Ñayóꞌo káꞌa̱n xa̱ꞌa̱ ndasaá ki̱sa toon ni̱vi no̱o̱ Ndios chi ni̱‑xiin na chikaa̱ so̱ꞌo na to̱ꞌon ra
3
Ta tíko̱o̱ kúu tí máñá ka̱ no̱o̱ ndiꞌi kiti̱ tíyukú tí ki̱sa va̱ꞌa Ndios,
ta ni̱nda̱ka̱ to̱ꞌon rí ñáñaꞌa̱,
káchí rí saá xíꞌin ñá:
―¿Án ñanda̱a̱ kía̱ ni̱ka̱ꞌa̱n Ndios xíꞌin ndó,
o̱n váꞌa kaxi ndó kui̱ꞌi yóo ndaꞌa̱ nda̱ ñii yito̱n yóꞌo?
―káchí rí xíꞌin ñá.
2 Ta nda̱kuii̱n ñá,
káchí ñá saá xíꞌin tíko̱o̱:
―Ndios ka̱chí ra va̱ꞌa kaxi ndi̱ kui̱ꞌi yóo ndiꞌi saá ndaꞌa̱ yito̱n yóꞌo.
3 Ta ñii la̱á tón ñíndichi ma̱ꞌñó ndiꞌi tón yito̱n yóꞌo,
o̱n váꞌa kaxi ndi̱ kui̱ꞌi nó.
Táná kaxi ndi̱ kui̱ꞌi yóo ndaꞌa̱ tón yóꞌo,
án ná to̱nda̱a ndaꞌa̱ ndi̱ kui̱ꞌi yóꞌo,
ta kivi̱ ndi̱,
ka̱chí Ndios xíꞌin ndi̱ ―káchí ñá xíꞌin tíko̱o̱.
4 Ta káchí tíko̱o̱ saá xíꞌin ñá:
―¡O̱n ndixa!
O̱n vása kivi̱ ndó.
5 Ndios xíni̱ va̱ꞌa ra táná kaxi ndó kui̱ꞌi yóo ndaꞌa̱ tón yóꞌo,
ta kunda̱a̱ ini ndó koni̱ ndó ñava̱ꞌa ta koni̱ ndó ña o̱n váꞌa,
ta nda̱tán yóo Ndios,
saá koo ndó ―káchí tíko̱o̱ xíꞌin ñá.
6 Ta na̱koto ndaa ñá kui̱ꞌi ndaꞌa̱ yito̱n yóꞌo,
ta xa̱ni si̱ni̱ ñá livi ní náꞌa rí,
ta va̱ꞌa ní rí kaxi ñá,
ta ndeé ní kútoo ñá kaxi ñá rí xa̱ꞌa̱ ña kukomí ñá ñandíchí,
ña kunda̱a̱ ini ñá xa̱ꞌa̱ ñava̱ꞌa ta kunda̱a̱ ini ñá xa̱ꞌa̱ ña o̱n váꞌa.
Ta xa̱ꞌnda ñá rí,
ta xa̱xi ñá rí.
Ta ta̱xi ñá ndaꞌa̱ yii̱ ñá ta̱ ñíndichi xíꞌin ñá,
ta xa̱xi ra rí.
7 Ta xa̱ndi̱ko̱n ku̱nda̱a̱ ini na ndí o̱n váꞌa ke̱ꞌé na,
ta na̱koni na ndí ni̱vi yálá kúu na.
Ta xa̱ꞌnda na yu̱ku̱ ndaꞌa̱ tón higo,
ta ni̱ku̱ku na ña,
ta na̱kasi xíꞌin mi̱i na.
8 Ta xikuaa ki̱xáꞌá xíka ta̱chi̱,
ta xi̱ni̱ so̱ꞌo na xíka Ndios no̱o̱ yóo yito̱n tón ta̱ta̱;
ta xi̱no na xi̱koo seꞌé na ma̱ꞌñó yito̱n yóꞌo,
ko̱to̱ koni Ndios na.
