Bulǝs andǝ amǝ'mishan mǝ'nyirì
11
Ən nggǝ earce nǝma ɓǝ̀ wu twal gandǝa nǝ mim,
nǝ ɓwaɓana mem bǝti.
Ida,
wu twal gandǝa nǝ mim!
2 Mǝ ndanǝ mɓali amur wun,
ulang mɓali mala Ɓakuli,
acemǝnana,
ǝn pana wun kǝla nsari ace alban aban ɓwabura mwashat,
yì Kǝrǝsti nǝ ɓamuri.a
3 Sǝa ma,
ɓangciu kǝ pakkam,
ɓǝ̀ kǝa do ama,
kǝla mǝnana n'yau ɓosǝki Hawawu nǝ swarkiban male ka,
ɓǝ̀ ɓosǝki ɗenyicau ma'wun,
gandǝa wu nǝ̀ nying paɓamuru ma'wun mǝ'mǝsǝcau nì andǝ mǝɓoarnsari arǝ Kǝrǝsti ɗang.b
4 Ən bangŋa anggo acemǝnana wun ngga,
wu kǝ kaurǝa ata earnǝ ko ya ɓwa na mǝnana yiu aban wun sǝ yi hamnǝ ɓe Yesu mǝnana nda'ɗàng andǝ mǝnana sǝm hamnǝi ka.
Sǝ ɗǝm ngga,
wu kǝ ak ɓe bangŋo andǝ ɓe cau ama “cau amsǝban” na,
mǝnana nda'ɗàng andǝ mǝnana wu angŋa dǝmbǝa wu angŋǝni ka.
5 Sǝ a sǝne mem ngga,
aɓwana mǝno wu tunǝkia ama,
“akanggǝrang amǝ'mishan” ngga,
à kutiam nǝ kǝgir ɗang!
6 Ko ɓǝ̀ do ama aɓa nacau ka,
ǝn sǝlǝ tsǝk acau mem raka,
a bui mala surǝgir ka,
ǝn gatti ɗang;
sǝm lǝmndǝna wun mǝnia ka a banfana a koya pwari aɓa koya njari.
7 Ən ɓwarkí nǝ́ ɓwarkio,
yi mǝnana ǝn nyesǝ muram a nzali,
sǝ ǝn loasǝ wun a kuli nǝ hamba wun bǝsa Cau Mǝɓoarne mala Ɓakuli ɓà,
wu mbwem kǝgir raka le?
8 Nǝ̀ gandǝ do ama mǝ nda aban ɓǝmbǝri aɓea ikǝlisiya yi mana ǝn ak boalo a buia ace mǝnana mǝ pakka wun turo ka!
9 Mǝnana mǝ nda aban wun sǝ mǝ nda aɓa tǝle ka,
ǝn duk twalo amur kǝɓwa ɗang.
Amǝ'eamrǝarǝu mǝnana à pur nǝ Masǝdoniya ka,
à yinǝam nǝ gir mǝnana ǝn earkiyi ce ka kat.
Ən yal ɓamuram,
ǝn eare mǝ duk twalo amur wun aɓa koya kǝ njari ka ɗang,
sǝ pa mǝ nǝ duk ɗang.c
10 Nǝ mǝsǝcau mala Kǝrǝsti mana a ɓalǝam ngga,
kǝɓwa kārǝa aɓa bu-nzali Akaya kat,
mǝnana nǝ̀ tamsǝam arǝ mǝnia yì nggori ka ɗang.
11 Mana tsǝa sǝ ǝn nggǝ bangŋa anggo?
Nda acemǝnana ǝn earce wun raka le?
Ɓakuli ka sǝlǝna ama ǝn earce wun!
12 Mǝ nǝ lidǝmbǝa nǝ pak agir mǝnana ǝn pakkiyi ado ka,
ace mǝnana mǝ tamsǝ aɓwana mǝnana à ndaban alta njar à nǝ̀ bangŋa ama turo mishan malea arǝ agir mana à kǝ nggori nǝia ka mǝ'mwashati na andǝ ma'sǝm ngga.
13 Amǝnia yì aɓwana ka,
amǝ'mishan mǝ'nyirì na.
Yia ka,
amǝɓosǝkiban na,
mǝnana à ɓosǝki rǝia kǝla amǝ'mishan mǝɓafoe mala Kǝrǝsti ka.
14 Sǝ gir'ndali na ɗang.
Ko nggearǝ Shetan nǝ ɓamuri ka,
kǝ ɓosǝki rǝì kǝla mǝturonjar mala tǎlaban.
15 Sǝ pà nǝ̀ duk gir'ndali ɗang,
yi mǝnana ɓǝa aguro male ɓosǝki rǝia kǝla aguro mala ɓealɓoarna ka.
A masǝlǝate ka,
à nǝ̀ kum tangnakusǝu ɓealɓikea malea.
Bulǝs jali nǝ atanni male
16 Mǝ nǝ ɓǝsǝlǝi ɗǝm ama:
ɓǝ̀ ɓwa ɓǝ̀ kǝa twali kǝla ǝn kwár raka ɗang.
Sǝ ɓǝ̀ wu twalam anggo ka,
wu em kǝla mǝnana wu nǝ̀ ak ɓwa mǝnana dǝmbǝi kwar raka,
ace mǝnana mǝ kum gir mana mǝ nǝ nggori nǝi gbal ka.
