Ñayóꞌo káꞌa̱n xa̱ꞌa̱ ndasaá chi̱ndúꞌu̱ Ndios to̱ꞌon ña ki̱ndo̱o ra xíꞌin ta̱Noé
9
Ta Ndios ni̱ka̱ꞌa̱n ra ñava̱ꞌa xíꞌin ta̱Noé ta xíꞌin nasa̱ꞌya ra,
káchí ra saá:
―Ná koo kua̱ꞌa̱ ní sa̱ꞌya ndó ña kutaku̱ na ndiꞌi xiiña no̱o̱ ñoꞌo̱.
2 Ta ndiꞌi kiti̱ kuyi̱ꞌví rí no̱o̱ ndóꞌó;
ta kukomí ndó nda̱yí no̱o̱ ndiꞌi rí,
kiti̱ tí xíka no̱o̱ ñoꞌo̱,
kiti̱ tí kómí ndi̱xi̱n,
kiti̱ tí ñóo ti̱xin xíka no̱o̱ ñoꞌo̱,
xíꞌin ndiꞌi kiti̱ tí táku̱ ini takuií.
3 Va̱ꞌa kuxu ndó ndiꞌi no̱o̱ kiti̱.
Nda̱tán xa ta̱xi i̱ va̱ꞌa kaxi ndó ndiꞌi no̱o̱ yu̱ku̱ kuíi̱ xíꞌin kui̱ꞌi,
ñii ki̱ꞌva saá táxi i̱ nda̱yí ña va̱ꞌa kuxu ndó ndiꞌi no̱o̱ kiti̱.
4 Ta ndasaá kuiti o̱n váꞌa kuxu ndó ko̱ñu kiti̱ tá ñóꞌo ka̱ ni̱i̱ rí xíꞌin ña,
chi ni̱i̱ rí kúu ña táku̱ rí.
5 Yi̱ꞌi̱ kasa nani i̱ kuenda.
Tá ñii kiti̱ xa̱ta rí ni̱i̱ ta xa̱ꞌni rí ñii ni̱vi,
ta kiti̱ yóꞌo xíni̱ ñóꞌó kivi̱ rí.
Tá ni̱vi xa̱ta na ni̱i̱ ta xa̱ꞌni na inka̱ ni̱vi,
ta ni̱vi xa̱ꞌni yóꞌo xíni̱ ñóꞌó kivi̱ na.
6 Tá yóo ni̱vi xa̱ꞌni na inka̱ ni̱vi,
ta inka̱ ni̱vi xíni̱ ñóꞌó kaꞌni na ni̱vi xa̱ꞌni yóꞌo,
saá chi yi̱ꞌi̱ kúu ta̱a ta̱ ki̱sa va̱ꞌa ni̱vi nda̱tán yóo mi̱i i̱.
7 Ta ndóꞌó,
ná kui̱na̱ ndó ta nduu ndó kua̱ꞌa̱ ní ni̱vi,
ña kutaku̱ ndó ndiꞌi saá xiiña ñoyívi no̱o̱ ñoꞌo̱ ―káchí Ndios.
8 Ta tuku ni̱ka̱ꞌa̱n Ndios xíꞌin ta̱Noé ta xíꞌin nasa̱ꞌya ra,
káchí ra saá:
9 ―Koto ndó,
yi̱ꞌi̱ vitin chíndúꞌu̱ i̱ ñii to̱ꞌon ña kíndo̱o i̱ xíꞌin ndóꞌó ta xíꞌin ndiꞌi sa̱ꞌya ñani síkuá ndó,
10 ta chíndúꞌu̱ i̱ ña xíꞌin ndiꞌi kiti̱ tí ni̱ki̱ꞌvi ini tón barco xíꞌin ndó,
kiti̱ tí kómí ndi̱xi̱n,
kiti̱ títa̱ta̱ xíꞌin tíyukú,
xíꞌin ndiꞌi inka̱ kiti̱ tí kutaku̱ ñoyívi no̱o̱ ñoꞌo̱ ki̱vi̱ ña va̱xi.
11 To̱ꞌon ña chíndúꞌu̱ i̱ xíꞌin ndó kúu ñayóꞌo:
nda̱ ñii ka̱ ki̱vi̱ ña va̱xi o̱n sakoon ka̱ i̱ sa̱vi̱ ndiví naꞌá
ña sandiꞌi i̱ xa̱ꞌa̱ ndiꞌi ni̱vi xíꞌin ndiꞌi kiti̱.
O̱n sakoon ka̱ i̱ sa̱vi̱ ndiví naꞌá
ña sandiꞌi i̱ xa̱ꞌa̱ ndiꞌi ña yóo no̱o̱ ñoꞌo̱
―káchí Ndios.
12 Ta tuku ni̱ka̱ꞌa̱n Ndios:
―Ñayóꞌo kúu ñii seña ña sanáꞌa ña chíndúꞌu̱ i̱ ñii to̱ꞌon ña kíndo̱o i̱ xíꞌin ndó ta xíꞌin ndiꞌi kiti̱,
ta to̱ꞌon yóꞌo kindo̱o ña ndiꞌi saá kui̱ya̱ ña va̱xi:
13 Ta ka̱ni ndichi i̱ ñii kua̱ꞌnkúa no̱o̱ vi̱ko̱,
ta ñayóꞌo kuu ña sanáꞌa to̱ꞌon ña ki̱ndo̱o i̱ xíꞌin ñoyívi no̱o̱ ñoꞌo̱.
