―Vitin ki̱ꞌvi ún ini tón barco xíꞌin ndiꞌi naveꞌe ún.

Saá chi no̱o̱ ndiꞌi ni̱vi na táku̱ ñoyívi no̱o̱ ñoꞌo̱,

ñii la̱á yóꞌó kúu ta̱a ta̱ va̱ꞌa no̱o̱ i̱.

2 Taxi ún ña ki̱ꞌvi ini tón barco ndiꞌi no̱o̱ kiti̱ tí káꞌa̱n i̱ va̱ꞌa so̱ko̱ ndó no̱o̱ i̱,

u̱xa̱ pare ki̱ꞌvi,

u̱xa̱ tíchée xíꞌin u̱xa̱ tísiꞌí ñii ñii no̱o̱ ndiꞌi kiti̱ yóꞌo.

Ta kiti̱ tí o̱n váꞌa so̱ko̱ ndó no̱o̱ i̱,

ñii pare ki̱ꞌvi,

ñii chée xíꞌin ñii siꞌí,

ñii ñii no̱o̱ tíyóꞌo.

3 Ta tuku ki̱ꞌvi u̱xa̱ pare ndiꞌi saá no̱o̱ kiti̱ tí kómí ndi̱xi̱n,

chée xíꞌin siꞌí,

saá keꞌé ún xa̱ꞌa̱ ña ka̱ku ndiꞌi saá no̱o̱ kiti̱ ta o̱n ndiꞌi xa̱ꞌa̱ rí.

4 Chi ti̱xin ña u̱xa̱ ki̱vi̱ vitin sakoon i̱ sa̱vi̱ no̱o̱ ñoꞌo̱,

o̱vi̱ si̱ko̱ ndiví xíꞌin o̱vi̱ si̱ko̱ ñoó sakoon i̱ rá.

Ta saá sandiꞌi i̱ xa̱ꞌa̱ ndiꞌi ña táku̱ ña ki̱sa va̱ꞌa i̱ ñoyívi no̱o̱ ñoꞌo̱ ―káchí Ndios.

5 Ta ta̱Noé ki̱sa ndivi ra nda̱tán yóo ndiꞌi ña xa̱ꞌnda chiño Ndios no̱o̱ ra.

6 Ta ñii ki̱vi̱ ti̱xin kui̱ya̱ ña kómí ta̱Noé i̱ño̱ ciento kui̱ya̱,

ta Ndios sa̱koon ra sa̱vi̱ ndiví naꞌá no̱o̱ ñoꞌo̱.

7 Ta o̱n ta̱ꞌán koon sa̱vi̱,

ta ta̱Noé ni̱ki̱ꞌvi ra ini tón barco xíꞌin ñásíꞌí ra,

xíꞌin nasa̱ꞌya ra,

xíꞌin náxa̱no ra ña saka̱ku xíꞌin mi̱i na no̱o̱ sa̱vi̱ ndiví naꞌá.

8 Kiti̱ tí ni̱ka̱ꞌa̱n Ndios va̱ꞌa so̱ko̱ ni̱vi no̱o̱ ra,

xíꞌin kiti̱ tí o̱n váꞌa so̱ko̱ na,

xíꞌin kiti̱ tí kómí ndi̱xi̱n xíꞌin kiti̱ tí ñóo ti̱xin xíka no̱o̱ ñoꞌo̱,

9 ni̱nde̱e ndiꞌi rí xíꞌin ta̱Noé ini tón barco,

o̱vi̱ o̱vi̱ rí,

ñii chée xíꞌin ñii siꞌí,

ni̱nde̱e rí nda̱tán yóo ña ni̱ka̱ꞌa̱n Ndios xíꞌin ra.

10 Ta ni̱yaꞌa u̱xa̱ ki̱vi̱,

ta ki̱xáꞌá kóon ní sa̱vi̱,

ta va̱xi nakutú takuií no̱o̱ ñoꞌo̱.

11 Táꞌan mií saá ta̱Noé kómí ra i̱ño̱ ciento kui̱ya̱,

ta tá ki̱vi̱ xa̱ꞌo̱n o̱vi̱ kua̱ꞌa̱n yo̱o̱ o̱vi̱,

tá mií ki̱vi̱ yóꞌo chútú takuií no̱o̱ kónó no̱o̱ ñoꞌo̱,

ta ka̱nakoo rá no̱o̱ ñoꞌo̱,

ta ni̱xo̱na̱ ñoyívi síkón,

ta ki̱xáꞌá kóyo takuií no̱o̱ ñoꞌo̱.

