3 Si-kayon ensemek ko, say inkakarak a isolat cha si-kayo, maypangkep na pengisalakan Afo Chiyos cha si-kathayon emiin a naemati tep si-kathoy piyan kon chilin konen cha si-kayo. Nem ekak intoloy tep niyemnem ko i mesepol a ibilin kod si-kayo i ampet a itakchel joy pamati thayo say nat ma-choman tan nat mesa-dathan. Tep inpiyal Afo Chiyos iwa podnon toro-toro maypangkep na pamati thayo cha si-kathayon tothoo tho, tan sema iren podnon toro-toro, nagwariy kolang to. 4 Tep gwara kono iriy toon ekika-chom cha si-kayon nagwariy tahot ched Afo Chiyos, tan in-emot chiy ngaaw a pangkep cha. Nasiya-dathan chiy podno maypangkep na kaasin Afo Chiyos tep nakigwan cha kono i angken onoran iren ma naematiy ngaaw a kamkam na angel cha tep mahaasi konos Afo Chiyos ngorechan. Nat napiyati ra ngo i si Jesu Cristoy sa-sa-kin Afo thayon pansilsilbian tayo. Iyaypadtoy chosa ra nontan da chiwa iyaysolat a esel Afo Chiyos.

5 Amta yo walen emiin ira jay a konen ko maypangkep na chosen Afo Chiyos iren ma iyanbasol nontan da, nem piyan kon ipalagip cha si-kayo ngorechan. Nemnem jo i poli-polin Israel nonta bagaen ired Egypt. Tiyolongan iren Afo Chiyos, et inbalnay to ira nonta bintihan chiy Egypt. Nem angken tiyolongan Afo Chiyos ira ma poli-polin Israel, chiyosa tho met laeng ira ma nat ematid si-katho et etiy ira. 6 Nemnem jo ngo i anghilis a nat iyapnek na kasasaad chen in-i-kan Afo Chiyos cha si-kara, no diket bintihan chiy koston pan-iyanan ched ma dangit. Kagol a engamagan chen man, biyalod iren Afo Chiyos na kadinen nat mebedin a ma-kal, et inkalebos to ired ma kawad-an na enbolinget cha sa-kod ingkathod onmothok i kainportantian a akow na pengowis Afo Chiyos na emiin. 7 Nemnem jo ngo ira ma toon iyan-iyan cha siyodad na Sodom tan Gomorrah tan sema siyo-siyodad a askang to. ^a Sema nainpanbasol cha, inges toy nainpanbasol iren ma anghilis. ^b Tep sema iren too, nachichog chiy nat imbaliy cha, tan sema daleki, nachichog cha ngoy echom chen daleki. Isonga, kolpin piyoolan Afo Chiyos ira ma too, pati siyodad cha, say mebanchaanan kiya i sema iren nat naematid Afo Chiyos, mechosa ired afoy a eg ma-ma-chep.

8 Inges ngo niwan ira ma toon naiyantoro na nat podno. Gwariy koki-kokip cha, et kagol niwa kiyokip cha, naiyonoran chiy ngaaw a kamkam na angel cha, et nainpaskig chiy angel cha. Binekan cha ngoy karebengan Cristo, tan nakigwan chiy ngaaw maypangkep na manakabalin a anghilis. 9 Angken sema kahejangan iren ma anghilis a si Michael, nat imag toy inges niwan. Tep nonta iyansongbat ira na Diablo maypangkep no siyay gwariy karebengan ton mengeda na angel Moses, nat intoled Michael a mengsel na ngaaw cha Diablo, no diket kigwan to bengat i “Si Afo Chiyos i mahaamten mengiseg-ang ka.” 10 Nem sema iren too, nakigwan chiy ngaaw maypangkep na kompormin nat egwathan cha. Singen may-arig ired athap a animal a nat mahanemnem tep sema sa-sa-kin egwathan iren ma too, si-kathoy dekna na angel cha, et seman i oncharal cha si-kara.

