Yesu loapi ɓembe
16
Lang Sabbat,
pwari usǝlǝo kutina ka,
Maryamu Ɓwa Magdala,
andǝ Maryamu nggea Jemis,
andǝ Salomi,
à kúr muku ɓǝlanggun mǝɓoarne ace mǝnana à nǝ̀ ká à nǝ̀ hasǝi lú Yesu ka.
2 Nǝ dǝmbari ɗiɗyal a pwari Ladi,
pwari nǝ̀ eau ani ka,
à bwalǝna njargula aban ká a ɓembe.
3 Pǝlǝa à kǝ ɗiki rǝarǝia ama,
“Yana nǝ̀ gǝsha sǝm tali mǝnana a girna kun ɓembe nǝi ka?”
4 Lang à nǝ̀ loasǝ mǝsǝia ka,
kara à sǝn nggea tali mǝgule man ngga à gǝshini.
5 À nǝ̀ kutio a ɓembe ka,
à sǝn ɓe lagga nǝ daura mǝpwasǝe dumǝna ata bu-mǝli.
Ɓangciu pakkia wia.
6 Pǝlǝa nea wia ama,
“Wu kǝa ɓang ɗang.
Wu nda ban sǝnban Yesu Ɓwa Nazarat,
mǝnana à gballì ka.
Longŋǝna!
Pa kani ɗang.
Wu sǝn ban mǝnana à nongsǝi kam ngga.
7 Ado ka wu kyane wu kya ne alaggana male andǝ Bitǝrus ama nda nǝ̀ aka wun dǝmbǝa ká a bu-nzali Galili.
Akano ka wu nǝ̀ ngga sǝni,
kǝla mǝnana na wun ngga.”a
8 Amamǝna man puro à nying ɓembe nǝ mire aban o nǝ rǝɓǝla,
ban pakkia wia ɓa.
À ne kǝɓwa ce ɗang,
acemǝnana ɓangciu pakkia wia.
Yesu pusǝrǝi aban Maryamu ɓwa Magdala
9 [Lang Yesu longŋǝna nǝ yilǝmu a pwari Ladi ka,
yi pusǝrǝi aban Maryamu Ɓwa Magdala mǝnana pusǝ akukwar tongno-nong-ɓari a rǝì ka.
10 Pǝlǝa wario kya ne aɓwana mǝnana à nda te ɗiɗyal,
lang à nda ban ɓua,
à nda rǝ pak bumkiɗikea ka.
11 Sǝa ma lang à o ama Yesu na nǝ yilǝmu,
sǝ yì,
yì Maryamu ɓwa Magdala sǝnǝni ka,
à ear ɗang.
Yesu pusǝrǝi aban alaggana ɓari
12 Anzǝm man ngga,
Yesu yi pusǝrǝi aban aɓea alaggana male ɓari nǝ ɓamǝsǝu mǝnana à surǝì nǝi raka,
aban ká aɓe muna-la.
13 À nyare à yì ne aɓea,
sǝ yia gbal ka à eare ama mǝsǝcau na ɗang.
Yesu pusǝrǝi aban alaggana male lum-nong-mwashat
14 Nǝ nzǝmo ka Yesu yi pusǝrǝi aban alaggana man lum-nong-mwashat ka aban li girlina a tarǝia.
Pǝlǝa nunkiria ace ɗwanyi earnǝ cau andǝ murcandǝa malea mǝnana à ɓinǝ akcau mala aɓwana mǝnana à sǝni anzǝm loapi ɓembe male ka.
15 Pǝlǝa nea wia ama:
Wu kyane aɓa ɓanza kat,
wu hamnǝ Cau Amsǝban aban ɓwapǝndǝa kat.b
16 Ɓwa mǝnana ak Cau Amsǝban,
paɓamuri,
sǝ à pakki wi batisǝma ka,
nǝ̀ auwa,
sǝ ɓwa mǝnana ɓinǝ ak Cau Amsǝban,
paɓamuri raka,
ɓashi nǝ̀ sulǝ amuri.
17 Aɓwana mǝnana à paɓamuria abanam ngga,
amǝnia yia agir'lǝmndǝa ka à nǝ̀ kpatea:
Aɓa lullǝam à nǝ̀ pusǝ akukwar,
à nǝ̀ nakia cau nǝ abǝsa kun.
18 À nǝ̀ kpa an'yau nǝ buia,
sǝ ɓǝa nu barya ka,
pà nǝ̀ pakkia wia kǝgir ɗang.
À nǝ̀ tsǝk buia amur amǝkwano,
sǝ amǝkwano ka rǝia nǝ̀ kum rǝcandǝa.
À twal Yesu aban ká kuli