Ñayóꞌo káꞌa̱n xa̱ꞌa̱ torre ñoo Babel
11
Ta kui̱ya̱ xi̱na̱ꞌá,
ndiꞌi ni̱vi na xi̱taku̱ ñoyívi yóꞌo ni̱ka̱ꞌa̱n na ñii la̱á kuiti no̱o̱ to̱ꞌon.
2 Ta ki̱vi̱ ke̱e ni̱vi chí no̱o̱ va̱xi kana ño̱ꞌo,
ta va̱xi na ta na̱níꞌi na ñii yoso̱ no̱o̱ ndíka̱ ní kúu ña,
ta nákaa̱ yoso̱ yóꞌo ñii xiiña no̱o̱ ñoꞌo̱ na̱ní Sinar,a
ta ki̱ndo̱o na kutaku̱ na yoso̱ yóꞌo.
3 Ta ñii ki̱vi̱ ni̱ka̱ꞌa̱n na xíꞌin táꞌan na,
káchí na saá:
―Ná kasa va̱ꞌa yó ndo̱ꞌo,
ta kaꞌmi yó ña xíꞌin ñoꞌo̱ xíxi̱ ―káchí na.
Ta saá xi̱ni̱ ñóꞌó na ndo̱ꞌo yóꞌo,
no̱o̱ ña koni̱ ñóꞌó na yu̱u̱,
ta xi̱ni̱ ñóꞌó na ña kisín nduta̱ to̱ón tá na̱ní asfalto,
no̱o̱ ña koni̱ ñóꞌó na nda̱ꞌyi̱,
ña sanakutáꞌan na ndo̱ꞌo ña kasa va̱ꞌa na ña kóni na.
4 Ta káchí na saá:
―Vitin ná kixáꞌá yó kasa va̱ꞌa yó ñii ñoo xíꞌin ñii torre ña to̱nda̱a si̱ni̱ torre a̱nda̱ ñoyívi síkón.
Ta saá ná kanóo va̱ꞌa ní to̱ꞌon xa̱ꞌa̱ yó,
ta o̱n vása xíni̱ ñóꞌó kui̱ta̱ níꞌnó yó ko̱ꞌo̱n yó ndiꞌi saá xiiña ñoyívi yóꞌo ―káchí na.
5 Ta Ndiosb ke̱e ra ñoyívi ni̱no,
ta no̱o ra xíto ra ñoo xíꞌin torre ña kísa va̱ꞌa ni̱vi.
6 Ta saá Ndios ndi̱kó ra ñoyívi ni̱no,
ta ni̱ka̱ꞌa̱n Ndios,
káchí ra saá:
“Ñii ñoo kúu ni̱vi,
ta káꞌa̱n na ñii la̱á no̱o̱ to̱ꞌon.
Ta ki̱xáꞌá na kísa chiño na,
ta o̱n ko̱ó ña kuchiño kasi no̱o̱ na ña o̱n keꞌé na ndiꞌi ña kóni mi̱i na.
7 Ta vitin ná noo yó nda̱ no̱o̱ yóo na,
ta nasama yó to̱ꞌon káꞌa̱n na ña nataxi yó kua̱ꞌa̱ ní no̱o̱ to̱ꞌon ña ka̱ꞌa̱n ni̱vi yóꞌo,
ta o̱n kunda̱a̱ ka̱ ini na xíꞌin ña káꞌa̱n na xíꞌin táꞌan na”,
káchí Ndios.
8 Saá ni̱xi̱yo ña,
ta Ndios sa̱kui̱ta̱ níꞌnó ra ndiꞌi ni̱vi,
ta kua̱ꞌa̱n na kutaku̱ na ndiꞌi saá xiiña ñoyívi no̱o̱ ñoꞌo̱.
Ña̱kán sa̱ndakoo na ña kísa va̱ꞌa na ñii ñoo káꞌno yóꞌo.
9 Ta xa̱ꞌa̱ ñayóꞌo ñoo yóꞌo na̱ní ña Babel.c
Saá chi ñoo yóꞌo Ndios na̱sama ra to̱ꞌon káꞌa̱n ndiꞌi ni̱vi ta na̱taxi ra kua̱ꞌa̱ ní no̱o̱ to̱ꞌon ña ka̱ꞌa̱n ni̱vi yóꞌo.
Ta saá Ndios sa̱kui̱ta̱ níꞌnó ra ni̱vi kua̱ꞌa̱n na ndiꞌi saá xiiña ñoyívi no̱o̱ ñoꞌo̱.
