8
Ta saá Ndios na̱káꞌán ra xa̱ꞌa̱ ta̱Noé ta kúndáꞌví ini ra xíni ñaꞌá ra,
xíꞌin ndiꞌi kiti̱ tí ñóꞌo ini tón barco,
tíyukú xíꞌin títa̱ta̱.
Ta Ndios ke̱ꞌé ra ña ndeé ní káni ta̱chi̱ no̱o̱ ñoꞌo̱,
ta ki̱xáꞌá va̱xi noo takuií.
2 Ndási̱ ñakónó no̱o̱ ñoꞌo̱ no̱o̱ ka̱nakoo takuií,
ta ndási̱ tuku ñoyívi síkón no̱o̱ ke̱e takuií tá ni̱ko̱yo,
ta ni̱ya̱a̱ sa̱vi̱ ndiví naꞌá.
3 Ta ki̱xáꞌá kuee kuee va̱xi noo takuií ñoyívi no̱o̱ ñoꞌo̱.
Ta xa ni̱xi̱no̱ ñii ciento o̱vi̱ si̱ko̱ u̱xu̱ ki̱vi̱ ña va̱xi noo takuií.
4 Ta ki̱vi̱ xa̱ꞌo̱n o̱vi̱ kua̱ꞌa̱n yo̱o̱ u̱xa̱,
ta tón barco xi̱kanóo nó no̱o̱ yuku̱ síkón ñii xiiña xi̱naní Ararat.
5 Ta̱nda̱ ki̱vi̱ no̱ó kua̱ꞌa̱n yo̱o̱ u̱xu̱,
takuií va̱xi noo ka̱ rá,
ta xa va̱ꞌa xi̱to na si̱ni̱ yuku̱ ña síkón ka̱.
6 Ta ni̱yaꞌa o̱vi̱ si̱ko̱ ki̱vi̱,
ta ta̱Noé na̱kuiná ra ventana ini tón barco,
7 ta sa̱ña ra ñii ti̱ka̱ká kua̱ꞌa̱n rí,
ta ni̱xa̱ꞌa̱n rí ta ndi̱kó rí,
ta o̱n vása ní‑kiꞌvi ka̱ rí ini tón barco,
ndákuiti ndáchí rí no̱o̱ takuií ni̱xi̱yo rí,
a̱nda̱ ndoko takuií no̱o̱ ñoꞌo̱.
8 Ta saá ta̱Noé sa̱ña ra ñii sa̱ta kua̱ꞌa̱n rí koto rí án xa yóo ñoꞌo̱ yi̱chí.
9 Ta sa̱ta yóꞌo ndi̱kó rí ndi̱xaa̱ rí,
chi o̱n vása ní‑naníꞌi rí no̱o̱ kanóo rí nakindée rí,
chi no̱o̱ ñoꞌo̱ ndási̱ ní ka̱ ña xíꞌin takuií.
Ta saá ta̱Noé ta̱va ra ndaꞌa̱ ra nakiꞌin ra sa̱ta ña ná ndi̱ꞌvi rí ini tón barco.
10 Ta ta̱Noé xi̱ndati ra inka̱ u̱xa̱ ki̱vi̱,
ta tuku sa̱ña ra sa̱ta kua̱ꞌa̱n rí.
11 Xa ki̱xáꞌá kóni kunaa,
ta ndi̱kó rí nákaa̱ ñii yu̱ku̱ tón olivo teꞌe̱ yuꞌu̱ rí,
ki̱xaa̱ rí.
Ta saá ta̱Noé ku̱nda̱a̱ ini ra ndí xa kua̱ꞌa̱n ndoko takuií no̱o̱ ñoꞌo̱.
12 Ta xi̱ndati ra inka̱ u̱xa̱ ki̱vi̱,
ta tuku sa̱ña ra sa̱ta kua̱ꞌa̱n rí,
ta ni̱‑ndikó ka̱ rí.
13 Ta saá ta̱Noé kómí ra i̱ño̱ ciento ñii kui̱ya̱,
ta xa ndo̱ko takuií no̱o̱ ñoꞌo̱.
Ta ki̱vi̱ no̱ó kíxáꞌá yo̱o̱ no̱ó kui̱ya̱ yóꞌo,
ta̱Noé ki̱ndaa ra ñii táꞌví ña ndási̱ si̱ni̱ tón barco,
ta xi̱ni ra no̱o̱ ñoꞌo̱ xa yi̱chí ña.
