Tutu ñano̱ó ña ni̱taa ta̱Moisés, ña na̱ní GÉNESIS
Ñayóꞌo káꞌa̱n xa̱ꞌa̱ ndasaá ki̱sa va̱ꞌa Ndios ñoyívi yóꞌo xíꞌin ndiꞌi ñoyívi síkón
1
Tá o̱n ta̱ꞌán ka̱ kixáꞌá koo ña̱ꞌa,
Ndios ki̱xáꞌá ra ki̱sa va̱ꞌa ra ñoyívi yóꞌo xíꞌin ndiꞌi ñoyívi síkón.
2 O̱n ko̱ó ña̱ꞌa ní‑xiyo ñoyívi yóꞌo,
ña yúyú ni̱xi̱yo ña,
ta naa ní ni̱xi̱yo ña.
Kuiti mi̱i takuií ni̱xi̱yo rá ñoyívi yóꞌo.
Ta Níma̱ Ndios xíka ña no̱o̱ takuií.
3 Ta saá Ndios ni̱ka̱ꞌa̱n ra,
káchí ra saá:
“Ná koo ña yéꞌe”,
káchí ra.
Ta saá xi̱koo ña yéꞌe.
4 Ta xi̱ni Ndios ña yéꞌe,
ta va̱ꞌa ní ña.
Ta ña yéꞌe yóꞌo ki̱ndo̱o ña ñii xiiña,
ta saá ki̱ndo̱o ñanaa inka̱ xiiña,
saá ke̱ꞌé Ndios.
5 Ta sa̱kunaní ra ña yéꞌe “ndiví”,
ta sa̱kunaní ra ñanaa “ñoó”.
Ta saá xi̱koo xikuaa,
ta xi̱koo xita̱a̱n ki̱vi̱ no̱ó.
6 Ta tuku ni̱ka̱ꞌa̱n Ndios,
káchí ra saá:
“Ná koo ña nandika,
ña nataꞌví ndiꞌi takuií yóꞌo.
Sava takuií kindo̱o ni̱no̱,
ta sava takuií koo no̱o̱ síkón”,
káchí ra.
7 Ta saá ku̱ndivi ña.
Ki̱sa va̱ꞌa ra ña na̱ndika,
ta na̱taꞌví ra takuií,
ki̱ndo̱o takuií ni̱no̱,
ta na̱koo takuií no̱o̱ síkón.
8 Ta ña na̱ndika sa̱kunaní ra ña “ñoyívi síkón”.
Ta saá xi̱koo xikuaa,
ta xi̱koo xita̱a̱n ki̱vi̱ o̱vi̱.
9 Ta tuku ni̱ka̱ꞌa̱n Ndios,
káchí ra saá:
“Ná nakutáꞌan takuií tá ki̱ndo̱o ñoyívi ni̱no̱
ná ko̱ꞌo̱n rá ñii xiiña,
ta ná ti̱vi ñoꞌo̱ yi̱chí”,
káchí ra.
Ta saá ni̱xi̱yo ña.
10 Ta no̱o̱ yi̱chí yóꞌo sa̱kunaní ra ña “ñoꞌo̱”,
ta no̱o̱ yóo takuií yóꞌo sa̱kunaní ra ña “mi̱ni”.
Ta xi̱ni Ndios va̱ꞌa ní ki̱ndo̱o ña.
11 Ta tuku ni̱ka̱ꞌa̱n Ndios,
káchí ra saá:
“Ná koo ndiꞌi no̱o̱ yiva xíꞌin inka̱ yu̱ku̱ kuíi̱ ña táxi si̱ꞌva̱,
ña sakui̱na̱ nda̱tán yóo mi̱i ta̱ta̱ ña,
ta ná koo ndiꞌi no̱o̱ yito̱n tón kóon kui̱ꞌi ndaꞌa̱,
kui̱ꞌi ña táxi si̱ꞌva̱,
ña sakui̱na̱ nda̱tán yóo mi̱i ta̱ta̱ ña”,
káchí ra.
Ta saá ku̱ndivi ña ka̱chí Ndios.
12 Xi̱koo ndiꞌi no̱o̱ yiva xíꞌin inka̱ yu̱ku̱ kuíi̱ ña táxi si̱ꞌva̱,
ña sákui̱na̱ nda̱tán yóo mi̱i ta̱ta̱ ña,
ta xi̱koo ndiꞌi no̱o̱ yito̱n tón kóon kui̱ꞌi ndaꞌa̱,
kui̱ꞌi ña táxi si̱ꞌva̱,
ña sákui̱na̱ nda̱tán yóo mi̱i ta̱ta̱ ña.