Ñayóꞌo káꞌa̱n xa̱ꞌa̱ nasa̱ꞌya ñani síkuá ta̱Sem
10 Nayóꞌo xi̱kuu nasa̱ꞌya ñani síkuá ta̱Sem.
Ni̱yaꞌa o̱vi̱ kui̱ya̱ ña ndi̱ꞌi ko̱on sa̱vi̱ ndiví naꞌá,
ta ta̱Sem kómí ra ñii ciento kui̱ya̱,
ta ka̱ku sa̱ꞌya ra xíꞌin ñásíꞌí ra,
ta chi̱nóo na ki̱vi̱ sa̱ꞌya na,
na̱ní ra Arfaxad.
11 Ta saá ta̱Sem xi̱taku̱ ka̱ ra inka̱ o̱ꞌo̱n ciento kui̱ya̱,
ta ni̱xi̱yo kua̱ꞌa̱ ka̱ sa̱ꞌya ra,
ta̱a xíꞌin ñaꞌa̱,
ta saá ni̱xiꞌi̱ ra.
12 Ta ta̱Arfaxad kómí ra o̱ko̱ xa̱ꞌo̱n kui̱ya̱,
ta ka̱ku sa̱ꞌya ra xíꞌin ñásíꞌí ra,
ta chi̱nóo na ki̱vi̱ sa̱ꞌya na,
na̱ní ra Sala.
13 Ta saá ta̱Arfaxad xi̱taku̱ ka̱ ra inka̱ ko̱mi̱ ciento u̱ni̱ kui̱ya̱,
ta ni̱xi̱yo kua̱ꞌa̱ ka̱ sa̱ꞌya ra,
ta̱a xíꞌin ñaꞌa̱,
ta saá ni̱xiꞌi̱ ra.
14 Ta ta̱Sala kómí ra o̱ko̱ u̱xu̱ kui̱ya̱,
ta ka̱ku sa̱ꞌya ra xíꞌin ñásíꞌí ra,
ta chi̱nóo na ki̱vi̱ sa̱ꞌya na,
na̱ní ra Heber.
15 Ta saá ta̱Sala xi̱taku̱ ka̱ ra inka̱ ko̱mi̱ ciento u̱ni̱ kui̱ya̱,
ta ni̱xi̱yo kua̱ꞌa̱ ka̱ sa̱ꞌya ra,
ta̱a xíꞌin ñaꞌa̱,
ta saá ni̱xiꞌi̱ ra.
16 Ta ta̱Heber kómí ra o̱ko̱ u̱xu̱ ko̱mi̱ kui̱ya̱,
ta ka̱ku sa̱ꞌya ra xíꞌin ñásíꞌí ra,
ta chi̱nóo na ki̱vi̱ sa̱ꞌya na,
na̱ní ra Peleg.
17 Ta saá ta̱Heber xi̱taku̱ ka̱ ra inka̱ ko̱mi̱ ciento o̱ko̱ u̱xu̱ kui̱ya̱,
ta ni̱xi̱yo kua̱ꞌa̱ ka̱ sa̱ꞌya ra,
ta̱a xíꞌin ñaꞌa̱,
ta saá ni̱xiꞌi̱ ra.
18 Ta ta̱Peleg kómí ra o̱ko̱ u̱xu̱ kui̱ya̱,
ta ka̱ku sa̱ꞌya ra xíꞌin ñásíꞌí ra,
ta chi̱nóo na ki̱vi̱ sa̱ꞌya na,
na̱ní ra Reu.
19 Ta saá ta̱Peleg xi̱taku̱ ka̱ ra o̱vi̱ ciento i̱i̱n kui̱ya̱,
ta ni̱xi̱yo kua̱ꞌa̱ ka̱ sa̱ꞌya ra,
ta̱a xíꞌin ñaꞌa̱,
ta saá ni̱xiꞌi̱ ra.
20 Ta ta̱Reu kómí ra o̱ko̱ u̱xu̱ o̱vi̱ kui̱ya̱,
ta ka̱ku sa̱ꞌya ra xíꞌin ñásíꞌí ra,
ta chi̱nóo na ki̱vi̱ sa̱ꞌya na,
na̱ní ra Serug.
21 Ta saá ta̱Reu xi̱taku̱ ka̱ ra inka̱ o̱vi̱ ciento u̱xa̱ kui̱ya̱,
ta ni̱xi̱yo kua̱ꞌa̱ ka̱ sa̱ꞌya ra,
ta̱a xíꞌin ñaꞌa̱,
ta saá ni̱xiꞌi̱ ra.
