Ɓakuli nǝ tsǝk ntongŋo amur aɓwana male
7
Anzǝm mǝno ka ǝn sǝn amǝturonjar mala Ɓakuli ine aban came arǝ abumban ine mala ɓanza.
À kùr agúng mǝnana à kǝ lo ɓua nǝ abuban ine mala ɓaɓanza ka,
ace mǝnana gung ɓǝ̀ kǝa ɓua amur nzali ko nggeamur,
ko anggun raka.a
2 Pǝlǝa ǝn sǝn ɓe mǝturonjar aban eauwe a kuli nǝ njartakuli,
nǝ gbǝlman-parbu mala Ɓakuli mǝyilǝmuì a bui.
Loasǝ gi bang-bang na cau nǝ amǝturonjar mǝno ine ka,
yia mǝnana Ɓakuli pania wia rǝcandǝa ɓǝa kiɗiki nzali andǝ nggeamur ka,
ama,
3 “Wu came!
Wu kǝa na ama wu nǝ̀ je nzali ko nggeamur ko anggun ama wu nǝ̀ kiɗikia ɗang,
she ɓǝ̀ sǝm tsǝngŋǝni aguro mala Ɓakuli ma'sǝm nyoulǝa mala parbu a kundǝmbǝia ka.”b
4 Pǝlǝa ǝn oe à na lakki mala aɓwana mǝnana à tsǝkia wia nyoulǝa mala parbu amuria ka;
aɓwana á-gbǝman-mwashat nǝ á-lumi-ine-nong-ine [144,000],
aɓalǝ atau mala amǝ Isǝrayila.
5 Aɓa tau mala Yahuda ka,
aɓwana á-lum-nong-ɓari na à tsǝkia wia nyoulǝa mala parbu ka.
Aɓa tau mala Ruben ngga aɓwana á-lum-nong-ɓari na.
Aɓa tau mala Gad ka aɓwana á-lum-nong-ɓari na.
6 Aɓa tau mala Asha ka aɓwana á-lum-nong-ɓari na.
Aɓa tau mala Naftali ka aɓwana á-lum-nong-ɓari na.
Aɓa tau mala Manasa ka aɓwana á-lum-nong-ɓari na.
7 Aɓa tau mala Shimiyan ngga aɓwana á-lum-nong-ɓari na.
Aɓa tau mala Lawi ka aɓwana á-lum-nong-ɓari na.
Aɓa tau mala Isaka ka aɓwana á-lum-nong-ɓari na.
8 Aɓa tau mala Zebulu ngga aɓwana á-lum-nong-ɓari na.
Aɓa tau mala Yisǝfu ka aɓwana á-lum-nong-ɓari na,
sǝ aɓa tau mala Benjami ngga aɓwana á-lum-nong-ɓari na à tsǝkia wia nyoulǝa mala parbu ka.
Nggea lakki mala ɓwabunda ɓwangsǝ Ɓakuli
9 Anzǝm mǝnia ka ǝn sǝn nggea rambǝa mala ɓwabunda kǝrkǝr,
mǝnana kǝɓwa pà nǝ̀ gandǝ ɓalǝia raka.
À pur arǝa koya nzali,
andǝ akûn,
andǝ aɓwana mala atau ɗàngɗáng,
andǝ alasǝu,
sǝ à came a ɓadǝm bunomurǝm andǝ ɓadǝm Mǝgam.
À oasǝ anggea-daura pwasǝa a rǝia sǝ à bwal ambu nkangga a buia.
10 À loasǝ gia kpǝm à kǝ na ama,
“Amsǝban ngga kǝ yiu
nǝban Ɓakuli ma'sǝm,
mǝnana do amur
bunomurǝm ngga,
sǝ nǝban Yesu Mǝgam!”
11 Sǝ amǝturonjar mala Ɓakuli kat ka,
à nda à came,
à kàrǝì bunomurǝm andǝ aɓwana-mǝgule andǝ agiryilǝmu ine aɓalǝu ka.
À sarǝa a ɓadǝm bunomurǝm nǝ ɓamǝsǝia a nzali sǝ à peri aban Ɓakuli,
12 à kǝ na ama,
“Amin!
Ɓwangsǝban
andǝ ɓoarɓwa,
andǝ sǝlǝe,
andǝ yàwá,
andǝ gulo,
andǝ garamurǝm,
andǝ rǝcandǝa ka,
a mala Ɓakuli ma'sǝm na,
mǝnana mala male
pà kàm raka.
Amin!”
13 Pǝlǝa mwashat ata aɓwana-mǝgule ɗiem ama,
“Ayana à ndaka aɓwana mǝnia aɓalǝ adaura pwasǝa ka,
sǝ aya ban sǝ à puro?”
14 Sǝ ǝn eari wi nǝma,
“Ɓwamǝgule,
ǝn sǝlǝ ɗang.
A nda a sǝlǝ ka.”
Pǝlǝa nam ama,
“Amǝnia ka,
à ndaka ɓwana mǝnana à purî ɓa nggea tanni mǝgule ka.
À lakína adaura malea sǝ à tsǝngŋǝnia à pǝlǝna amǝpwasǝe aɓa nkila mala Mǝgam.c
15 “Nda tsǝa sǝ à came
a ɓadǝm bunomurǝm
mala Ɓakuli
sǝ à kǝ pakki wi turoperi,
du andǝ pwari,
aɓa Ndàmǝgule male;
sǝ Yì ɓwa mǝnana do
amur bunomurǝm ngga,
nǝ̀ dupia wia tara amuria.
16 À pà nǝ̀ ok nzala
ɗǝm ɗang ko bǝti,
sǝ mǝsamur pà nǝ̀
nyare nǝ̀ walia ɗǝm
ɗang ko bǝti.
Pwari pà nǝ̀ walia ɗǝm
ɗang ko bǝti,
sǝ ɓe kǝ tosǝkiban mala
banpina pà nǝ̀
yiu amuria ɗǝm
ɗang ko bǝti.d
17 Acemǝnana Mǝgam
mana nda a ɓaɓalǝu
aban bunomurǝm ngga,
nǝ̀ dupia wia yalgir amuria;
nǝ̀ kánǝia aban amgbeaɗe
mǝnana à pākiyi
mur yilǝmu ka.
Sǝ Ɓakuli ka nǝ̀
esǝkia wia mǝrǝm
kat a mǝsǝia.”e