6
Acemǝnana sǝm nda ɓituro sǝnǝa Ɓakuli ka,
sǝm nggǝ zǝmbǝa wun,
wu kǝa ak ɓwamuru mala Ɓakuli mǝnana pa wun ngga ɓa,
wu pangŋǝna turo nǝi ɗang.
2 Ɓakuli ka,
kǝ bangŋa ama:
“Àkǝ̀ bu-pwari mala
lǝmndǝ earmuru
mem ngga,
ǝn oeo.
Lang pwari mala amsǝo
yina ka,
ǝn dupo gbasha.”a
Sǝni!
Ado mǝno ka ndà pwari mǝnana Ɓakuli kǝ lǝmndǝ earmuru male ka;
yalung ndà pwari amsǝban.
Atanni mala Bulǝs
3 Sǝm ngga,
sǝm nggǝ dukdo a njar mǝnana ɓǝ̀ sǝm ngga dupi kǝɓwa tǝ́r annda raka,
ace mǝnana kǝɓwa ɓǝ̀ kǝa kum mǝɓane aɓa turo mishan ma'sǝm ɗang.
4 Akuni ka,
aɓa koyagir sǝm pak ka sǝm nggǝ lǝmndǝa ama sǝm nda ka amǝturo-mishan mǝ'mǝsǝcau nì mala Ɓakuli.
Sǝm nggǝ pe nǝ shakminǝu kǝrkǝr aɓalǝ atanni,
aɓa rǝpina,
andǝ domǝkwane.
5 À walki sǝm,
à ramta sǝm a ndàkurban,
aɓwabunda lo arǝ sǝm aɓa bumlulla;
sǝm pak turo aɓa aulǝa,
sǝm dum nǝ gandǝrǝu aɓa ɗwanyi ntulo andǝ nzala.b
6 Sǝm nggǝ lǝmndǝ ɓamur rǝ sǝm nǝ doɓoarnsari,
andǝ sǝlǝe,
andǝ munyi,
andǝ pe mǝɓoarne,
nǝ bu Bangŋo Mǝfele mǝnana aɓalǝ sǝm ngga,
sǝ nǝ earcearǝu mǝɓafoe.
7 Sǝm nggǝ hamnǝ mǝsǝcau nǝ ɓabum kat,
sǝ nǝ rǝcandǝa mala Ɓakuli aban pakturo aɓalǝ sǝm.
Sǝm nggǝ pakturo nǝ ɓealɓoarna ma'sǝm kǝla agirbura a bu sǝm mǝli ace ká nǝ munǝo,
sǝ a bu sǝm mǝnggare ace mgbali agirbura.
8 Sǝm nggǝ pakki Ɓakuli turo,
ko aɓwana gusǝlǝ sǝm,
ko à burice sǝm,
ko à twal lullǝ sǝm,
ko à ɓwangsǝ sǝm.
Aɓwana twal sǝm kǝla amǝ swarkiban,
sǝa ma sǝm nggǝ pak agir nǝ ɓabum sǝm mwashat.
9 Sǝm do kǝla à surǝ sǝm ɗang,
sǝ à surǝna rǝ sǝm pepe.
Sǝm do kǝla sǝm nda kun lú,
sǝ sǝm ndanǝ yilǝmu.
À walki sǝm,
sǝ à wal-lú sǝm ɗang.
10 Kat andǝ amani ama à tsǝk sǝm aɓa bumkiɗikea ka,
sǝm nda aɓa bumpwasǝa ko aya pwari.
Ko ɓǝ̀ ndo ama sǝm nda ka amǝtǝr ka,
sǝm nggǝ tsǝk aɓwana pas à duk amǝkume.
Mǝsǝcau na ama sǝm pànǝ kǝgir ɗang,
sǝa ma girbunda kat ka ma'sǝma.
11 Wun aɓi sǝm mǝnana a Korinti ka!
Sǝm sǝmbǝrǝa wun kǝcau ɗang,
sǝm na wun a banfana,
sǝm mǝn ɓabum sǝm bwāng aban wun.
12 Sǝm lǝmndǝ earcearǝu aban ká aban wun,
sǝ wun ngga,
wu pànǝ earcearǝu arǝ sǝm ɗang.
13 Ən nggǝ na wun cau kǝla amunem.
Ace earcearǝu mǝnana sǝm ndanǝi arǝ wun ngga,
pa wu nǝ̀ lǝmndǝa sǝm earcearǝu gbal re?
Wu mǝn ɓabum wun aban yiu aban sǝm.
Andamǝgule mala Ɓakuli mǝyilǝmuì
14 Wu kǝa kpapi ɓamur rǝ wunc wunǝ aɓwana mǝnana à pa ɓamuria aban Kǝrǝsti raka ɗang.
Mana dapi ɓealɓoarna andǝ ɓealɓikea?
Sǝ tǎlaban ngga,
lang sǝ à nǝ̀ do andǝ pǝndǝa?
15 Sǝ ya dotarǝu na dapi Kǝrǝsti andǝ Shetan?
Sǝ mana dapi mǝkwaɗi andǝ ɓwa mǝnana mǝkwaɗi na raka?
16 Sǝ mana dapi Ndàmǝgule mala Ɓakuli andǝ nda ka lú?
Sǝm ngga,
sǝm nda ka ndàmǝgule mala Ɓakuli Mǝyilǝmui.
Kǝla mǝnana Ɓakuli na ka:
“Mǝ nǝ do aɓalǝ
aɓwana mem,
mǝ nǝ gya aɓalǝia,
Mǝ nǝ duk Ɓakuli amuria,
sǝ yia ka,
à nǝ̀ duk
aɓwana mem.”d
17 “Ace mani ka,
wu puri
ɓalǝ amǝ'ɓealɓikea,
wu duk zak!
Wu kǝa gbashi rǝia ɗang,
anggo sǝ Mǝtalabangŋo na.
Wu kǝa je kǝgir mǝnana
mim Ɓakuli ǝn ginǝce ka ɗang,
sǝ mǝ nǝ gingsǝ wun.”e
18 “Mǝ nǝ duk Tar wun,
sǝ wu nǝ̀ duk amunem.
Mǝnia ka nda cau
mǝnana Mǝtalabangŋo
mana Karban kat
bang ngga.”f