Ñayóꞌo káꞌa̱n xa̱ꞌa̱ ta̱Caín xíꞌin ta̱Abel
4
Ta ta̱Adán ni̱ki̱si̱n ra xíꞌin ñásíꞌí ra ñáEva,
ta ni̱ke̱e sa̱ꞌya ñá,
ta ka̱ku sa̱ꞌya na,
ta chi̱nóo na ki̱vi̱ ra,
na̱ní ra Caín.a
Ta ni̱ka̱ꞌa̱n ñáEva saá:
“Ndios chi̱ndeé ra yi̱ꞌi̱,
ta xa yóo ñii ta̱a sa̱ꞌya i̱.”
2 Ta saá ni̱yaꞌa,
ta ka̱ku inka̱ sa̱ꞌya ñá,
ta chi̱nóo na ki̱vi̱ ra,
na̱ní ra Abel,
ñani ta̱Caín kúu ra.
Ta saá xa̱ꞌno nata̱a yóꞌo,
ta ta̱Abel xi̱kuu ta̱a ta̱ xi̱ndaa ta sa̱kui̱na̱ ra ndikachi,
ta ta̱Caín xi̱kuu ta̱a ta̱ ki̱sa chiño no̱o̱ ñoꞌo̱.
3 Ta saá ñii ki̱vi̱ ta̱Caín xa̱ꞌnda ra loꞌo ña ni̱xi̱no̱ no̱o̱ ña chi̱ꞌi ra no̱o̱ ñoꞌo̱,
ta ke̱e ra kua̱ꞌa̱n ra ta ni̱so̱ko̱ ra ña no̱o̱ Ndios.
4 Ta saá ta̱Abel ke̱e ra kua̱ꞌa̱n ra ta ni̱so̱ko̱ ra ndikachi tíno̱ó no̱o̱ ndiꞌi kiti̱ sa̱na̱ ra,
tí nduꞌu̱ ní kúu rí.
Ta Ndiosb ku̱sii̱ ní ini ra xi̱ni ra ta̱Abel xíꞌin ña ni̱so̱ko̱ ra,
5 ta o̱n vása ní‑kusii̱ ini Ndios xi̱ni ra ta̱Caín xíꞌin ña ni̱so̱ko̱ ra.
Ta saá ta̱Caín ndeé ní ni̱saa̱ ini ra,
ta kini ní na̱koto no̱o̱ ra.
6 Ta ni̱ka̱ꞌa̱n Ndios xíꞌin ta̱Caín,
káchí ra saá:
―¿Nda̱chun sáa̱ ní ini ún,
ta kini ní nákoto no̱o̱ ún?
7 Tá ñava̱ꞌa kéꞌé ún,
¿án o̱n ndixa kusii̱ ini i̱ koni i̱ yóꞌó,
níkúu?
Tá o̱n vása kéꞌé ún ñava̱ꞌa,
ta xa yóo ña o̱n váꞌa kaꞌnda chiño ña no̱o̱ níma̱ ún.
Ta saá ni,
xíni̱ ñóꞌó kaꞌnda chiño ún no̱o̱ ña o̱n váꞌa ña o̱n taxi ún kaꞌnda chiño ñayóꞌo no̱o̱ ún ―káchí Ndios xíꞌin ra.
8 Ñii ki̱vi̱ ta̱Caín ni̱ka̱ꞌa̱n ra xíꞌin ñani ra ta̱Abel,
káchí ra saá:
―Ñani i̱,
naꞌa koꞌyo̱ yuku̱ vitin ―káchí ra.
Ta saá ke̱e o̱vi̱ ra saá kua̱ꞌa̱n ra,
ta tá ñóꞌo o̱vi̱ ra saá yuku̱,
ta ta̱Caín xa̱ndi̱ko̱n ka̱ni ra ñani ra ta̱Abel,
ta xa̱ꞌni ñaꞌá ra.
9 Ta ndi̱ꞌi ñayóꞌo,
ta saá Ndios ni̱nda̱ka̱ to̱ꞌon ra ta̱Caín:
―¿Míkía̱ yóo ñani ún ta̱Abel?