12 O̱vi̱ si̱ko̱ ndiví ta o̱vi̱ si̱ko̱ ñoó kóon sa̱vi̱ ndiví naꞌá no̱o̱ ñoꞌo̱.

13 Ta siꞌa ni̱xi̱yo ki̱vi̱ ni̱ki̱ꞌvi ta̱Noé ini tón barco xíꞌin ñásíꞌí ra,

xíꞌin sa̱ꞌya ra ta̱Sem,

xíꞌin ta̱Cam xíꞌin ta̱Jafet,

xíꞌin u̱ni̱ xa̱no ra.

14 Ta ni̱nde̱e ndiꞌi saá no̱o̱ kiti̱ xíꞌin na,

ñii ñii no̱o̱ kiti̱ nda̱tán yóo mi̱i rí,

kiti̱ tíyukú,

kiti̱ títa̱ta̱,

xíꞌin kiti̱ tí ñóo ti̱xin xíka no̱o̱ ñoꞌo̱,

xíꞌin kiti̱ tí kómí ndi̱xi̱n.

15 Saá chi ki̱xaa̱ ndiꞌi no̱o̱ kiti̱ no̱o̱ ta̱Noé,

ta o̱vi̱ o̱vi̱ rí ki̱xaa̱,

ta ni̱nde̱e rí xíꞌin ta̱Noé ini tón barco.

16 Ni̱ki̱ꞌvi ñii chée xíꞌin ñii siꞌí ndiꞌi saá no̱o̱ kiti̱ yóꞌo,

ñii ki̱ꞌva nda̱tán yóo ña xa̱ꞌnda chiño Ndios no̱o̱ ta̱Noé.

Ta saá Ndios na̱kasi ra yéꞌé tón barco.

17 Ta sa̱vi̱ ndiví naꞌá kóon rá o̱vi̱ si̱ko̱ ki̱vi̱.

Ta chútú takuií ndiꞌi no̱o̱ ñoꞌo̱,

ta tón barco ki̱xáꞌá nákanóo nó ni̱no no̱o̱ takuií.

18 Ta ki̱xáꞌá takuií ndeé ní kua̱ꞌa̱n ndaa ka̱ rá,

ta tón barco kánóo nó no̱o̱ takuií.

19 Ta takuií kua̱ꞌa̱n ndaa ka̱ rá,

ta na̱kasi ndiꞌi rá nda̱ si̱ni̱ yuku̱ ña síkón ka̱ ñoyívi yóꞌo.

20 Ta na̱kasi ndiꞌi rá nda̱ si̱ni̱ yuku̱,

ta̱nda̱ ni̱yaꞌa rá u̱xa̱ metro ña síkón ka̱ no̱o̱ ndiꞌi yuku̱.

21 Ta saá ni̱xiꞌi̱ ndiꞌi ni̱vi na xi̱taku̱ ñoyívi yóꞌo,

ta ndiꞌi kiti̱ tí kómí ndi̱xi̱n,

ta ndiꞌi kiti̱ títa̱ta̱ xíꞌin tíyukú,

ta ndiꞌi kiti̱ tí ñóo ti̱xin xíka no̱o̱ ñoꞌo̱,

ni̱xiꞌi̱ ndiꞌi rí.

22 Ta ndixa ni̱xiꞌi̱ ndiꞌi ni̱vi ta ni̱xiꞌi̱ ndiꞌi kiti̱ tí xi̱taku̱ no̱o̱ ñoꞌo̱ yi̱chí.

23 Saá ndi̱ꞌi xa̱ꞌa̱ ndiꞌi ña táku̱;

ndiꞌi ni̱vi,

xíꞌin ndiꞌi kiti̱ tí xíka no̱o̱ ñoꞌo̱,

xíꞌin kiti̱ tí kómí ndi̱xi̱n,

xíꞌin ndiꞌi kiti̱ tí ñóo ti̱xin xíka no̱o̱ ñoꞌo̱,

ndi̱ꞌi xa̱ꞌa̱ ndiꞌi ña.

O̱n ko̱ó ka̱ nda̱ ñii ña ni̱ndo̱o ñoyívi no̱o̱ ñoꞌo̱.

Ndasaá ta̱Noé xíꞌin ni̱vi ta xíꞌin kiti̱ ni̱ki̱ꞌvi xíꞌin ra ini tón barco táku̱.

24 Chi no̱o̱ ñoꞌo̱ xi̱nda̱si̱ ndiꞌi ña xíꞌin takuií sa̱vi̱ ñii ciento o̱vi̱ si̱ko̱ u̱xu̱ ki̱vi̱.