Ta xi̱ni Ndios va̱ꞌa ní yóo ndiꞌi ña.
13 Ta saá xi̱koo xikuaa,
ta xi̱koo xita̱a̱n ki̱vi̱ u̱ni̱.
14 Ta ni̱ka̱ꞌa̱n tuku Ndios,
káchí ra saá:
“Ná koo kua̱ꞌa̱ ní ña yéꞌe no̱o̱ na̱ndika ñoyívi síkón,
ña sanáꞌa yu kúu ndiví ta yu kúu ñoó,
ta ña yóo ñoyívi síkón sanáꞌa ña ama koo ki̱vi̱,
ta ama koo kui̱ya̱,
ta ama koo yo̱o̱ ñomí,
ta ama koo yo̱o̱ sa̱vi̱.
15 Ta ña kua̱ꞌa̱ ní ña yéꞌe ñoyívi síkón,
ná sanayeꞌe ña no̱o̱ ñoꞌo̱”,
káchí ra.
Ta saá ni̱xi̱yo ña.
16 Ki̱sa va̱ꞌa ra o̱vi̱ ña yéꞌe náꞌno,
ta ña káꞌno ka̱ yóꞌo yéꞌe ña ndiví,
ta ña loꞌo yéꞌe ña ñoó,
ta saá ki̱sa va̱ꞌa ra ndiꞌi ki̱mi.
17 Ta chi̱ndoso ra ña yéꞌe yóꞌo no̱o̱ na̱ndika ñoyívi síkón
ña sanayeꞌe ña no̱o̱ ñoꞌo̱,
18 ta ta̱xi ña koo ndiví ta koo ñoó,
ta saá xi̱koo ña yéꞌe ñii xiiña
ta xi̱koo ñanaa inka̱ xiiña.
Ta xi̱ni Ndios va̱ꞌa ní ki̱ndo̱o ña.
19 Ta saá xi̱koo xikuaa,
ta xi̱koo xita̱a̱n ki̱vi̱ ko̱mi̱.
20 Ta tuku ni̱ka̱ꞌa̱n Ndios,
káchí ra saá:
“Ná koo ndiꞌi no̱o̱ kiti̱ tí kutaku̱ ini takuií,
ta ná koo ndiꞌi no̱o̱ kiti̱ tí kómí ndi̱xi̱n tí ndachí ñoyívi síkón”,
káchí ra.
21 Ta ki̱sa va̱ꞌa ra ndiꞌi no̱o̱ kiti̱ tí náꞌno ñóꞌo ti̱xin takuií mi̱ni,
xíꞌin ndiꞌi inka̱ kiti̱ táku̱ ti̱xin takuií,
ta ki̱sa va̱ꞌa ra ndiꞌi no̱o̱ kiti̱ tí kómí ndi̱xi̱n,
ta kui̱na̱ ñii ñii no̱o̱ kiti̱ yóꞌo nda̱tán yóo mi̱i rí.
Ta xi̱ni Ndios va̱ꞌa ní yóo ña.
22 Ta ni̱ka̱ꞌa̱n Ndios ñava̱ꞌa xíꞌin ndiꞌi kiti̱ tí ki̱sa va̱ꞌa ra,
káchí ra saá xíꞌin rí:
“Ná kui̱na̱ ndó,
ta kua̱ꞌa̱ ní nduu ndó ti̱xin takuií,
ta kiti̱ tí kómí ndi̱xi̱n ná kui̱na̱ ndó,
ta kua̱ꞌa̱ ní nduu ndó ñoyívi no̱o̱ ñoꞌo̱”,
káchí ra xíꞌin kiti̱.
23 Ta saá xi̱koo xikuaa,
ta xi̱koo xita̱a̱n ki̱vi̱ o̱ꞌo̱n.
24 Ta ni̱ka̱ꞌa̱n Ndios,
káchí ra saá:
“Ná koo ndiꞌi saá no̱o̱ kiti̱ tí xíka no̱o̱ ñoꞌo̱ yi̱chí,
ta ná kui̱na̱ ñii ñii no̱o̱ kiti̱ yóꞌo nda̱tán yóo mi̱i rí:
ná koo kiti̱ títa̱ta̱ xíꞌin kiti̱ tíyukú,
ná koo kiti̱ tí ñóo ti̱xin xíka no̱o̱ ñoꞌo̱,
ta ná koo ndiꞌi no̱o̱ inka̱ kiti̱ xíka no̱o̱ ñoꞌo̱ yi̱chí”,
káchí ra.