11 Kakaasi nowan ira ma naiyantoro na itek tep emanekot aliy chosa ra. Tep chiyan onoriy ngaaw a imag Cain. ^c Singen inges cha ngos Balaam tep naiyawis chiy toon manbesol say manpilak ira. ^d Tan nakiyontra ra ngoy naengibalnay a inges tos Korah a kiyontra thos Moses nontan da.^e Epaladoy chosen Korah, et inges to ngo ired ma toon naiyantoro na nat podno tep chosaen iren Afo Chiyos na ingked ingka.

12 Sema iren too, no mekika-chom ired si-kayon mengan tan mankomolgar, may-arig ired mansen onngithi na edinis a baro. Tep epaladoy pengan cha tan penginom cha tep nagwariy tahot ched Afo Chiyos. Tan si-kara bengat i naniyemnemnem cha. Ag-agpayson nagwariy silbi ren inges toy kolpot a naintekjab na chahem, nem nagwariy oran. Inges to ngoy kejow a nat naiyandawes angken timpo na pandawes to. Inges to pay ngoy kejow a ebosbos et kolpin etiy. 13 Sema iren ngaaw a too, may-arig ngo ired ekayang a chalojon a maysagoy ensekig a osap ched kilig na baybay tep naima-imag chiy kababaing. Sa-ki pay a kay-arigan cha, singen pasingsing iren naimaragwid chalan cha. Insaganen Afo Chiyos i dogad chiwa enbolinget cha sa-kod a kaykalebosan cha na ingked ingka.

14 Si Enoch a gwared mayka-nem a afo-afon Adam, inpadto tho nontan da maypangkep iren ma toon naiyantoro na nat podno. Tep kigwan to i “Matha yo, sigoradon on-oli dis Afo thayo, et kadgwaan iren ma dinibon esantoan a anghilis to. 15 Kowisen ton emiin i too, et chosaen ton emiin ira ma nat entahot cha si-katho kagol na ngaaw a imag cha tan ngaaw a kigwan chen iyaykontred si-katho.” 16 Sema iren too, naiyanriri ira na olay, tan nat iyap-apnek ira. Naiyonoran chiy ngaaw a kamkam na angel cha. Nainki-tek chiy angel cha, tan nachijaw chiy echom cha say a-daen chiy piyan cha.

17 Nem si-kayon ensemek ko, enog i diningding iwa inpadto iren ma apostolis Jesu Criston Afo thayo. 18 Kigwan ched si-kayo i “No onmothok aliy kaonoran a akow, igwa ira diy mengang-angjed si-kayo. Onoran chiy ngaaw a kamkam na angel cha.” 19 Si-kariy naengipasi-jan cha si-kayo. Naintorayan ira na dekna ra, tan nagwariy Ispirito Santod si-kara.

20 Nem si-kayon ensemek ko, pekedkedsang joy pamati yo babaen na pengonod jo na kasantoan a toro-toron napiyati yo. Ibaga yo i Ispirito Santoy mengitorong cha si-kayo no mankararag kayo. 21 Enog i binekan i semek Afo Chiyos cha si-kayo, no diket pan-anos kayon mansesked na akow alin kay-i-kanan jo na biyag a nagwariy pengingkaan to kagol na kaasin Jesu Criston Afo thayo. 22 Kaasii yo ira ma manchegwa-chegwa say pekedsang joy pamati ra. 23 Chemet jo ira ma esaol say eg ira ma-kas cha afoy. Kaasii yo ira ma mabesol, nem beneki yoy ngaaw a naimag cha a singen ngithin onmansa, nahol ni ma-gwis kayon mengonod cha si-kara.

24 Sapay koma mechejaw si Afo Chiyos a mebedin a manbantay cha si-kayo say eg kayo maysokbab kagol na basol. Ipaskep to kiyed manikal a sangoanan to, tan nagwaren polos i kaybasolan tayo, tan epalado diy chadsak tayo. 25 Sapay koma mechejaw si Afo Chiyos a sa-sa-kin agpayson Chiyos a engisalakan cha si-kathayo babaen Jesu Criston Afo thayo. Si-kathoy kahejangan tan manakabalin a nagwariy pengingkaan na karebengan to manipod nonta kapkapoanan tan niman tan ingked ingka. Amen.