Kpa mala Babila
18
Anzǝm mǝno ka,
ǝn sǝn ɓe mǝturonjar pur a kuli sǝ sulǝo aban yiu a ɓanza.
Yì ka,
ndanǝ rǝcandǝa kǝrkǝr,
sǝ tǎ mala ɓoarɓwa male tǎ aki ɓanza.
2 Loasǝ gi bang-bang na cau ama:
“Babila kpana!
Mǝno yì nggeala
mǝgule ka,
kpana!
Pǝlǝna ban-do
mala akukwar.
Pǝlǝna mpu mala
koya bangŋo mǝɓane,
andǝ ndá mala
koya nyal mǝɓane,
andǝ ban sǝmbǝrǝa mala
koya nyama mǝɓane,
andǝ mǝnana à ɓinǝce ka.a
3 Aɓwana arǝ anzali kat,
à nuna mùr-anap
mala nshawari,
andǝ kìɗìkì mala
nonggi nǝ rǝarǝu male,
sǝ walǝnia.
Amurǝma mala ɓanza
nonggina nǝi.
Ace ɓiki earce do male
aɓa banɓoarnado
mala kume ka,
tsǝngŋǝna amǝ nggaliki
mala ɓanza à pǝlǝna
amǝ gǝna.”b
4 Pǝlǝa ǝn ok ɓe giu pur nǝ kuli kǝ na ama:
“Wu puri ɓālǝi,
wun aɓwana mem.
Wu kǝa oasǝ bu wun aɓalǝ
acauɓikea male ɗang,
ɓǝ̀ ana raka,
wu nǝ̀ nutanni ate
arǝ agirtanni mǝnana
à nǝ̀ sulǝo amuri ka.c
5 Acauɓikea male ka,
à gwalikina amur rǝarǝia,
à bingŋǝna kuli.
Ɓakuli ɗenyina nǝ aturo
ɓealɓikea male
mǝnana pakkia ka.d
6 Ɓǝa mbweki wi a kuni,
kǝla mǝnana pakki
aɓea ɓwana ka.
Ɓǝa ci ɓǝ̀ mbwe kusǝ ɓari
arǝ agir mǝnana pea ka.
Ɓǝa mbwe ɓǝ̀ nu
nggea mǝɓane mana
lullo male ka kar mǝnana
pea aɓea ɓwana sǝ à nu ka,
kusǝ ɓari.e
7 Sokkite ɓǝ̀ tapi aɓa
tanni andǝ bumkiɗikea
kǝla mǝnana pe ɓamuri
gulo andǝ do mǝɓoarne
aɓa rǝpwala ka.
Kǝ jali a ɓabumi ama,
‘Mǝ nda mamurǝm;
mǝ nda man-lú ɗang.
Kǝ gir pà kàm
nǝ̀ ciem mǝ nǝ pak
bumkiɗikea ɗang.’f
8 Ace mani ka,
agirpatanni mǝnana
à nǝ̀ yinǝi wi nǝ bumkiɗikea,
andǝ nzala,
andǝ lú ka,
à nǝ̀ yiu amuri
aɓa pwari mwashat.
Nǝ̀ yia pi aɓa bǝsa kǝring,
acemǝnana Mǝtalabangŋo
Ɓakuli mǝnana pakkiyi wi
ɓashi ka,
mǝ rǝcandǝa na.
9 “Amurǝma mala ɓanza mǝnana à kutio aɓa kìɗìkì mala nonggi nǝ rǝarǝu andǝ yi,
sǝ à do aɓa banɓoarnado andǝ li mǝɓoarne ate ka,
à nǝ̀ ɓua,
sǝ à nǝ̀ keban amuri,
ɓǝa sǝnǝna yele mala bǝsa mǝnana kǝ pisǝì ka.g
10 Nggea tanni male mǝgule nǝ̀ pea wia ɓangciu kǝrkǝr.
À nǝ̀ cam kuko,
sǝ à nǝ̀ keban amuri ama:
“ ‘Caukwanban!
Caukwanban nǝ we Babila,
nggeala mǝgule,
la murǝm!
Aɓa bu-pwari mwashat
ɓashi mala Ɓakuli
yi sulǝna a muro!’
11 “Amǝ nggaliki aɓa ɓanza nǝ̀ ɓua,
sǝ à nǝ̀ pak bumkiɗikea ace,
acemǝnana kǝɓwa ueo kam nǝ̀ kúr agirmâ malea ɗǝm ɗang.h
12 Agirmâ mǝnana kúria nǝ boalo kǝrkǝr sǝ à ram ngga,
à ndaka zǝnariya andǝ azǝrfa,
andǝ atali gǝna,
andǝ sala-ɓá-nkombo.
Aɓea ka à nda ka anggurbyau mǝɓoarne,
amǝ rǝɓǝlke,
andǝa mǝnana amurǝma makkiyi a rǝia ka,
andǝa mǝnana kúria pa bǝti raka.
Aɓea ɗǝm ngga à nda ka agir mǝnana à sharkia nǝ nggun mǝɓoarne sǝ à hasǝkia wia amuru-mǝrǝmɓoarne ka,
andǝ agir mǝnana à tùllia nǝ bolo bangŋa,
andǝ bolo mǝcande ka,
andǝ agir mǝnana à ɓakkia nǝ tali mabǝl ka.i
13 Aɓea gir ɗǝm mana kuria ka,
à nda ka amuku nggwato-nggun mǝɓoarne mala amǝ Asiya,
andǝ amuku agir mǝɓoarne mǝnana à kunǝkiyia amur girlina.
