2
Ace mani ka,
wu swár koya ulang ɓealɓikea,
andǝ koya ulang kutan mǝɓane,
andǝ kúnɓárína,
andǝ mwararǝu,
andǝ koya ulang naki acau kiɗiki ɓwa.
2 Wu pa kǝla abangna-muna,
rǝ wun ɓǝ̀ kǝ ɓǝla arǝ nu kiura mǝɓoarnsari mala cau mala Ɓakuli,
ace mǝnana ɓǝ̀ wu gulo a ɓalǝi,
ɓǝ̀ kyan nǝ wun a amsǝban,
3 mǝnana ado “wu ongŋǝna ɓoaro mala Mǝtalabangŋo ka.”a
Tali mǝyilǝmuì andǝ aɓwana mǝnana Ɓakuli twalia ka
4 Wu yiu aban Kǝrǝsti,
yì tali mǝyilǝmuì,
mǝnana aɓwana ginǝki,
sǝ Ɓakuli twali acemǝnana abani ka ndanǝ ɓoaro ka.b
5 Sǝ wun ado ka wu ndaka tali mǝyilǝmuì,
mǝnana Ɓakuli na arǝ ɓak ɓala male aɓa bangŋo nǝ wun ngga.
Aɓa mǝnia yì ɓala ka,
wu nǝ̀ duk apǝris mala Ɓakuli ace pà aɓoro mala bangŋo,
mǝnana agir'a na abani,
nǝ bu Yesu Kǝrǝsti ka.
6 Aɓa Malǝmce ka à gilǝa ama:
“Wu sǝni,
ndya ǝn nggǝ
tsǝk tali a Siyona ka,
tali kwakita kusǝɓa,
mǝnana ǝn tarì,
sǝ ɓoaro male ka
à pà nǝ̀ kani arǝ
kǝgir raka.
Ɓwa mǝnana kat guli
a rǝì ka,
pà nǝ̀ kum kǝsǝkya ɗang.”c
7 Sǝ wun mana wu guli a rǝì ka,
ɓoaro male aban wun ngga ulang yi pà kàm ɗang.
Sǝ aban aɓwana mǝnana à earnǝi raka dumǝna,
“Tali mǝnana amǝɓa
ginǝki ka,
nda yi duk Tali kwakita
kusǝɓa ka.”d
8 Sǝ ɗǝm ngga,
“Nda tali mǝnana kǝ
tsǝk ɓwapǝndǝa
à kǝ anndǝ ka,
tali mǝnana kǝ cia
à kǝ kpa ka.”e
À kǝ annda,
acemǝnana à kpata cau mala Ɓakuli ɗang,
sǝ mǝnia ka,
nda gir mǝnana Ɓakuli tsǝkia wia ka.
9 Sǝ wun ngga,
wu ndaka ɓwamǝpǝnde mǝnana Ɓakuli tar wun ngga.
Wu nda ka amurǝma pǝris,
aɓwana ace Ɓakuli,
andǝ agirkuma male.
Tàr wun ace mǝnana ɓǝ̀ wu hami aɓwana aɓealɓoarna male,
yi mǝnana tunǝ wun aɓa pǝndǝa aban yiu aɓa tǎlaban male mǝ pà ndali ka.f
10 “Ɗiɗyal ka,
wu nda ka
kǝ aɓwana ɗang,
sǝ adyan ngga,
wu dumǝna aɓwana
mala Ɓakuli.
Ɗiɗyal ka,
à sǝn mǝsǝswatǝr
ma'wun ɗang,
sǝ adyan ngga,
à sǝnǝna mǝsǝswatǝr
ma'wun.”g
11 Wun amǝ'eamrǝarǝu mǝnana ǝn earkiyi acea raka,
wun mǝnana wu nda ka amǝgya-kutio andǝ abǝri a ɓanza ka,
ǝn nggǝ kwarkir wun,
wu gapita re wun nǝ anpel mala nggūrǝu,
mǝnana à kǝ munǝo arǝ yilǝmi wun ngga.
12 Do ma'wun aɓalǝ aɓwana mǝnana amǝkwaɗi na raka ɓǝ̀ dum nǝ ɓealɓoarna.
Anggo ka ko ɓǝa tsǝka wun cau arǝ wun ama wu ndaka amǝ'ɓealɓikea ka,
à nǝ̀ sǝn aturo mǝɓoarne mǝnana wu pakki ka,
sǝ à nǝ̀ pè Ɓakuli gulo a pwari mǝnana nǝ̀ yiu a lǝmndǝ rǝì ka.
