4 Ñayóꞌo tuku ndáto̱ꞌon xa̱ꞌa̱ ndasaá ku̱va̱ꞌa ñoyívi síkón xíꞌin ñoyívi yóꞌo.

Ki̱vi̱ Ndios^a ki̱sa va̱ꞌa ra ñoyívi yóꞌo xíꞌin ñoyívi síkón,

5 ta o̱n ta̱ꞌán ka̱ koo yu̱ku̱ kuíi̱ xíꞌin yiva,

ni o̱n ta̱ꞌán ka̱ ndu̱ta̱ ña,

chi Ndios o̱n ta̱ꞌán sakoon ra sa̱vi̱ no̱o̱ ñoꞌo̱,

ni o̱n ta̱ꞌán koo ni̱vi na kasa chiño no̱o̱ ñoꞌo̱.

6 Ta kuiti xi̱kanakoo yo̱ko̱ no̱o̱ ñoꞌo̱,

ta ñayóꞌo xi̱koso̱ ndiꞌi ña no̱o̱ ñoꞌo̱.

7 Ta xíꞌin yaa̱ ñoꞌo̱ Ndios ki̱sa va̱ꞌa ra ñii ta̱a,

ta xíꞌin ta̱chi̱ ra ke̱e yuꞌu̱ ra ti̱vi ra si̱ti̱n ta̱yóꞌo,

ta saá ndu̱u ra ta̱a ta̱ táku̱,

saá ke̱ꞌé Ndios.

8 Ta xa ki̱sa ndivi Ndios ñii xiiña no̱o̱ xa na̱taan ra kua̱ꞌa̱ ní tón yito̱n,

ta xiiña yóꞌo na̱ní ña Edén,

ña nákaa̱ chí no̱o̱ va̱xi kana ño̱ꞌo,

ta Ndios chi̱ndúꞌu̱ ra ta̱a ta̱ ki̱sa va̱ꞌa ra ña kutaku̱ ra Edén yóꞌo.

9 Ta sa̱kuaꞌno Ndios ndiꞌi saá no̱o̱ yito̱n tón livi ní,

tón kóon kui̱ꞌi ndaꞌa̱ kaxi ta̱a.

Ta ma̱ꞌñó ndiꞌi tón yito̱n ta̱ta̱ yóꞌo,

ñíndichi ñii yito̱n tón ta̱ta̱ tón taxi kutaku̱ ni̱vi ndiꞌi saá ki̱vi̱ ña va̱xi,

ta ñíndichi inka̱ yito̱n tón ta̱ta̱ tón taxi kunda̱a̱ ini ni̱vi yu kúu ñava̱ꞌa,

ta yu kúu ña o̱n váꞌa.

10 No̱o̱ na̱ní Edén ka̱ku ñii yu̱ta ña kómí kua̱ꞌa̱ ní takuií,

ta takuií yóꞌo kóso̱ rá ndiꞌi no̱o̱ yóo yito̱n tón ta̱ta̱.

Nda̱ Edén na̱ta̱ꞌvi̱ yu̱ta ndu̱u ña ko̱mi̱ yu̱ta.

11 Yu̱ta no̱ó na̱ní Pisón,

ta kua̱ꞌa̱n yu̱ta yóꞌo yáꞌa ña no̱o̱ na̱ní Havila,

no̱o̱ ñóꞌo ñaoro.

12 Ta ñaoro yóꞌo ña va̱ꞌa ní kúu ña;

ta Havila yóꞌo ñóꞌo yu̱u̱ ña livi ní ña na̱ní ónice,

ta yóo xuxa va̱ꞌa ña xáꞌan támi.

13 Yu̱ta o̱vi̱ na̱ní Gihón,

ta kua̱ꞌa̱n yu̱ta yóꞌo yáꞌa ña no̱o̱ na̱ní Cus.

14 Yu̱ta u̱ni̱ na̱ní Tigris,^b

ta kua̱ꞌa̱n yu̱ta yóꞌo yáꞌa ña sii̱n ñii xiiña no̱o̱ ñoꞌo̱ Asiria,

ta sii̱n yóꞌo kíndo̱o ña chí no̱o̱ va̱xi kana ño̱ꞌo.

Yu̱ta ko̱mi̱ na̱ní Éufrates.