14 Ta ki̱vi̱ o̱ko̱ u̱xa̱ kua̱ꞌa̱n yo̱o̱ o̱vi̱ xa ni̱ya̱a̱ ndiꞌi no̱o̱ ñoꞌo̱.
15 Ta saá ni̱ka̱ꞌa̱n Ndios xíꞌin ta̱Noé,
káchí ra:
16 ―Vitin kee ún ini tón barco xíꞌin ñásíꞌí ún,
xíꞌin nasa̱ꞌya ún,
xíꞌin náxa̱no ún.
17 Tava ndiꞌi ún kiti̱ tí ni̱ki̱ꞌvi xíꞌin ún ini tón barco,
ndiꞌi kiti̱ tí kómí ndi̱xi̱n,
ndiꞌi kiti̱ tí xíka no̱o̱ ñoꞌo̱,
ta ndiꞌi kiti̱ tí ñóo ti̱xin xíka no̱o̱ ñoꞌo̱.
Ta kee rí ko̱ꞌo̱n rí ndiꞌi saá xiiña ñoyívi no̱o̱ ñoꞌo̱,
xa̱ꞌa̱ ña kui̱na̱ rí ta kua̱ꞌa̱ ní nduu rí no̱o̱ ñoꞌo̱ ―káchí Ndios.
18 Ta saá ta̱Noé xíꞌin ñásíꞌí ra ta nasa̱ꞌya ra ta náxa̱no ra ke̱e ndiꞌi na ini tón barco.
19 Ta ke̱e ndiꞌi kiti̱ tí xíka no̱o̱ ñoꞌo̱,
ta kiti̱ tí ñóo ti̱xin xíka no̱o̱ ñoꞌo̱,
ta kiti̱ tí kómí ndi̱xi̱n,
ñii ñii no̱o̱ kiti̱ nda̱tán yóo mi̱i rí,
ke̱e ndiꞌi rí.
20 Ta saá ta̱Noé ki̱sa va̱ꞌa ra ñii na̱ma̱ xíꞌin yu̱u̱ no̱o̱ kasa to̱ꞌó ra Ndios.a
Ta no̱o̱ ndiꞌi kiti̱ tí kómí ndi̱xi̱n xíꞌin inka̱ no̱o̱ kiti̱ tí ni̱ka̱ꞌa̱n Ndios va̱ꞌa so̱ko̱ ra,
ta̱Noé na̱ka̱xin ra ndasaá kuiti tí xíni̱ ñóꞌó so̱ko̱ ra,
ta saá xa̱ꞌni ra rí,
ta xa̱ꞌmi ra rí no̱o̱ na̱ma̱ yu̱u̱ yóꞌo ña so̱ko̱ ra rí no̱o̱ Ndios.
21 Ta ni̱xaa̱ siko̱ ña xáꞌan támi no̱o̱ Ndios,
ta sa̱kusii̱ ña ini ra,
ta Ndios ni̱ka̱ꞌa̱n ra xíꞌin mi̱i ra,
káchí ra saá:
“Vará nda̱ válí ni̱vi xa xáni si̱ni̱ na ta xa nákaa̱ ña níma̱ na keꞌé na ña o̱n váꞌa,
ta mi̱i yó nda̱ ñii ki̱vi̱ o̱n sata̱vi̱ chiꞌña tuku yó ñoyívi no̱o̱ ñoꞌo̱ xa̱ꞌa̱ kua̱chi ni̱vi.
O̱n sandiꞌi ka̱ yó xa̱ꞌa̱ ndiꞌi ña táku̱ no̱o̱ ñoꞌo̱.
22 Ta tá yóo ka̱ ñoyívi no̱o̱ ñoꞌo̱,
o̱n vása ndiꞌi ña chíꞌi ni̱vi,
ni o̱n vása ndiꞌi ña nákaya ni̱vi no̱o̱ ñoꞌo̱,
ni o̱n vása ndiꞌi ña vi̱xin xíꞌin ña ñiꞌní,
ni o̱n vása ndiꞌi yo̱o̱ kóon sa̱vi̱ xíꞌin yo̱o̱ ñomí,
ni o̱n vása ndiꞌi ña kúu ndiví xíꞌin ñoó”,
káchí Ndios.