Si Cristoy Mengitakchel Cha Si-kathayo
2
Si-kayon anak ko, kowan isolat iyay cha si-kayo say eg kayo manbesol, nem no gwariy manbesol, gwara ngoy mengitakchel kiyed Afo Chiyos a Awa thayo. Sema mengitakchel kiya, si-kathos Jesu Criston nagwaren polos i basol to. 2 Tep si Cristoy iyaytangdal cha Afo Chiyos say ikaro thoy chosa na basol tayo et say mepekawanan, tan nat sema basol mi bengat, nem sema basol ngo na emiin a tood ja dobong.Bili-bilin Afo Chiyos
3 Say pesing a mengisigoradon agpayson amta thayos Afo Chiyos, patien tayoy bili-bilin to. 4 No gwariy naengowan i amta thos Afo Chiyos iy eg to patien i bilin to, maitek tan eg to napiyatiy podno. 5 Nem sema naemati na ese-esel Afo Chiyos, nagwariy kolang na semek tod Afo Chiyos. No patien tayos Afo Chiyos, si-kathoy sigoradon kaamtaan to i iyayka-chom kiyed si-katho. 6 Isonga, sema naengowan i iyayka-chom cha Afo Chiyos, mesepol a onoran toy ogadin Jesu Cristo.
7 Si-kayon ensemek ko, nat badon bilin iyay a kowan isolat cha si-kayo tep sigod da iyay. Manipod nonta kapoanan na inpamati yo, inki-ngelan jo ma bilin a mesepol a mansisinemek kayo. 8 Nem sema bilin, singen bado ngo tep iyaytongpal cha biyag Cristo tan sema nainpanbiyag jo wa niman. Tep emangkaomas maliy enbolinget, tan mandingsi wiy podnon silow.
9 No gwariy naengowan i gwared kawad-an na silow iy maramen naengowes na echom to, gwara pay laeng cha kawad-an na enbolinget. 10 Nem sema naiyanmek na echom to, si-kathoy gwared kawad-an na silow, isonga nagwared si-kathoy panbasolan to. 11 Nem sema naengowes na echom to, gwara pay laeng cha kawad-an na enbolinget. Singen man-aahad cha kawad-an na enbolinget, tan eg to amtiy konan to tep ekorab kagol na enbolinget.
12 Kowan isolat iyay cha si-kayon aanak ko tep epakawanan iriy basol jo na kagol Cristo. 13 Kowan isolat iyay cha si-kayon iyangkaama tep amta yos Jesus a sigod a gwara ngorechan nonta kapkapoanan. Kowan isolat iyay cha si-kayon bedoleki tep igwak jos Satanas. 14 Kowan isolat mowan iyay cha si-kayon aanak ko tep amta yos Afo Chiyos a Awa thayo. Kowan isolat mowan iyay cha si-kayon iyangkaama tep amta yos Criston sigod a gwara ngorechan nonta kapkapoanan. Kowan isolat mowan iyay cha si-kayon bedoleki tep mahedsang kayo, tan sema esel Afo Chiyos, gwara na olay cha si-kayo tan igwak jos Satanas.
15 Enog i sinmek i nainpasi-pasing na tood ja dobong a naiyaykontred piyan Afo Chiyos. Tep no ensemek jo ira man, nagwara ngoy semek jod Afo Chiyos a Awa thayo. 16 Tep sema emiin a ngaaw chiya dobong a inges toy pengamkam na toon naiyanbasol, sema pemingil cha na naniyengneng cha, tan sema pengiki-tek cha na kasasaad na biyag cha tan kokowa ra, nat naedafod Afo Chiyos a Awa thayo, no diket naedafod ja dobong. 17 Et seja dobong tan emiin a napiniya-piyan na too, emangkaomas, nem sema toon naengamag na piyan Afo Chiyos, gwariy biyag ton nagwariy pengingkaan to.
Sema Mahakontren Cristo
18 Si-kayon anak ko, chanchani wiy pantepos niya timpo. Inki-ngelan jo walen gwariy sa-ki din mengontren Cristo. Et angken niman, kimowan maliy chakel a naengonkontren Cristo, isonga amta thayoy chanchani wiy pantepos niya timpo. 19 Sema iren naengonkontren Cristo, singen iyayka-chom ired si-kathayo nontan, nem enchi gayam, isonga inpayas cha kiya. Tep no agpayson iyayka-chom ired si-kathayo, imeket koma ira. Nem sema inpangipayas cha kiya, si-kathoy kaamtaan to i nagwara gayam cha si-kara i agpayson echom tayo.
20 Nem si-kayo ngo, gwared si-kayoy Ispirito Santon in-i-kan Cristo, isonga amta yon emiin i podno. 21 Sema kagol a kowan isolat iyay cha si-kayo, nat sema kowan kona i nat amta yoy podno tep amta yo ngorechan. Tan amta yo ngo la i nagwariy ite-itek a naedafod ma podno.
22 Sema maitek, si-kathoy naengowan i si Jesus, nat sema Cristo. Angken siyen toon naengowan niwan, si-kathoy mahakontren Cristo, tan eg to igwat si Afo Chiyos a Awa tan si Jesu Cristo ngon Anak to. 23 Tep angken siyen toon eg mengegwat Anak Afo Chiyos, eg to ngo egwathen si Afo Chiyos a Aweto, nem angken siyen toon mengegwat Anak Afo Chiyos, egwathen to ngos Aweto.
24 Isonga, sema iren inki-ngelan jo na kapoanan na inpamati yo, ipaonong jon pasiyed nemnem jo. Tep no pesing jo man, gwara kayo na olay cha Jesu Cristo tan si Afo Chiyos a Aweto. 25 Et sema inkarin Cristod si-kathayo, si-kathoy biyag a nagwariy pengingkaan to.
26 Insolat ko jay maypangkep iren ma piyan chen saolen kayo maypangkep na podno. 27 Nem si-kayo ngo, gwara na olay cha si-kayoy Ispirito Santon in-i-kan Cristo, isonga eg jo mesepol a gwariy echom a mengitoro kayo. Tep sema Ispirito Santo, naintoro thon emiin i kasepolan jon amtaen, tan sema emiin a naintoro tho, podno, nat itek. Isonga, onori yo ngo ma intoro na Ispirito Santo tan onong kayo ngod Cristo.