Aturo mala
AMƏ MISHAN
Cau mala turban nǝ Bangŋo Mǝfele
1
We Tiyofulus,
aɓa Malǝmce mem mǝdǝmbe ka,
ǝn angŋa dǝmbǝa ǝn gilǝno agir mǝnana kat Yesu tita pea andǝ kane,a
2 ba pwari mǝnana à twali nǝi aban ká kuli ka.
Sǝ kaniama nǝ̀ o a kuli ka,
kwarkir amǝ'mishan male mǝnana tàrkia ka,
nǝ rǝcandǝa mala Bangŋo Mǝfele.
3 Anzǝm tanni andǝ lú mala Yesu ka,
yi long nǝ yilǝmu ɗǝm.
Aɓalǝ anongŋo lumi-ine,
pusǝrǝi kusǝ pas aban alaggana male,
arǝ anjar ɗàngɗáng mǝnana lǝmndǝia wia ama kàngkàng longŋǝna ndanǝ yilǝmu ka.
À sǝni nǝ mǝsǝia sǝ bangcau nǝia amur Domurǝm mala Ɓakuli.
4 Sǝ nda peatu abania ka,
banggia wia ama:
Wu kǝa nying Urǝshalima ɗang.
Wu kundǝo,
she ɓǝ̀ Tárram pana wun Bangŋo Mǝfele mǝnana wu oem ǝn na nǝma,
bangŋa ama nǝ̀ pa wun ngga.
Jesus Ascends to Heaven (Amǝ Mishan 1:4-11)
5 Yohana ka pakki aɓwana batisǝma nǝ múr,
sǝ banì pà nǝ̀ sau ɗang aɓalǝ anonggeo bǝti ka,
à nǝ̀ pakka wun batisǝma nǝ Bangŋo Mǝfele.b
À twal Yesu aban o a kuli
6 Lang amǝ'mishan yi dapina aban Yesu ka,
pǝlǝa à ɗì ama,
“Mǝtalabangŋo,
ado sǝ a nǝ nyesǝ domurǝm aban amǝ Isǝrayila le?”c
7 Pǝlǝa Yesu banggia wia ama,
“Kǝ Tárram na nǝmurǝì mǝnana ndanǝ rǝcandǝa mala tsǝk amǝno yì apwari andǝ abaku ka,
sǝ à pa ace wun ɓǝ̀ wu surǝia ka ɗang.
8 Sǝa ma,
wun ngga wu nǝ̀ kum rǝcandǝa,
yi mǝnana ɓǝ̀ Bangŋo Mǝfele sulǝna amur wun ngga.
Wu nǝ̀ duk amǝ na cau mem a Urǝshalima,
andǝ ɓa nzali Yahudi,
andǝ nzali Samariya,
andǝ ɓanza kat.”d
9 Anzǝm mǝnana Yesu naná cau anggo ka,
àkǝ̀ mǝsǝia à nda rǝ sǝne,
kara à twali aban ká o a kuli.
Kya ko aɓa pǝrɓang,
à gandǝ sǝne ɗǝm ɗang.e
10 Lang à nda rǝ tsǝk mǝsǝia piu a kuli aban sǝn o male ka,
kara aɓwana ɓari nǝ agirkuro mǝpwasǝe,
à pusǝ rǝia aban came abania.
11 Sǝ à bangŋa ama,
“Wun amǝ Galili,
palang sǝ wu cam kani aban sǝnban a kuli?
Mǝnia yì Yesu à twali arǝ wun aban ká kuli ka,
nǝ̀ ngga nyare kǝla mǝno wu sǝni aban o a kuli ka.”
À twal Matǝyes ɓǝ̀ ak ban came mala Yahuda
12 Pǝlǝa amǝ'mishan mǝnia nyari Nkono Olif,
mǝnana sauwa mala nrei andǝ Urǝshalima ka,
nda kǝla mêl mwashat.f
13 Lang à bwalǝna ɓala ka,
pǝlǝa à kutio a kurǝm kuli,
ban mǝnana à duki kam ngga.
Aɓwana mǝnana à nda abanì ka,
à nda ka Bitǝrus,
andǝ Yohana,
andǝ Jemis,
andǝ Andǝru,
andǝ Filip,
andǝ Toma,
andǝ Batalomi,
andǝ Matiu,
andǝ Jemis muna mala Alfiyus.