15 Ta chi̱ndúꞌu̱ Ndios ta̱a ta̱ ki̱sa va̱ꞌa ra no̱o̱ yóo yito̱n tón ta̱ta̱ no̱o̱ na̱ní Edén,

ña kundaa ra ta kasa ndivi ra xíꞌin ndiꞌi ña yóo yóꞌo ña kuaꞌno ña.

16 Ta xa̱ꞌnda chiño Ndios,

káchí ra saá xíꞌin ta̱a yóꞌo:

―Táxi i̱ ña kuchiño ún kaxi ún kui̱ꞌi ndaꞌa̱ ndiꞌi saá yito̱n yóꞌo.

17 Ta ñii la̱á yito̱n tón taxi ña kunda̱a̱ ini ni̱vi ñava̱ꞌa ta kunda̱a̱ ini na ña o̱n váꞌa,

o̱n kaxi ún kui̱ꞌi ña yóo ndaꞌa̱ nó.

Chi táná kaxi ún kui̱ꞌi ña yóo ndaꞌa̱ tón yóꞌo,

ta ndixa kivi̱ ún ―káchí Ndios xíꞌin ra.

18 Ta tuku ni̱ka̱ꞌa̱n Ndios,

káchí ra saá:

“O̱n vása va̱ꞌa koo matóꞌón ta̱a yóꞌo.

Ta va̱ꞌa kasa va̱ꞌa yó ñii ñaꞌa̱ ñá xíni̱ ñóꞌó ra,

ñá chindeé ñaꞌá ta kutaku̱ ñá xíꞌin ra”,

káchí Ndios.

19 Xíꞌin yaa̱ ñoꞌo̱ xa ki̱sa va̱ꞌa Ndios ndiꞌi no̱o̱ kiti̱ tí xíka no̱o̱ ñoꞌo̱ yi̱chí xíꞌin ndiꞌi no̱o̱ kiti̱ tí kómí ndi̱xi̱n.

Ta Ndios sa̱yaꞌa ra ndiꞌi kiti̱ yóꞌo no̱o̱ ta̱Adán xa̱ꞌa̱ ña koni ra rí ta chinóo ra ki̱vi̱ ñii ñii no̱o̱ kiti̱ yóꞌo.

Nda̱tán yóo ña sa̱kunaní ra rí,

saá yóo ki̱vi̱ rí.

20 Na̱ka̱xin ta̱yóꞌo ndasaá kunaní kiti̱ títa̱ta̱ nda̱tán yóo ñii ñii no̱o̱ rí,

ta ndasaá kunaní kiti̱ tíyukú nda̱tán yóo ñii ñii no̱o̱ rí,

ta ndasaá kunaní kiti̱ tí kómí ndi̱xi̱n,

nda̱tán yóo ñii ñii no̱o̱ rí.

Ta saá ni,

o̱n ta̱ꞌán koo ñii ñaꞌa̱ ñá xíni̱ ñóꞌó ta̱Adán,

ñá kuu ñá chindeé ñaꞌá ta kutaku̱ ñá xíꞌin ra.

21 Ta saá Ndios ta̱xi ra maꞌná ta sa̱kusu̱n náꞌná ra ta̱Adán.

Tá mií kísi̱n ta̱Adán,

ta Ndios ta̱va ra ñii yi̱kí kándíká ta̱yóꞌo,

ta saá na̱kasi ra ta sa̱ndaꞌa ra no̱o̱ ke̱e yi̱ki̱ yóꞌo.

22 Xíꞌin yi̱kí kándíká ta̱Adán ki̱sa va̱ꞌa Ndios ñii ñaꞌa̱,

ta ta̱xi Ndios ñáyóꞌo ndaꞌa̱ ra.

23 Ta ta̱Adán xi̱ni ra ñaꞌa̱ yóꞌo,

ta ni̱ka̱ꞌa̱n ra,

káchí ra saá:

24 Ta saá ñii ta̱a sandakoo ra yivá ra ta sandakoo ra siꞌí ra ña tonda̱ꞌa̱ ra xíꞌin ñásíꞌí ra,

ta na o̱vi̱ yóꞌo nduu na ñii ni̱vi.

25 Ta ta̱Adán xíꞌin ñásíꞌí ra táku̱ yálá na,

ta o̱n vása kúkaꞌan no̱o̱ na no̱o̱ táꞌan na.