Ta nda̱kuii̱n ta̱Caín,
káchí ra saá:
―O̱n vása xíni̱ i̱.
¿Án yi̱ꞌi̱ kúu ta̱a ta̱ ndáa ñani i̱?
―káchí ra.
10 Ta ni̱ka̱ꞌa̱n Ndios,
káchí ra saá:
―¿Yu kúu ña ke̱ꞌé ún yóꞌo?
Saá chi ni̱i̱ ñani ún ña xa̱ta ún no̱o̱ ñoꞌo̱ kána ña yi̱ꞌi̱ ña kasa nani i̱ xa̱ꞌa̱ ña xa̱ꞌni ún ra.
11 Ta vitin ta̱a ta̱ ni̱tavi chiꞌña kúu ún no̱o̱ ñoꞌo̱ no̱o̱ xa̱ta ún ni̱i̱,
chi ñoꞌo̱ xi̱ꞌi ña ni̱i̱ ñani ún ta̱ xa̱ꞌni ún.
12 Ta xa̱ꞌa̱ ñayóꞌo,
vará kasa chiño ún no̱o̱ ñoꞌo̱,
ta saá ni,
loꞌo ní ña taxi ña kaxi ún.
Ta̱a ta̱ kaka naꞌá ñoyívi no̱o̱ ñoꞌo̱ kuu ún,
nda̱ ñii ki̱vi̱ o̱n vása kukomí ún veꞌe ún ―káchí Ndios xíꞌin ta̱Caín.
13 Ta saá ta̱Caín nda̱kuii̱n ra,
káchí ra saá xíꞌin Ndios:
―Tata,
o̱n kívi kundeé ini i̱ no̱o̱ ña ndeé ní saxo̱ꞌvi̱ ún yi̱ꞌi̱ saá.
14 Saá chi táva ún yi̱ꞌi̱ no̱o̱ ñoꞌo̱ yóꞌo,
ña kee i̱ ko̱ꞌo̱n i̱ xíká no̱o̱ ún,
ta ta̱a ta̱ kaka naꞌá ñoyívi yóꞌo kuu i̱,
ta saá a̱nda̱ yu kúu na nakutáꞌan xíꞌin i̱,
ta kaꞌni na yi̱ꞌi̱ ―káchí ra.
15 Ta Ndios nda̱kuii̱n ra,
káchí ra saá:
―Tá ñii ni̱vi kaꞌni yóꞌó,
ta saxo̱ꞌvi̱ i̱ ni̱vi yóꞌo u̱xa̱ yichi̱ ka̱ no̱o̱ ña saxo̱ꞌvi̱ i̱ yóꞌó ―káchí Ndios xíꞌin ra.
Ta Ndios xa̱ki̱n ra marca ta̱Caín,
ta nda̱ yu kúu ni̱vi na nakutáꞌan xíꞌin ra ta o̱n kaꞌni na ra.
16 Ta saá ke̱e ta̱Caín kuxíká ra no̱o̱ Ndios ta kua̱ꞌa̱n ra,
ta ni̱xaa̱ ra xi̱koo ra ñii xiiña na̱ní Nod,c
ña nákaa̱ chí no̱o̱ va̱xi kana ño̱ꞌo no̱o̱ na̱ní Edén.
17 Ta saá ta̱Caín ni̱ki̱si̱n ra xíꞌin ñásíꞌí ra,
ta ni̱ke̱e sa̱ꞌya ñá,
ta ka̱ku sa̱ꞌya na,
ta chi̱nóo na ki̱vi̱ ra,
na̱ní ra Enoc.
Ta ta̱Caín ki̱sa va̱ꞌa ra ñii ñoo káꞌno,
ta chi̱nóo ra ki̱vi̱ ña na̱ní ña Enoc,
nda̱tán na̱ní sa̱ꞌya ra.
