Nyesǝ ɓamuru kǝla mala Kǝrǝsti
2
Ado ka ɓakɓabum na kam aɓa Kǝrǝsti,
sǝ girikiban na kam aɓa earcearǝu male,
sǝ Bangŋo mala Ɓakuli ka kǝ yinǝ dotarǝu mwashat a rǝarǝu.
Ɓakuli pana wun sǝn mǝsǝswatǝr mala rǝarǝu andǝ lǝmndǝ pe mǝɓoarne.
2 Ace mani ka wu ciem ɓǝ̀ banɓoarnado mem lumsǝo!
Wu earnǝ rǝarǝ wun.
Wu lǝmndǝì arǝ wun earcearǝu.
Wu do aɓa kpapi ɓamuru aɓa ɗenyicau ma'wun,
kǝla wu nda mwashat ɓǝrɓǝr.
3 Gir mǝnana kat wu nǝ̀ pè ka,
wu kǝa pe nǝ earce-ɓamuru,
ko twalɓamuru ɗang;
wu nongsǝ ɓamur rǝ wun,
wu twal aɓi wun kǝla à kuti wun.
4 Wu tsǝk kir aɓwana kǝla mǝnana wu nǝ̀ tsǝk kir ɓamur rǝ wun ngga.a
5 Ɓǝ̀ ɓabum wun pa kǝla mala Kǝrǝsti Yesu:
6 Kat andǝ mani ama nda
mwashat andǝ Ɓakuli ka,
twali pup ama nǝ̀ karǝ rǝì
arǝ Ɓakuli ɗang.b
7 Yale yì ka,
sukki agir kat,
nyesǝ ɓamuri kǝla
kǝgir ɗang,
sǝ pa ɓamuri kǝla guro,
yi pa kǝla ɓwapǝndǝa
aɓa nggūrǝu.c
8 Sǝ lang pusǝna rǝì kǝla
ɓwapǝndǝa aɓa nggūrǝu ka,
yi nongsǝ muri
kǝ oki Ɓakuli kiru
ba lú,
nggearǝ lú mana
amur nggun-gangndid ka!e
9 Ace mani ka,
Ɓakuli gusǝlǝi,
ci a bancame mǝnana kuti
aban kat ka.
Sǝ pe wi lullǝu mana
kar mur alullǝu kat,f
10 ace mǝnana nǝ lullǝ
Yesu ka,
koya nkūnu,
mala agir mana a kuli,
andǝa mana a nzali,
andǝa mana a tanzali ka,
à nǝ̀ kūndǝǒ.g
11 Sǝ koya lasǝu ka,
nǝ̀ bang bwāng ama,
“Yesu Kǝrǝsti ka
Mǝtalabangŋo na,”
ace gusǝlǝ Ɓakuli Tarrû.
Lǝmndǝ tǎlaban ace Kǝrǝsti
12 Wun agyajam mem mǝnana ǝn earkiyi acea raka,
mǝnana mǝ ndá aban wun ngga,
wu kǝ ok kiru pwari-pwari.
Sǝ ado mǝnana ǝn pâ aban wun raka,
ɓoaro ɓǝ̀ okiru ma'wun ɓǝ̀ kuti mǝno.
Wu pak turo mala amsǝban ma'wun nǝ ɓangciu andǝ rǝɓǝla.
13 Ɓakuli ka,
nda rǝ pak turo aɓalǝ wun,
ɓǝ̀ pà wun rǝcandǝa andǝ ɓabum mala pak gir mǝnana nǝ̀ pwasǝbumi ka.h
14 Wu pusǝ nggwani andǝ makgir aɓalǝ agir mǝnana kat wu pakkiyi ka.
15 Anggo ka,
wu nǝ̀ duk amuna mala Ɓakuli amǝ ɗwanyi cau a rǝǔ,
amǝɓabum ɓoarnsari,
andǝa mǝnana à pà nǝ̀ kum kǝ mǝɓane a rǝia raka.
Wu nǝ̀ dukdo anggo aɓalǝ aɓwana mala nza mǝ ɗwanyi mǝsǝcau andǝ mǝ kpata njar kiɗiki,
mǝnana wu nǝ̀ nggǝ tǎ aɓalǝi kǝla anlero aɓa ɓanza ka.i
16 Sǝ aɓa doe anggo ɓǝ̀ wu kǝ bwal kàngkàng arǝ cau mǝnana pākiyi yilǝmu ka.
Ɓǝ̀ wu kǝ pa anggo ka,
a pwari mǝnana Kǝrǝsti nǝ̀ nyar nǝi ka,
mǝ nǝ nggori nǝ wun,
sǝ mǝ nǝ sǝlǝ gbal ama turo mem andǝ ɓariki mem ngga,
à pà ɓà ɗang.