9 Ta ni̱ka̱ꞌa̱n Ndiosa ka̱na ra ta̱Adán,
káchí ra saá:
―¿Míkía̱ yóo ún?
10 Ta saá nda̱kuii̱n ta̱yóꞌo,
káchí ra:
―Tata Ndios,
xi̱ni̱ so̱ꞌo i̱ ta̱chi̱ ún xíka ún no̱o̱ yóo tón ta̱ta̱ yóꞌo,
ta ni̱yi̱ꞌví ní i̱ no̱o̱ ún chi yóo yálá i̱,
ña̱kán xi̱koo seꞌé i̱ ―káchí ta̱Adán.
11 Ta ni̱nda̱ka̱ to̱ꞌon Ndios ra:
―¿Yo ni̱ka̱ꞌa̱n xíꞌin ún yóo yálá ún?
¿Án xa̱xi ún kui̱ꞌi ndaꞌa̱ yito̱n tón ni̱ka̱ꞌa̱n i̱ xíꞌin ún,
o̱n kaxi ún kui̱ꞌi ndaꞌa̱?
―káchí Ndios.
12 Ta nda̱kuii̱n ta̱yóꞌo,
káchí ra saá xíꞌin Ndios:
―Ñaꞌa̱ ñá ta̱xi ún ndaꞌa̱ i̱ kutaku̱ xíꞌin i̱,
ta̱xi ñá kui̱ꞌi ndaꞌa̱ i̱,
ta xa̱xi i̱ rí ―káchí ra.
13 Ta saá Ndios ni̱nda̱ka̱ to̱ꞌon ra ñáñaꞌa̱ yóꞌo:
―¿Yukía̱ ke̱ꞌé ún?
Ta nda̱kuii̱n ñá,
káchí ñá saá xíꞌin Ndios:
―Tata Ndios,
tíko̱o̱ kúu tí sa̱ndáꞌví yi̱ꞌi̱,
ña̱kán xa̱xi i̱ kui̱ꞌi ―káchí ñá.
14 Ta saá Ndios ni̱ka̱ꞌa̱n ra,
káchí ra saá xíꞌin tíko̱o̱:
Xa̱ꞌa̱ ña sa̱ndáꞌví ún ni̱vi yóꞌo,
tí ni̱tavi chiꞌña ka̱ kúu yóꞌó no̱o̱ ndiꞌi kiti̱ títa̱ta̱ xíꞌin tíyukú.
Ta vitin kuñoo ún ti̱xin ún kaka ún no̱o̱ ñoꞌo̱,
ta kaxi ún yaa̱ ñoꞌo̱ ndiꞌi saá ki̱vi̱ ña kutaku̱ ún.
15 Ta chindúꞌu̱ i̱ ndí yóꞌó xíꞌin ñaꞌa̱ o̱n kuaꞌa ndó koni táꞌan ndó,
ta ñii ki̱ꞌva saá koo ña xíꞌin sa̱ꞌya ñani síkuá ndó.
Ta sa̱ꞌya ñani síkuá ñaꞌa̱ ndukú na kundo̱so na si̱ni̱ sa̱ꞌya ñani síkuá ún,
ta sa̱ꞌya ñani síkuá ún ndukú rí kaxi rí xa̱ꞌa̱ sa̱ꞌya ñani síkuá ñaꞌa̱,
káchí Ndios xíꞌin tíko̱o̱.
16 Ta tuku ni̱ka̱ꞌa̱n Ndios,
káchí ra saá xíꞌin ñaꞌa̱:
Chindúꞌu̱ i̱ ña ndeé ní kukiꞌvi̱ ún tá ñóꞌo sa̱ꞌya ún,
ta ndeé ní xo̱ꞌvi̱ ún tá káku sa̱ꞌya ún.
Ta saá ni,
kusii̱ ini ún koo ún xíꞌin yii̱ ún,
ta yii̱ ún kaꞌnda chiño ra no̱o̱ ún,
káchí ra xíꞌin ñaꞌa̱.