Muku agir loasǝ yele mǝ'rǝmɓoarne,
andǝ myang pak ɓuri wal rǝkwanggia,
andǝ myang pak muru-mǝrǝmɓoarne na aɓalǝia.
Acilia ka à nda mùr ɓǝlanggun anap,
andǝ muru nggun-olif,
andǝ muku pak bǝredi,
andǝ mǝsǝbondo alkama,
andǝ andá,
andǝ anzur,
andǝ apǝ́r,
andǝ akeke-pǝr,
andǝ aguro,
andǝ yilǝmi ɓwapǝndǝa.
14 “À nǝ̀ bangŋa ama,
“ ‘Agir mǝɓoarne mǝnana
bumo earkiyi cea,
sǝ rǝo kǝ ɓǝla a rǝia ka,
à umna a rǝo kat.
Agirkuma mo kat,
andǝ agir gilǝki rǝǔ mo ka,
à ndǝrmina a rǝo kat.
A pa wu nǝ nyare a nǝ
kumia ɗǝm ɗang.’
15 Amǝ nggaliki mǝnana à kurkiyi wi kuro nǝ agir mǝnia,
sǝ à kum gǝna malea a rǝì ka,
à nǝ̀ cam kuko,
aɓa ɓangciu arǝ tanni mǝgule mǝnana sulǝo amuri ka.
À nǝ̀ ɓua sǝ à nǝ̀ nggǝ keban amuri ama,j
16 “ ‘Cau kwanban,
cau kwanban nǝ Babila,
nggeala mǝgule!
Ɗiɗyal ka,
kǝ oasǝ
anggurbyau mamurǝma
mǝnana à tea nǝ lagir
linen mǝɓoarne ka.
Kǝ oasǝ agir gilǝki rǝǔ
mǝnana à peá nǝ zǝnariya,
andǝ atali-gǝna,
andǝ agir tànzama
mǝɓoarne ka.
17 Ndo ka,
aɓa bu-pwari
mwashat,
à kiɗikina nggea kume
mǝgule male kat.’
“Koya mǝkwak waru-bǝsa andǝ aɓwana kat mǝnana à kǝ twal gya aɓa waru a nggeamur,
andǝ amǝturo ɓa waru,
andǝ aɓwana kat mǝnana turobu ace kum gir do la malea ka,
nda a nggeamur ka,
à cam kuko.k
18 Lang à sǝn yele mala pi mala mǝnia yì nggeala ka,
à loasǝ gia à na ama,
“ ‘Ɓe kǝ nggeala kàm
kǝla mǝnia yì nggeala
mǝgule ka le?’
19 À pwan tú sǝ à soe amuria,
sǝ à mak zwalo aban ɓua andǝ keban ama:
“ ‘Cau kwanban!
Cau kwanban nǝ
nggeala mǝgule,
ban mǝnana amǝtala
awarubǝsa mǝnana
à kǝ gya a nggeamur,
pǝlǝ amǝkume kam ngga.
Aɓa bu-pwari mwashat,
kara à kiɗikini.l
20 Wun mǝnana wu
ndanǝ do a kuli ka,
wu pak banɓoarnado amuri!
Wun aɓwana mala Ɓakuli,
andǝ amǝ'mishan,
andǝ amǝ'ɓangna mala Ɓakuli,
wu pak banɓoarnado.
Acemǝnana Ɓakuli
pangŋǝni wi ɓashi
ace kǝ wun.’ ”m
21 Pǝlǝa ɓe mǝturonjar mǝcande imsǝ nggea tali mǝnana gulo male na kǝla nggea taligo mǝgule ka.
Yi turi aɓa nggeamur sǝ na ama,
“Kǝla mǝno ka,
sǝ à nǝ̀ túr nggeala
Babila aɓa nggeamur tsulǝm!
Sǝ à pà nǝ̀ nyare
à nǝ̀ sǝni ɗǝm ɗang.n
22 Agí ka zangŋan
andǝ amǝnggyal,
andǝ agí ka ntetu,
andǝ anjawe ka,
à pà nǝ̀ nyare
à nǝ̀ oea ɗǝm
a ɓalǝo ɗang.
À pà nǝ̀ kum amǝturobu
andǝ koya ulang turobu
a ɓalǝo ɗǝm ɗang.
À pà nǝ̀ nyare
à nǝ̀ ok gi gogô
nǝ taligo ɗǝm
a ɓalǝo ɗang.o
23 Tǎ mala pitǝla pa nǝ̀
nyare nǝ̀ ta ɗǝm
a ɓalǝo ɗang.
À pà nǝ̀ nyare à nǝ̀ ok
giu banɓoarnado mala
amanfela andǝ aburamanfela
ɗǝm a ɓalǝo ɗang.
Mǝnia ka pak anggo
acemana amǝ nggaliki mo,
mǝnana à nda à kutiban kat
ɗiɗyal nǝ rǝcandǝa aɓa
kurkuro andǝ ram gǝna
a ɓanza ka,
a ciá pup,
nǝ́ agir
monzǝop mo,
à swarkia aɓwana
arǝ anzali kat.q
24 Aɓa nggeala Babila ka,
à kum nkila mala
amǝ'ɓangna mala Ɓakuli,
andǝ mala aɓwana
mala Ɓakuli,
andǝ aɓwana kat mǝnana
à wal-luia a ɓanza ka.”r