17 Aɓa mǝnia yì ulang nggori ka,
ǝn pa aban na cau kǝla mǝnana Mǝtalabangŋo nǝ̀ na ka ɗang.
Ən nggǝ na cau kǝla mǝ'ɗwanyi sǝlǝe.
18 Sǝ acemǝnana aɓwana pas kǝ̀ nggori ulang mala ɓanza ka,
mim gbal ka,
mǝ nǝ nggori.
19 Wu kǝ twali ɓamur rǝ wun ama,
wu ndanǝ sǝlǝe,
sǝa ma ban kǝ ɓoara wun arǝ twal gandǝa nǝ amǝ'ɗwanyi sǝlǝe.
20 Ɓafo,
wu kǝ twal gandǝa nǝ ko ya ɓwa mǝnana kǝ pak guro nǝ wun,
kǝ pwan agirkuma ma'wun,
ko kǝ tǝpǝri wun,
ko kǝ lǝmndǝa wun ama kuti wun,
ko kǝ pakka wun gir kyauwikiban aɓa ɓwa ka.
21 Kǝsǝkya pakkam mǝ eare ama sǝm ndanǝ rǝwukya mǝnana pa sǝm nǝ̀ gandǝ pak mǝno raka!
Mǝ ndo mǝ nǝ na cau kǝla dǝmbam kwar ɗang:
Ɓǝ̀ ɓe kǝgir nakam mǝnana ɓwa nǝ̀ nggori nǝi ka mǝ ndanǝ mǝsǝkang-kangŋa mala nggori nǝi gbal.
22 Ɓǝ̀ yia ka,
amǝ Ibǝru na ka,
mim gbal ka mǝ nda ɓwa Ibǝru.
Ɓǝ̀ yia ka,
amǝ Isǝrayila na ka,
mim gbal ka mǝ nda ɓwa Isǝrayila.
Ɓǝa nda ka amǝkau mala Ibǝrayim ngga,
anggo gbal sǝ ǝn pa.
23 Mǝ nǝ na cau kǝla dǝmbam kwar ɗang:
Ɓǝ̀ yia ka,
à nda ka aguro mala Kǝrǝsti,
ǝn ɓoaria wia aɓa pakki Kǝrǝsti turo mǝcande!
Ən kum kùrban kusǝ pas ǝn kutia.
Ən kum kwakban mǝnana à pà nǝ̀ gandǝ ɓallè raka.
Ən api lú kusǝ pas.d
24 Kusǝ tongno ǝn kum kwakban a bu aɓwana-mǝgule mala amǝ Yahudi,
sǝ koya pwari kwakban ngga,
nkamso lumi-tārú nǝ mǝsǝi tongno-nong ine na.e
25 Kusǝ tārú à walkiam nǝ agara,
à ɓukkiam nǝ atali kusǝ mwashat,
ǝn lingge amur kusǝ tārú,
ǝn pak nongŋo mwashat,
du andǝ pwari,
mǝ nda aban kyalle aɓa nggeamur.f
26 Kusǝ pas mǝ nda rǝ twalbǝri mǝsauwe.
Sǝ arǝ amǝno yì agya ka,
ǝn kum ɓamuram aɓa ká-mǝɓane arǝ anggeasala a mùr-longŋa,
ká-mǝɓane a bu amǝ'ɓǝmbǝriban,
ká-mǝɓane a bu aɓwana mem amǝ Yahudi andǝ aɓwana mǝnana amǝ Yahudi na raka.
Ən kum ɓamuram aɓa ká-mǝɓane a bu amǝ loasǝ munǝo aɓa nggeala;
ɓǝ́n wuna a ɓabondo;
ɓǝ́n wuna aɓa nggeamur,
sǝ ɓǝ́n wuna a bu amǝ'eamrǝarǝu amǝ'nyir nì.g
27 Ən do aɓa pak turo mǝkwane andǝ aulǝa,
aɓa ɗwanyi ntulo arǝ adú pas,
aɓa nzala andǝ mǝsamur.
Kusǝ pas ǝn do aɓa tǝla girlina,
aɓa ɗwal andǝ tǝla agir-nggurǝu.
28 Ko ɓǝ̀ mala amǝnia na raka,
ko aya pwari ka,
ɓalǝam kǝ pi ace ɗenyi mem amur a'ikǝlisiya kat.
29 Yana rǝì ɓunggio sǝ mem ɓunggi ɗang?
Yana kpa aɓa cauɓikea,
sǝ ce kwan rǝam raka?
30 Ɓǝ̀ mǝ nǝ nggori ka,
ɓoaro mǝ nggori nǝ agir mǝnana à lǝmndǝ rǝwukya mem ngga.
31 Yì,
yì Ɓakuli Tar Mǝtalabangŋo Yesu,
mǝnana ɓwangsǝe pà nǝ̀ mal raka,
sǝlǝna ama nyir na ǝn nakiyi ka ɗang.
32 Mǝnana mǝ nda a Damaska ka,
nggwamna mǝnana aɓata Murǝm Aritas ka,
tsǝk amǝyal la arǝ akunla ama ɓǝa bwalam.
33 Gir mǝnana amsǝam aɓa bui ka,
nda ǝn do aɓa ndakade,
sǝ agyajam mem sulǝam nǝ anggur a ferang mala sheran mǝnana à gumbǝlina la nǝi ka.