̱ꞌa̱n ña xíꞌin ra,
ta naesclavo ra nañoo Harán na kísa chiño no̱o̱ ra kua̱ꞌa̱n na xíꞌin ra no̱o̱ ñoꞌo̱ Canaán,
ta ni̱xaa̱ na.
6 Ta ta̱Abram ni̱yaꞌa ra no̱o̱ ñoꞌo̱ Canaán,
ta ni̱xaa̱ ra nda̱ ñoo na̱ní Siquem,
no̱o̱ ñíndichi ñii tón káꞌno na̱ní tatá ta na̱ní nó More.
Ta kui̱ya̱ yóꞌo ni̱vi naCanaán xi̱taku̱ na no̱o̱ ñoꞌo̱ yóꞌo.
7 Ta na̱ti̱vi Ndios no̱o̱ ta̱Abram,
ta káchí Ndios saá xíꞌin ra:
―Ñoꞌo̱ yóꞌo taxi i̱ ndaꞌa̱ nasa̱ꞌya ñani síkuá ún ña kutaku̱ na ―káchí ra.
Ta ta̱Abram ki̱sa va̱ꞌa ra ñii na̱ma̱ xíꞌin yu̱u̱ no̱o̱ kasa to̱ꞌó ra Ndios,
chi yóꞌo kúu no̱o̱ na̱ti̱vi Ndios no̱o̱ ra.
8 Ta saá ke̱e ra kua̱ꞌa̱n ra yuku̱ ña yóo chí no̱o̱ va̱xi kana ño̱ꞌo,
ta ni̱xaa̱ ra ma̱ꞌñó no̱o̱ yóo ñoo na̱ní Bet‑el xíꞌin ñoo ña na̱ní Hai,
ta ta̱Abram ka̱ta ndichi ra yito̱n ta ka̱tón ra veꞌe mandiado no̱o̱ kandúꞌu̱ ra.
Ta ñoo Bet‑el kíndo̱o ña chí no̱o̱ kua̱ꞌa̱n ke̱tá ño̱ꞌo,
ta ñoo Hai kíndo̱o ña chí no̱o̱ va̱xi kana ño̱ꞌo.
Ta yuku̱ yóꞌo ki̱sa va̱ꞌa ra inka̱ na̱ma̱ xíꞌin yu̱u̱,
ta ni̱ka̱ꞌa̱n ra xíꞌin Ndios ta ki̱sa to̱ꞌó ñaꞌá ra.
9 Ta saá ta̱Abram ke̱e ra kua̱ꞌa̱n ra yichi̱ ña kua̱ꞌa̱n no̱o̱ yóo ñoꞌo̱ na̱ní Neguev.
Ñayóꞌo káꞌa̱n xa̱ꞌa̱ yukía̱ ni̱ndoꞌo ta̱Abram no̱o̱ ñoꞌo̱ Egipto
10 Ta kui̱ya̱ yóꞌo xi̱nakaa̱ ní so̱ko no̱o̱ ñoꞌo̱ Canaán,
o̱n ko̱ó ña kuxu ni̱vi ní‑xiyo,
ta saá ta̱Abram xíꞌin natáꞌan ra kua̱ꞌa̱n na kutaku̱ na no̱o̱ ñoꞌo̱ Egipto.
11 Ta o̱n ta̱ꞌán ka̱ xaa̱ na ki̱ꞌvi na no̱o̱ ñoꞌo̱ Egipto,
ta̱Abram ni̱ka̱ꞌa̱n ra xíꞌin ñásíꞌí ra ñáSarai,
káchí ra saá xíꞌin ñá:
―Xíni̱ i̱ ndí yóꞌó kúu ún ñaꞌa̱ ñá livi ní,
12 ta nata̱a no̱o̱ ñoꞌo̱ Egipto ki̱vi̱ koni na yóꞌó,
ta ka̱ꞌa̱n na saá xa̱ꞌa̱ ún,
kachí na:
“Ñáñaꞌa̱ yóꞌo kúu ñásíꞌí ra”,
kachí na.
Ta saá kaꞌni na yi̱ꞌi̱ xa̱ꞌa̱ ún,
ta yóꞌó taxi na kutaku̱ ún.
13 Ña̱kán ka̱ꞌa̱n ún xíꞌin ni̱vi ndí ki̱ꞌva̱ i̱ kúu ún,
ña koo va̱ꞌa i̱ ña o̱n kaꞌni na yi̱ꞌi̱ xa̱ꞌa̱ ún ―káchí ta̱Abram.
14 Ta saá ni̱xaa̱ ta̱Abram no̱o̱ ñoꞌo̱ Egipto,
ta naEgipto xi̱ni na ñáSarai livi ní ñá.
15 Ta nata̱a náꞌno na kísa chiño xíꞌin ta̱rey Faraón xi̱ni na ñáSarai,
ta ni̱xa̱ꞌa̱n na nda̱to̱ꞌon na xíꞌin ta̱Faraón ndí livi ní ñá.
Ta saá ta̱Faraón xa̱ꞌnda chiño ra kixi ñá veꞌe ra,
ta ki̱xaa̱ ñá.
16 Ta ta̱Faraón ke̱ꞌé ra ñava̱ꞌa xíꞌin ta̱Abram xa̱ꞌa̱ ña kúsii̱ ini ra xíni ra ñáSarai.
Ta sa̱níꞌi ra ta̱Abram kua̱ꞌa̱ ní ndikachi,
xíꞌin si̱ndi̱ki̱,
xíꞌin burro chée,
xíꞌin burro siꞌí,
xíꞌin tícamello,
xíꞌin ni̱vi na kísa chiño no̱o̱ ra,
ta̱a xíꞌin ñaꞌa̱.
17 Ta xa̱ꞌa̱ ñáSarai ñásíꞌí ta̱Abram,
Ndios sa̱xo̱ꞌvi̱ ra ta̱Faraón xíꞌin naveꞌe ra,
ta̱xi ra ndeé ní ndóꞌo na kue̱ꞌe̱.
18 Ña̱kán ta̱Faraón ka̱na ra ta̱Abram,
ta ki̱xaa̱ ra no̱o̱ ra,
ta ni̱ka̱ꞌa̱n ra xíꞌin ra:
―¿Nda̱chun ke̱ꞌé ún saá xíꞌin i̱?
¿Nda̱chun o̱n vása ní‑kaꞌa̱n ún xíꞌin i̱ ndí ñásíꞌí ún kúu ñá?
19 Ni̱ka̱ꞌa̱n ún ki̱ꞌva̱ ún kúu ñá,
ta saá xa̱ni ini i̱ kuu ñá ñásíꞌí i̱.
Vitin,
¡ná kiꞌin ún ñá,
ta ko̱ꞌo̱n ñá xíꞌin ún!
―káchí ra.
20 Ta saá xa̱ꞌnda chiño ta̱Faraón no̱o̱ natropa ra,
ña taxín na ta̱Abram kee ra no̱o̱ ñoꞌo̱ Egipto ta ko̱ꞌo̱n ra,
ta saá kua̱ꞌa̱n ta̱Abram ta kua̱ꞌa̱n ñásíꞌí ra xíꞌin ndiꞌi ña kómí ra xíꞌin ra.