Titus ka ɓwa Yahudi na ɗang sǝ pǝlǝ mǝkpata Yesu, yi duk ɓimǝturo andǝ mǝkwaɗita Bulǝs aɓa turo mishan male. Cautera mala Bulǝs aban ka aban Titus ka, Bulǝs nǝ̀ gilǝì aban ká aban lagga mǝbwali wi turo a Kǝreti. Yì Titus ka à nyi a Kǝreti ace sǝn turo mala ikǝlisiya mǝnana abanì ka. Mǝnia yì Cautera ka bangcau amur amu'gulacau tārú.

Mwashatia ka, à nda rǝ kasǝɓalǝ Titus amur ulang ɓealǝu mǝnana ɓoaro aɓwana amǝgule amur ikǝlisiya ɓǝa dum nǝi ka, nggeamurǝmi ka, nǝ sǝlǝe mala ɓealɓikea mana aɓwana pas ata amǝ Kǝreti kǝ lǝmndǝi ka. Ɓaria ka, à nda rǝ kwarkir Titus amur lang sǝ nǝ̀ pà kanigir aban aɓwana ɗàngɗáng a ɓinalea mana aɓa ikǝlisiya, kǝla aburala, andǝ amanɓala (yia mǝnana gbal à nǝ̀ ngga kania alo-amamǝna ka), andǝ alaggana, andǝ aguro. A masǝlǝate ka, Bulǝs kwarkir Titus amur do mala amǝkpata Yesu, nggeamurǝmi ka amur dorǝpwala andǝ dotarǝu, mana à nǝ̀ earcea kǝrkǝr ka, kpapi andǝ vwaki bu arǝ ɓinǝmǝsǝu, andǝ makgir, andǝ gakia aɓa ikǝlisiya.