14 Ndiꞌi saá yichi̱ chikaa̱ i̱ vi̱ko̱ kixaa̱ ña ñoyívi síkón,
ta nati̱vi kua̱ꞌnkú ma̱ꞌñó vi̱ko̱ yóꞌo,
15 ta saá nakáꞌán i̱ to̱ꞌon ña ki̱ndo̱o i̱ xíꞌin ndó ta xíꞌin ndiꞌi saá no̱o̱ kiti̱.
O̱n sakoon ka̱ i̱ sa̱vi̱ ndiví naꞌá ña sandiꞌi i̱ xa̱ꞌa̱ ndiꞌi ni̱vi xíꞌin ndiꞌi kiti̱ ñoyívi no̱o̱ ñoꞌo̱.
16 Tá nati̱vi kua̱ꞌnkú no̱o̱ vi̱ko̱,
ta koto i̱ ña,
ta nakáꞌán i̱ to̱ꞌon ña ki̱ndo̱o i̱ xíꞌin ndiꞌi ndó,
ta xíꞌin ndiꞌi kiti̱ tí táku̱ ñoyívi no̱o̱ ñoꞌo̱.
Ta nda̱ ñii ki̱vi̱ o̱n ndiꞌi xa̱ꞌa̱ to̱ꞌon ña ki̱ndo̱o i̱ xíꞌin ndó.
17 Kua̱ꞌnkú kuu ñii ña sanáꞌa ña ki̱ndo̱o i̱ to̱ꞌon yóꞌo xíꞌin ndiꞌi ni̱vi ta xíꞌin ndiꞌi kiti̱ táku̱ ñoyívi no̱o̱ ñoꞌo̱ ―saá ni̱ka̱ꞌa̱n Ndios xíꞌin ta̱Noé.
Ñayóꞌo káꞌa̱n xa̱ꞌa̱ ta̱Noé xíꞌin nasa̱ꞌya ra
18 Ta nasa̱ꞌya ta̱Noé na ke̱e ini tón barco xíꞌin ra kúu ta̱Sem,
ta̱Cam xíꞌin ta̱Jafet.
Ta ta̱Cam xi̱kuu yivá ta̱Canaán.
19 Nayóꞌo kúu u̱ni̱ sa̱ꞌya ta̱Noé,
na xi̱kuu xi̱i̱ síkuá ndiꞌi ni̱vi na ni̱xi̱na̱ ñoyívi yóꞌo.
20 Ta ta̱Noé ki̱xáꞌá kísa chiño ra no̱o̱ ñoꞌo̱,
ta chi̱ꞌi ra kua̱ꞌa̱ ní tón uva.
21 Ñii ki̱vi̱ ta̱Noé xi̱ꞌi ra vino,
ta ni̱xi̱i̱ni ra,
ta kándúꞌu̱ yálá ra ti̱xin veꞌe mandiado ra,
kísi̱n ra.
22 Ta ta̱Cam,
ta̱ kúu yivá ta̱Canaán,
xi̱ni ra kándúꞌu̱ yálá yivá ra,
ta saá ke̱e ra kua̱ꞌa̱n ra ta nda̱to̱ꞌon ra xíꞌin o̱vi̱ ñani ra na yóo ke̱ꞌe.
23 Ta ta̱Sem xíꞌin ta̱Jafet ki̱ꞌin na ñii tiko̱to̱ ndíka̱ no̱o̱,
ta chi̱nóo na ña so̱ko̱ mi̱i na,
ta ni̱ki̱ꞌvi símá na no̱o̱ kándúꞌu̱ yivá na ti̱xin veꞌe mandiado,
ta na̱kasi na yi̱kí ko̱ñu yivá na xíꞌin tiko̱to̱ yóꞌo,
ta na o̱vi̱ yóꞌo o̱n vása ní‑xini na ñayálá yivá na.
24 Tá na̱káxín ini ta̱Noé ña xi̱ꞌi ra,
ta saá ku̱nda̱a̱ ini ra yukía̱ ke̱ꞌé sa̱ꞌya ra ta̱loꞌo xíꞌin ra,
25 ta ni̱ka̱ꞌa̱n ra xa̱ꞌa̱ sa̱ꞌya ra ta̱Cam,
káchí ra saá:
¡Ta̱ ni̱tavi chiꞌña kúu ta̱Canaán!
¡Kuu ra ta̱esclavo,b
ta̱ ni̱no̱ ka̱ no̱o̱ ndiꞌi naesclavo na kísa chiño no̱o̱ nañani ra!,
saá káchí ta̱Noé.
26 Ta tuku ni̱ka̱ꞌa̱n ra,
káchí ra saá:
Ta Ndios,c
ta̱a ta̱ kísa to̱ꞌó i̱,
ná keꞌé ra ñava̱ꞌa xíꞌin ta̱Sem.
Ta ta̱Canaán kuu ra ta̱esclavo no̱o̱ ta̱yóꞌo.
27 Ná taxi Ndios ña nandika kua̱ꞌa̱ ka̱ nduu ñoꞌo̱ no̱o̱ kutaku̱ ta̱Jafet,
ná koo ra xíꞌin ñani ra ta̱Sem,
ta ta̱Canaán kuu ra ta̱esclavo no̱o̱ ta̱Jafet,
káchí ta̱Noé.