Sema Iren Anak Afo Chiyos
3
Nemnem jo i banay a pasiyay semek Afo Chiyos cha si-kathayo. Say kaamtaan na kabenay to, nainbilang to kiyen anak to. Agpayson anak to kiyen Afo Chiyos. Nem sema iren eg naematid si-katho, nat egwathan chiy kasasaad tayon aanak to tep nat amta res Afo Chiyos a Awa thayo. 2 Si-kayon ensemek ko, anak to kiya wen Afo Chiyos, nem nat egwathan tayo nin a pasiyay panbalinan tayo. Nem sema egwathan tayo nowan i no on-oli di mowan si Cristo, ingesen tayo tep metaen tayoy koston kay-ingesan to. 3 Isonga, sema naiyannamnamed Cristo, si-kathoy naengipaha-pahat a eg manbeso-besol say edinis i panbiyag to na olay a inges tos Cristo.4 Emiin a naiyanbasol, eg cha naiyonoran i bili-bilin Afo Chiyos tep say piyan ton a-seden na basol, nat pengonod niwa bili-bilin Afo Chiyos. 5 Amta thayo pay i kimowan alis Cristod ja dobong say a-kalen toy basol na too, tan si Cristo, nagwariy basol ton polos. 6 Isonga, sema toon iyayka-chom cha Cristo, nat manbeso-besol. Nem sema naiyanbaso-basol, eg to egwathan no siyes Cristo tan eg to amta.
7 Si-kayon anak ko, pantanchaan kayo say nagwariy menaol kayo. Sema naengamag na mapteng, si-kathoy maronong a inges tos Jesu Criston oltimon maronong. 8 Nem sema naiyanbaso-basol, iyayka-chom cha Diablo tep naiyanbaso-basol i Diablo nonta manipod na kapoanan. Say kagol a kimowanan ali na Anak Afo Chiyos chiya dobong, say omasen toy obda na Diablo. 9 Isonga, sema toon anak Afo Chiyos, eg manbeso-besol tep sema ogadin Afo Chiyos, gwared si-katho, tan nat mebedin men manbeso-besol tep anak men Afo Chiyos. 10 Say pesing ton mengidasin na aanak Afo Chiyos tan aanak Satanas, sejay a sema nat naengamag na mapteng tan sema eg naiyanmek na echom to, nat anak Afo Chiyos.
Mesepol A Mesmek I Echom Tayo
11 Sema toron inki-ngelan jo nonta kapoanan na inpamati yo, sejay a mesepol a mansisinemek kiya. 12 Nat maonoran komes Cain tep si Cain, iyayka-chom cha Satanas tan biyono thos ahi thon Abel. Sema kago na emonoan to, ngaaw i ogadi tho, nem si Abel ngo, mapteng i ogadi tho. a 13 Isonga, aahik, eg kayo masmasdaaw no sema iren eg naemati, en-owes cha kayo. 14 Angkena tep amta thayo i nonta aneng kiya nin memati, singen etiy kiya la, nem niman gwariy biyag tayon nagwariy pengingkaan to. Amta thayo i podno man tep ensemek tayoy echom tayon naemati. Nem sema eg naiyanmek na echom to, singen etiy pay laeng. 15 Tep sema naengowes na echom ton naemati, inges toy emono. Et amta yo i say emono, nagwariy biyag ton nagwariy pengingkaan to. 16 Sema pesing tayon mengamta na podnon semek, in-i-kan Cristoy biyag to para cha si-kathayo. Isonga, isagana thayo koma ngon i-kan i biyag tayo para cha echom tayon naemati. 17 Nem angken siyen toon gwariy kebedinan to iy dinmo tho i kolang i kasepolan na echom to et eg to kaasian a mengi-kan, nat mebedin a agpayson ensemek tos Afo Chiyos. 18 Si-kayon anak ko, sema pesing tayo komen menmek cha echom tayo, nat cha ese-esel bengat, no diket epasnek koma tan maybiybiy koma ngod ma nainpasing tayo.
19 No naiyansisinemek kiya, si-kathoy pengamtaan tayo i iyayka-chom kiyed Afo Chiyos a sema podno. Isonga, nagwariy tahot tayod sangoanan Afo Chiyos 20 angken amta thayod nemnem tayo i mabesol kiya. Tep amta thayo i mas naepiyal i pengowis Afo Chiyos iy say pengowis tayo, tan amta thon emiin. 21 Si-kayon ensemek ko, no nat ekonsinsiya kiya, nat entahot kiyen onkowan cha sangoanan Afo Chiyos. 22 Angken nengoy ibaga thayod si-katho, i-kan to tep napiyati thayoy bili-bilin to tan naimag tayoy piyan to. 23 Sema inbilin tod si-kathayo, mesepol a memati kiyed Anak ton si Jesu Cristo tan mesepol a mansisinemek kiyen inges toy inbilin Jesu Cristo. 24 Sema mengonod na bilin Afo Chiyos, naimonong cha Afo Chiyos, et si Afo Chiyos, naimonong cha si-katho. Et say kaamtaan to i naimonong si Afo Chiyos cha si-kathayo, gwared si-kathayoy Ispirito Santon in-i-kan to.