Nyesǝmuru aɓata aɓwana mana a buno-gulo ka
13 Ace Mǝtalabangŋo ka,
wu pà ɓamur rǝ wun aɓata aɓwana mǝnana à nda amur bunomurǝm aɓa mǝnia yì ɓanza ka.
Wu pà ɓamur rǝ wun aban mǝtala-nzali kǝla ɓwa mǝnana nda mur aɓwana kat ka.
14 Wu oaki amǝyalban mǝnana à twalia sǝ tasǝia ace kwarkir amǝ yàl nzongcau,
sǝ ɓǝa ɓwangsǝ aɓwana mǝnana à kǝ pak mǝɓoarne ka.
15 Ɓakuli ka,
kane male na ama nǝ́ pakki aturo cauɓoarna ma'wun ngga,
ɓǝ̀ wu gir kun amǝ'ɗwanyi-sǝle arǝ nakia acau mǝɓane.
16 Wu dukdo kǝla aɓwana mǝnana à panzǝnia à kumǝna ɓamuria ka,
sǝ ce wu pǝlǝ panzǝban ma'wun,
dupa wun njargula pakki aɓealɓikea ɗang;
ɓǝ̀ do ma'wun pa kǝla aguro mala Ɓakuli.
17 Wu pe koyana le ka gulo,
sǝ wu earce amǝ'eamrǝarǝu.
Wu kǝ ɓanggi Ɓakuli,
sǝ wu kǝ pe murǝm gulo.
Twal kusǝu arǝ tanni mala Kǝrǝsti
18 Wun mǝnana wu nda ka amuna-ɓala ka,
wu kǝ okia amǝtala-ɓala ma'wun nǝ pagulo.
Ɓǝ̀ kǝa do ama,
she ɓǝa nda ka aɓwana mǝnana à kǝ pakka wun mǝɓoarne sǝ à nda ɓukɓuk ka ɗang;
nggearǝ amǝnana ɓealia ɓiki ka,
wu kǝ okia wia.
19 Ɓakuli ka,
bumi kǝ pwasǝ arǝ wun,
ɓǝ̀ wu pak gir mǝnana wu sǝlǝ ama mǝɓoarne na,
sǝ wu kǝ shakminǝu nǝ munyi aɓa mǝɓane mǝnana kǝ kum wun ata pemǝɓoarne ka.
20 Ya gir mǝɓoarne na wu nǝ̀ kum a ɓalǝi yi mǝnana ɓǝ̀ wu twal gandǝa nǝ walban mana wu kumo ace mǝɓane mǝnana wu pak ka?
Sǝa ma ɓǝ̀ wu kum tanni ace pak mǝɓoarne,
sǝ wu twal gandǝa nǝi ka,
bum Ɓakuli nǝ̀ pwasǝ arǝ wun.
21 Nda àkǝ̀ ce mǝnia ka sǝ Ɓakuli tunǝ wun,
acemǝnana Kǝrǝsti gbal ka,
nu tanni ace wun sǝ nyingga wuni kǝla girkani,
ace mǝnana ɓǝ̀ wu twal kusǝì ka.
22 “Yì ka,
pak kǝ
cauɓikea ɗang,
sǝ swarkiban pa
a kuni ɗang.”h
23 Lang aɓwana sanggì ka,
nyesǝî kǝɓwa nǝ
sangban ɗang;
sǝ lang à pe wi tanni ka,
ɓalbura kǝɓwa ama
nǝ̀ ɗi tangna a kúnì
mǝnana à pakki wi
ka ɗang.
Tanni male ka,
nyinggi Ɓakuli
mǝnana kǝ pak ɓashi
nǝ mǝsǝcau ka,
a bui.i
24 Yì nǝ nggearǝì ka,
twal acauɓikea ma'sǝm
a nggūrǝì amur nggun-
gangndi,
ace mǝnana ɓǝ̀ sǝm
wuki cauɓikea,
sǝ ɓǝ̀ sǝm duk do
ɓealɓoarna.
Nǝ́ anpenye male
mana à tsǝki wi ka
sǝ wu kum
twalban rǝkwana.j
25 Ɗiɗyal ka,
wu nda kǝla anzur
mǝnana à ɓwarki
tanjar ka.
Sǝ ado ka,
wu nyarǝna
aban Yál wun andǝ
Mǝtsǝkkir ayilǝmi wun.