17 Paɓamuru andǝ aturo ma'wun aɓa kpata Mǝtalabangŋo ka,
à ndà kǝla pa ɓoro abani.
Sǝ ko ɓǝ̀ yi do ama à nda rǝ ɗarǝ yilǝmem kǝla gir-ɗarǝa amur mǝnia yì ɓoro mala paɓamuru ma'wun ngga,
bumam nǝ̀ pwasǝo,
sǝm nǝ̀ pak banɓoarnado a tarǝ sǝm kat.
18 Wun gbal ka,
ban nǝ̀ ɓoara wun,
wu nǝ̀ pakiɗire atam.
Bulǝs ɓwangsǝ Timoti andǝ Apafuroditus
19 Ɓǝ̀ Mǝtalabangŋo Yesu ear ka,
mǝ ndanǝ tsǝkɓalǝu ama mǝ nǝ tasǝta Timoti aban wun,
adyan tu,
ace mǝnana ɓǝn yi kum ɓakɓabum arǝ cau mǝnana mǝ nǝ yia oe amur wun ngga.
20 Ən panǝ kǝɓwa kǝla yì,
Timoti,
mǝnana kǝ tsǝkir wun pepe aɓa mǝsǝcau ka ɗang.
21 Koyan ngga,
gir mǝnana ɓabumi earkiyi ce ka nda pakkiyi ka,
à tsǝkir turo mala Yesu Kǝrǝsti ɗang.
22 Sǝ Timoti ka,
wu sǝlǝna ama lǝmndǝna ɓamuri ama karǝna ɓwa.
Pangŋǝna turo atam kǝla muna andǝ tarrí.
Yì ka,
bwalam nggam aɓa turo hamnǝ Cau Amsǝban.
23 Ace mani ka,
mǝ nda rǝ tsǝkɓalǝam ama ɓǝ̀ ǝn surǝna rǝgir mǝnana mǝ nda a ɓalǝi ka,
mǝ nǝ túrí aban wun.
24 Mǝ ndanǝ tsǝkɓalǝu arǝ Mǝtalabangŋo ama mim nǝ nggearǝam ngga mǝ nǝ ká aban wun,
banì pà nǝ̀ sau ɗang.
25 Ən sǝni,
ndanǝ ɓoaro ɓǝ̀ ǝn nyesǝa wun Apafuroditus,
mǝ'eambǝam,
ɓiam mǝturo andǝ ɓiam soje.
Yì gbal ka nda ɓwa mǝnana wu turi ɓǝ̀ tsǝkiram aɓa dotǝle mem ngga.
26 Ado ka,
rǝì kǝ ɓǝla ace sǝn wun.
Banɓoari wi ɗang,
mǝnana sǝlǝ ama wu ongŋǝna ce rǝkwana male ka.
27 Aɓa mǝsǝcau ka,
rǝì kwani kǝrkǝr,
yale ue bǝti ɓǝ́ wuna.
Sǝ Ɓakuli sǝn mǝsǝswatǝr male andǝ mem gbal,
sǝ amsǝi,
ace mǝnana bumkiɗikea mem ɓǝ̀ kǝa gul kǝrkǝr ɗang.
28 Bumam kǝ pi ɓǝ̀ ǝn tasǝa wun tè ɗǝm,
acemǝnana ǝn sǝlǝna ama ɓǝ̀ wu sǝni ɗǝm ngga,
ɓabum wun nǝ̀ pakiɗire,
sǝ mim gbal ka ɓabumam nǝ̀ nongŋo.
29 Wu gingsǝi nǝ earcearǝu mala amǝkwaɗi,
nǝ banɓoarnado pepe,
andǝ pagulo,
kǝla mǝnana ɓoaro ɓǝa pea amǝ pakki Mǝtalabangŋo turo ka.
30 Acemǝnana api lú bǝti aban pakki Kǝrǝsti turo.
Twal yilǝmi a kun kǝgir ɗang aɓa pakkam turo mǝnana ɓǝ́ wu nda wu nǝ̀ pakkam ngga.