18 Ta saá ta̱Enoc xi̱kuu yivá ta̱Irad.
Ta ta̱Irad xi̱kuu yivá ta̱Mehujael,
ta ta̱Mehujael xi̱kuu yivá ta̱Metusael,
ta ta̱yóꞌo xi̱kuu yivá ta̱Lamec.
19 Ta ta̱Lamec xi̱komí ra o̱vi̱ násíꞌí ra;
ñii ñá xi̱naní Ada,
ta inka̱ ñá xi̱naní Zila.
20 ÑáAda ka̱ku sa̱ꞌya ñá xi̱naní ra Jabal,
ta ta̱yóꞌo xi̱kuu xi̱i̱ síkuá ni̱vi na táku̱ veꞌe mandiado,
ta sákui̱na̱ na kiti̱ sa̱na̱ na.
21 Ta ta̱Jabal ni̱xi̱yo ñii ñani ra xi̱naní ra Jubal,
ta xi̱kuu ra xi̱i̱ síkuá ni̱vi na sákáꞌa arpa xíꞌin ni̱vi na tívi tila̱lí.
22 Ta saá ñáZila ka̱ku sa̱ꞌya ñá ta̱Tubal‑caín,
ta xi̱kuu ra ta̱a ta̱ kísa va̱ꞌa ndiꞌi saá no̱o̱ ndaꞌa̱ chiño,
ta xíni̱ ñóꞌó ra ka̱a ña kúu bronce ta ka̱a ña kúu hierro xa̱ꞌa̱ ñayóꞌo.
Ta ta̱Tubal‑caín ni̱xi̱yo ñii ki̱ꞌva̱ ra xi̱naní ñá Naama.
23 Ta ki̱xaa̱ ñii ki̱vi̱ ta ta̱Lamec ni̱ka̱ꞌa̱n ra xíꞌin o̱vi̱ násíꞌí ra ñáAda xíꞌin ñáZila,
káchí ra saá:
¡Koni̱ so̱ꞌo va̱ꞌa ndó ña káꞌa̱n i̱ xíꞌin ndó!
Tá koo ñii ta̱a ta satakuéꞌe̱ ra yi̱ꞌi̱,
ta yi̱ꞌi̱ kaꞌni i̱ ta̱yóꞌo,
tá koo ñii ta̱loꞌo ta kuiti kani ra yi̱ꞌi̱,
ta yi̱ꞌi̱ kaꞌni i̱ ta̱loꞌo yóꞌo.
24 “Tá ñii ta̱a ná kaꞌni ra ta̱Caín,
ta xo̱ꞌvi̱ ka̱ ra u̱xa̱ yichi̱”,
saá ka̱chí Ndios.
Ta yi̱ꞌi̱ káchí i̱ saá:
Tá ñii ta̱a ná kaꞌni ra yi̱ꞌi̱,
ta nda̱ ñii yichi̱ o̱n ndiꞌi ña xo̱ꞌvi̱ ta̱yóꞌo,
chi xo̱ꞌvi̱ ní ka̱ ra no̱o̱ ta̱a ta̱ kaꞌni ta̱Caín,
káchí ta̱Lamec.
25 Tuku ni̱ki̱si̱n ta̱Adán xíꞌin ñásíꞌí ra,
ta ñáyóꞌo ni̱ke̱e inka̱ sa̱ꞌya ñá,
ta ka̱ku ñii ta̱loꞌo,
ta chi̱nóo na ki̱vi̱ ra,
na̱ní ra Set,d
ta káchí ñáEva saá:
“Ndios ta̱xi ra inka̱ sa̱ꞌya i̱ ndaꞌa̱ i̱ no̱o̱ ta̱Abel ta̱ ni̱xiꞌi̱,
ke̱ꞌé ta̱Caín.”
26 Ta ni̱yaꞌa kui̱ya̱,
ta saá ta̱Set ni̱xi̱yo ñii sa̱ꞌya ra ta sa̱kunaní ñaꞌá ra Enós.
Ta ki̱vi̱ ña táku̱ ta̱Enós,
ki̱xáꞌá ni̱vi káꞌa̱n na xíꞌin Ndios ta kísa káꞌno na ra.