22 Ta ta̱Serug kómí ra o̱ko̱ u̱xu̱ kui̱ya̱,
ta ka̱ku sa̱ꞌya ra xíꞌin ñásíꞌí ra,
ta chi̱nóo na ki̱vi̱ sa̱ꞌya na,
na̱ní ra Nacor.
23 Ta saá ta̱Serug xi̱taku̱ ka̱ ra inka̱ o̱vi̱ ciento kui̱ya̱,
ta ni̱xi̱yo kua̱ꞌa̱ ka̱ sa̱ꞌya ra,
ta̱a xíꞌin ñaꞌa̱,
ta saá ni̱xiꞌi̱ ra.
24 Ta ta̱Nacor kómí ra o̱ko̱ i̱i̱n kui̱ya̱,
ta ka̱ku sa̱ꞌya ra xíꞌin ñásíꞌí ra,
ta chi̱nóo na ki̱vi̱ sa̱ꞌya na,
na̱ní ra Taré.
25 Ta saá ta̱Nacor xi̱taku̱ ka̱ ra inka̱ ciento xa̱ꞌo̱n ko̱mi̱ kui̱ya̱,
ta ni̱xi̱yo kua̱ꞌa̱ ka̱ sa̱ꞌya ra,
ta̱a xíꞌin ñaꞌa̱,
ta saá ni̱xiꞌi̱ ra.
26 Ta ta̱Taré kómí ra u̱ni̱ si̱ko̱ u̱xu̱ kui̱ya̱,
ta saá ni̱xi̱yo sa̱ꞌya ra xíꞌin ñásíꞌí ra;
nayóꞌo xi̱kuu ta̱Abram,
ta̱Nacor xíꞌin ta̱Harán.
Ñayóꞌo káꞌa̱n xa̱ꞌa̱ nasa̱ꞌya ñani síkuá ta̱Taré
27 Nayóꞌo kúu sa̱ꞌya ñani síkuá ta̱Taré,
ta̱ xi̱kuu yivá ta̱Abram xíꞌin ta̱Nacor xíꞌin ta̱Harán.
Ta̱Harán xi̱kuu yivá ta̱Lot,
28 ta ta̱Harán siꞌna ra ni̱xiꞌi̱ no̱o̱ yivá ra ta̱Taré.
Ta ta̱Harán ka̱ku ra mi̱i ñoo na̱ní Ur ña nákaa̱ no̱o̱ ñoꞌo̱ na̱ní Caldea,
ta mi̱i ñoo no̱o̱ ka̱ku ra yóꞌo,
ni̱xiꞌi̱ ra.
29 Ta ta̱Abram to̱nda̱ꞌa̱ ra xíꞌin ñii ñaꞌa̱ ñá na̱ní Sarai,
ta ta̱Nacor to̱nda̱ꞌa̱ ra xíꞌin ñii ñaꞌa̱ ñá na̱ní Milca,
ñá xi̱kuu sa̱ꞌya ta̱Harán,
ta xi̱kuu ñá ki̱ꞌvi̱ ñáIsca.
30 Ta ñáSarai xi̱kuu ñáñaꞌa̱ ñá ni̱‑kuchiño koo sa̱ꞌya.
31 Ta ta̱Taré ke̱e ra ñoo Ur ña nákaa̱ no̱o̱ ñoꞌo̱ Caldea ta kua̱ꞌa̱n ra koo ra no̱o̱ ñoꞌo̱ na̱ní Canaán.
Kua̱ꞌa̱n sa̱ꞌya ra ta̱Abram,
xíꞌin sa̱ꞌya ñani ra ta̱Lot ta̱ kúu sa̱ꞌya ta̱Harán,
xíꞌin xa̱no ra ñáSarai ñá kúu ñásíꞌí ta̱Abram,
kua̱ꞌa̱n nayóꞌo xíꞌin ra.
Vará o̱n ta̱ꞌán xaa̱ na no̱o̱ ñoꞌo̱ Canaán,
ta ni̱xaa̱ na ñii ñoo na̱ní Harán,
ta chi̱kaa̱ ini na kindo̱o na kutaku̱ na ñoo yóꞌo.
32 Ta ta̱Taré kómí ra o̱vi̱ ciento o̱ꞌo̱n kui̱ya̱,
ta saá ni̱xiꞌi̱ ra ñoo Harán.