Masǝlǝata acau nunkiru
13
Mǝnia nǝ duk tāruia ká mem aban wun.
Sǝ kǝla mǝnana Malǝmce na ka:
“À nǝ̀ bwalta mǝsǝcau mala koya gir ka,
a kun amǝnakun ɓari ko tārú.”a
2 A ɓaria yiu mem aban wun ngga,
ǝn angŋa dǝmbǝa ǝn nunna kir aɓwana mǝnana à pak cauɓikea ɗiɗyal ka.
Ado ka,
ǝn nggǝ nun kiria ɗǝm andǝ acilia aɓwana,
kǝla mǝnana ǝn pak ɗiɗyal ka.
Ɓǝn yina ɗǝm ngga pà mǝ nǝ pǝrtea nǝ mbumbu ɗang.
3 Agir mǝnana kat wu earkiyice surǝe amǝnana à nǝ̀ lǝmndǝa wun ama Kǝrǝsti kǝ na cau nǝ mim ngga,
mǝ nǝ pa wunia.
Kǝrǝsti ka,
mǝ'rǝwukea na ɗang,
aɓa pak turo nǝ wun.
Yì ka,
kǝ lǝmndǝ rǝcandǝa male aɓalǝ wun.
4 Kat andǝ amani ama à gballì a nggun-gangndi aɓa rǝwukya ka,
ado ka,
ndanǝ yilǝmu nǝ rǝcandǝa mala Ɓakuli.
Sǝm gbal ka,
sǝm ndanǝ rǝwukya,
sǝa ma aɓa do ma'sǝm aɓa Kǝrǝsti ka,
sǝm ndanǝ rǝcandǝa mala Ɓakuli mǝnana sǝm nggǝ pakka wun turo nǝi ka.
5 Wu pelǝki ɓamur rǝ wun,
wu sǝni ko paɓamuru ma'wun ngga,
mǝɓafoe na.
Wu karǝki ɓamur rǝ wun,
wu dum nǝ sǝlǝe ama Yesu Kǝrǝsti ka,
nda aɓalǝ wun,
ɓǝ̀ pa ana raka,
wu kpana a bui mala paɓamuru mǝɓafoe.
6 Tsǝkɓalǝu ma'sǝm ngga,
nda ɓǝ̀ wu sǝlǝ ama sǝm ngga,
sǝm gatti a bui mala turo ma'sǝm ɗang.
7 Hiwi ma'sǝm ado aban Ɓakuli ka,
nda mǝnana ama wu kǝa pak kǝgir mǝɓane ɗang.
Pà ace mǝnana sǝm nǝ̀ lǝmndǝ ɓamur rǝ sǝm ama sǝm pangŋǝna pepe ka ɗang,
nda ace mǝnana ɓǝ̀ wu pak gir mana mǝɓoarne na ka,
ko ɓǝ̀ ndo ama sǝm ngga sǝm kpana ka.
8 Sǝm ngga,
pà sǝm nǝ̀ gandǝ munǝo arǝ mǝsǝcau ɗang.
Dumǝna pup sǝm nǝ̀ camata mǝsǝcau.
9 Banɓoara sǝm,
mana ɓǝ̀ rǝ sǝm ɓunggio sǝ wu ndanǝ rǝcandǝa ka.
Hiwi ma'sǝm ace wun ngga nda ɓǝ̀ wu kum lumsǝo pepe.
10 Mǝ nda aban gilǝa wun amǝnia yia agir ka,
ado mǝno ǝn pà aban wun raka,
nǝ tsǝkɓalǝu ama ɓǝ̀ ǝn yina ka,
pa mǝ nǝ yia peki wun ɗang.
Acemǝnana rǝcandǝa mǝnana Mǝtalabangŋo pam ngga nda ace ɓak ɓabum wun,
pà ace arki wun ɗang.
Masǝlǝata makkun
11 A masǝlǝate ka,
wun amǝ'eamrǝarǝu,
ǝn nggǝ tsǝk wun a ndà nǝ amǝnia yì acau ka:
Wu dum nǝ bumpwasǝa.
Wu gulo wu kya bwal ban mǝnana wu karǝna ɓwa ka.
Wu earnǝ rǝarǝ wun.
Wu do aɓa rǝpwala.
Anggo ka,
sǝ Ɓakuli mǝ'earcearǝu nì andǝ mala dorǝpwala ka,
nǝ̀ do ata wun.
12 Wu makki arǝ wun kun nǝ earcearǝu mala aɓwana mala Ɓakuli.
13-14 Amǝkpata Yesu mǝnana akani kat ka,
à kǝ makka wun kun.
Ɓǝ̀ ɓwamuru mala Mǝtalabangŋo Yesu Kǝrǝsti,
sǝ earcearǝu mala Ɓakuli andǝ dotarǝu mala Bangŋo Mǝfele do ata wun kat.