À nda ata rǝia andǝ Shiman mǝnana earkiyi ace la male raka,
andǝ Yahuda muna mala Jemis.
14 Yia a ɓinado malea ka,
à uekiyi kpapi nǝ ɓabumia mwashat a tarǝia aban pak hiwi ɗang,
andǝ amamǝna,
andǝ Maryamu nggea Yesu,
andǝ amǝ'eam Yesu.
15 Aɓalǝ anongŋo mǝno ka,
amǝkpata Yesu yiu à yì rambǝa abanɓwáná,
lakki malea kat ka nda gbǝman nǝ lumi-ɓari.
Pǝlǝa Bitǝrus lo came na cau ama:
16 Wun amǝ'eambǝam,
dumǝna púp ama à nǝ̀ lumsǝ cau Malǝmce mala Ɓakuli mǝnana Bangŋo Mǝfele bangŋi ɗiɗyal nǝ kun Murǝm Dauda amur Yahuda ka.
Yahuda ka nda ɓwa mǝnana lǝmndǝ njar aban ká nǝ́ aɓwana mǝnana à bwal Yesu ka.
17 Ɗiɗyal ka nda aɓalǝ sǝm,
sǝ ndanǝ kāmbe male gbal mǝnana à pe wi aɓa turo mishan ngga.
18 (Nǝ boalo mala turo mǝɓane,
sǝ Yahuda kúr nzali,
pǝlǝa a ɓalǝi sǝ kpa,
sok muri wǔ,
bumi ara,
alungŋe sukkio a nza.g
19 Aɓwana mǝnana à do a Urǝshalima kat ka,
à ok ce,
nda tsǝa sǝ à tunǝ banì nǝ kun malea ama,
Akeldama ka,
ɓālǝi nda “Nzali Nkila.”)
20 Acemǝnana à gilǝa aɓa Malǝmce mala Anggyal ama,
“Ɓala male ka ɓǝ̀ do
nǝ ɓālǝi atarǝì,
kǝɓwa pà nǝ̀ duk kam
ɗang.”
Ɗǝm ngga à gilǝa ama:
“Ɓǝ̀ ɓeɓwa ɗàng ɓǝ̀
ak banturo male.”h
21 Ado ka dumǝna púp ama sǝm nǝ̀ twal ɓeɓwa ɓǝ̀ ak bancame mala Yahuda.
Sǝm nǝ̀ twal aɓalǝ aɓwana mǝnana à nda ata sǝm aɓalǝ apǝlǝa kat mǝnana sǝm nda a tarǝ sǝm sǝnǝa Mǝtalabangŋo Yesu ka.i
22 Ɓǝ̀ twal a pwari mǝnana Yohana pakki Yesu batisǝma nǝi,
yi bwal a pwari mǝnana à twali nǝi arǝ sǝm aban o a kuli ka.
Ɓǝ̀ yana sǝ à twali ka,
nǝ̀ duk mwashat ata sǝm aban hamnǝ cau mala loapi ɓembe mala Yesu.
23 Pǝlǝa à pa lullǝ aɓwana ɓari:
Yisǝfu,
mǝnana à kǝ tunǝi ama Barsabas (Sǝ à surǝì gbal nǝ Yustus ka) andǝ Matǝyes.
24 Pǝlǝa à pak hiwi ama,
“We Mǝtalabangŋo,
mǝnana surǝ ɓabum koyan kat ka,
lǝmndǝa sǝm yana a twalo aɓalǝ aɓwana mǝnia ɓari ka,
25 ɓwa mǝnana nǝ̀ twal banturo mishan a kuni Yahuda,
mǝnana nying sǝm o aban mǝnana dupi wi ka.”
26 Pǝlǝa à túr mǝsǝboalo a kuli,
à nǝ̀ sǝn ɓwa mǝnana nǝ̀ li ka,
sǝ yi kpa,
lǝmndǝ ama Matǝyes na li ka;
nda à twal Matǝyes yi lumsǝ kun lakki mala amǝ'mishan mala Yesu mǝnana à ueo lum-nong-mwashat ka.