17 Ta ni̱ka̱ꞌa̱n Ndios,
káchí ra saá xíꞌin ta̱a:
Xa̱ꞌa̱ ña ka̱ndixa ún ña ni̱ka̱ꞌa̱n ñásíꞌí ún xíꞌin ún,
ta xa̱xi ún kui̱ꞌi tí ni̱ka̱ꞌa̱n i̱ o̱n váꞌa kaxi ún,
ta ña ni̱tavi chiꞌña kúu ñoꞌo̱ ndiꞌi saá ki̱vi̱.
Ta kutaku̱ ún xíꞌin ña ndeé ní xo̱ꞌvi̱ ún kasa chiño ún no̱o̱ ñoꞌo̱ xa̱ꞌa̱ ña koo ña kaxi ún.
18 Ta no̱o̱ ñoꞌo̱ no̱o̱ kasa chiño ún,
ndu̱ta̱ ndiꞌi saá no̱o̱ ñiño̱,
ta kaxi ún yiva kuíi̱ ña ndu̱ta̱ yu̱ku̱.
19 Xa̱ꞌa̱ ña koo ña kaxi ún,
ndeé ní kasa chiño ún a̱nda̱ kutakaa̱ táti̱i̱n no̱o̱ ún.
Saá koo a̱nda̱ kixaa̱ ki̱vi̱ ña kivi̱ ún,
ta tuku ndikó ún nduu ún yaa̱ ñoꞌo̱,
chi xíꞌin yaa̱ ñoꞌo̱ ku̱va̱ꞌa ún,
káchí Ndios xíꞌin ra.
20 Ta ta̱Adánb sa̱kunaní ra ñásíꞌí ra Eva,c
chi siꞌí ndiꞌi ni̱vi na kutaku̱ ñoyívi kuu ñáyóꞌo.
21 Ta Ndios ki̱sa va̱ꞌa ra tiko̱to̱ xíꞌin ñii̱ tíkiti̱ ña kundixin na no̱o̱ ñayálá yi̱kí ko̱ñu na,
ta saá sa̱kundixin ra na xíꞌin ñayóꞌo.
22 Ta ni̱ka̱ꞌa̱n Ndios,
káchí ra saá:
“Vitin ni̱vi yóꞌo xa ndu̱u na nda̱tán yóo mi̱i yó,
xíni̱ na ñava̱ꞌa ta xíni̱ na ña o̱n váꞌa.
Ta yóo ñii yito̱n ma̱ꞌñó tón ta̱ta̱ tón taxi ña kutaku̱ ni̱vi ndiꞌi saá ki̱vi̱ ña va̱xi,
ta o̱n kivi̱ na.
O̱n vása va̱ꞌa to̱nda̱a ndaꞌa̱ na kaꞌnda na kui̱ꞌi tón yóꞌo,
ta kaxi na,
ta kutaku̱ na ndiꞌi saá ki̱vi̱ ña va̱xi”,
káchí Ndios.
23 Ta saá Ndios ta̱va ra ta̱Adán xíꞌin ñásíꞌí ra no̱o̱ yóo tón ta̱ta̱ no̱o̱ na̱ní Edén,
ña kua̱ꞌa̱n na ta kasa chiño ta̱yóꞌo no̱o̱ ñoꞌo̱,
saá chi xíꞌin yaa̱ ñoꞌo̱ ku̱va̱ꞌa ta̱a.
24 Ndios ta̱va ra nayóꞌo no̱o̱ na̱ní Edén,
ta sa̱kuita ra naángel na̱ní na querubín ñii xiiña sii̱n chí no̱o̱ va̱xi kana ño̱ꞌo.
Ta yatin no̱o̱ yóo naángel,
ka̱ni ndichi ra espada ña náyeꞌe táxa nda̱tán yóo ña xíxi̱,
ta káva tíkui̱ta̱ ña ndiꞌi saá xiiña,
ña ndáa ña yichi̱ kua̱ꞌa̱n ki̱ꞌvi no̱o̱ yóo yito̱n tón taxi kutaku̱ ni̱vi ndiꞌi saá ki̱vi̱ ña va̱xi.