Ta saá ni̱xi̱yo ña.
25 Ki̱sa va̱ꞌa ra ndiꞌi no̱o̱ kiti̱ yóꞌo.
Ki̱sa va̱ꞌa ra kiti̱ tíyukú,
ki̱sa va̱ꞌa ra kiti̱ títa̱ta̱,
ta ki̱sa va̱ꞌa ra kiti̱ tí ñóo ti̱xin xíka no̱o̱ ñoꞌo̱,
ta ta̱xi ra ña nakui̱na̱ ñii ñii no̱o̱ kiti̱ yóꞌo nda̱tán yóo mi̱i rí.
Ta xi̱ni Ndios va̱ꞌa ní yóo ña.
26 Ta tuku ni̱ka̱ꞌa̱n Ndios,
káchí ra saá:
“Ná kasa va̱ꞌa yó ni̱vi,
nda̱tán yóo mi̱i yó,
saá koo na.
Ta sakuiso chiño yó na ná kaꞌnda chiño na no̱o̱ ña yóo no̱o̱ ñoꞌo̱,
ta kaꞌnda chiño na no̱o̱ ndiꞌi tia̱ká ñóꞌo ini takuií,
ta kaꞌnda chiño na no̱o̱ ndiꞌi kiti̱ tí kómí ndi̱xi̱n,
ta kaꞌnda chiño na no̱o̱ ndiꞌi kiti̱ títa̱ta̱,
ta kaꞌnda chiño na no̱o̱ ndiꞌi kiti̱ tí ñóo ti̱xin xíka no̱o̱ ñoꞌo̱”,
káchí ra.
27 Ta saá ki̱sa va̱ꞌa Ndios ni̱vi,
nda̱tán yóo mi̱i ra;
ki̱sa va̱ꞌa ra ta̱a ta ki̱sa va̱ꞌa ra ñaꞌa̱,
saá ki̱sa va̱ꞌa ra na.
28 Ta ni̱ka̱ꞌa̱n Ndios ñava̱ꞌa xíꞌin ni̱vi,
káchí ra saá:
“Ná kui̱na̱ ndó,
ta kua̱ꞌa̱ ní nduu ndó ná kutaku̱ ndó ndiꞌi saá xiiña ñoyívi no̱o̱ ñoꞌo̱.
Ta kaꞌnda chiño ndó no̱o̱ ndiꞌi ña yóo no̱o̱ ñoꞌo̱,
ta kaꞌnda chiño ndó no̱o̱ ndiꞌi tia̱ká tí ñóꞌo ini takuií,
ta kaꞌnda chiño ndó no̱o̱ ndiꞌi kiti̱ tí kómí ndi̱xi̱n,
ta kaꞌnda chiño ndó no̱o̱ ndiꞌi inka̱ kiti̱ tí xíka no̱o̱ ñoꞌo̱.”
29 Ta tuku ni̱ka̱ꞌa̱n Ndios,
káchí ra saá:
“Koto ndó,
ndiꞌi no̱o̱ yiva ña táxi si̱ꞌva̱,
xíꞌin ndiꞌi no̱o̱ yito̱n tón kóon kui̱ꞌi ndaꞌa̱,
kui̱ꞌi ña táxi si̱ꞌva̱,
yi̱ꞌi̱ táxi i̱ ña ndaꞌa̱ ndó ña kaxi ndó.
30 Ta táxi i̱ ndiꞌi no̱o̱ yu̱ku̱ kuíi̱ ña kaxi án kaxaꞌan ndiꞌi kiti̱ tí xíka no̱o̱ ñoꞌo̱,
kiti̱ títa̱ta̱,
kiti̱ tíyukú,
kiti̱ tí kómí ndi̱xi̱n,
ta ndiꞌi kiti̱ tí ñóo ti̱xin xíka no̱o̱ ñoꞌo̱”,
káchí ra xíꞌin ni̱vi.
Ta saá ku̱ndivi ña ni̱ka̱ꞌa̱n ra.
31 Ta Ndios xi̱ni ra ndiꞌi ña ki̱sa va̱ꞌa ra,
ta ndixa va̱ꞌa ní yóo ña.
Ta saá xi̱koo xikuaa,
ta xi̱koo xita̱a̱n ki̱vi̱ i̱ño̱.