Sema Pesing A Mengidasin Na Podno Tan Sema Nat Podno
4
Si-kayon ensemek ko, enog i piyati iren emiin iwa naengowan i say naintoro cha, edafod Afo Chiyos, no diket icho-pet jo et a chili say idasin tayo no sema nakigwan cha, agpayson edafod Afo Chiyos. Tep chakel i naiyan-ite-itek a profiten iyanpara-parang chiya dobong. 2 Et sema pesing jon mengamta i sema naintoro cha, edafod Ispiriton Afo Chiyos, nakigwan cha i si Jesus i Criston iyanbalin na too. a 3 Nem no eg cha nakigwan iwan, nagwares Afo Chiyos cha si-kara, et sema naintoro cha, edafod ispirito na Naengontren Cristo. Inki-ngelan jo wala i mankokowan ma ali ma Naengontren Cristo, et angken niman, gwariy kakontren Cristod ja dobong.4 Nem si-kayon anak ko, anak to kayon Afo Chiyos tan igwak jo ira ma maite-itek tep eg cha kayo siyaol. Tep si Afo Chiyos a gwared si-kayo, mas banay i panakabalin to iy say si Satanas a gwara ired ma eg naemati. 5 Sema iren naengitoro na ite-itek, iyayka-chom ired naengontren Afo Chiyos, isonga sema naintoro cha, iyantotonos i nemnem iren ma naengontren Afo Chiyos, et sema iren eg naemati, nainki-ngelan cha ira. 6 Si-kawi ngo, iyayka-chom kawid Afo Chiyos. Sema ngo iren mahaamten Afo Chiyos, nainki-ngelan cha kawi, nem sema iren eg iyayka-chom cha Afo Chiyos, eg cha kawi nainki-ngelan. Et si-kathoy pesing tayon mengidasin na podnon naedafod Ispirito Santo tan sema ite-itek a naedafod Satanas.
Si Afo Chiyos I Naedafoan Na Semek
7 Si-kayon ensemek ko, mesepol a mansisinemek kiya tep si Afo Chiyos i naedafoan na semek. Isonga, sema naiyanmek na echom to, si-kathoy anak Afo Chiyos tan agpayson amta thos Afo Chiyos. 8 Nem sema eg naiyanmek na echom to, eg to ngo amtes Afo Chiyos tep si Afo Chiyos i naedafoan na semek. 9 Sema inpasing Afo Chiyos a engibiybiy na semek tod si-kathayo, into-no tho diy sa-sa-kin Anak tod ja dobong say gwared si-kathayoy biyag a nagwariy pengingkaan to kagol na imag na Anak to para cha si-kathayo. 10 Sema itsora na semek a nagwariy kolang to, nat semek tayod Afo Chiyos, no diket sema semek Afo Chiyos cha si-kathayo. Et inbiybiy Afo Chiyos cha si-kathayo ma semek to nonta into-no thos Anak ton mengikaro na chosa na basol tayo say mepekawanan.
11 Si-kayon ensemek ko, no setan i inpasing Afo Chiyos tep epaladoy semek tod si-kathayo, mansisinemek kiya koma ngo. 12 Angken nagwariy eni-neng Afo Chiyos, no naiyansisinemek kiya, kaonong si Afo Chiyos cha si-kathayo. Et sema semek ton nagwariy kolang to, etongpal med biyag tayo.
13 Say pesing tayon mengamta i kaonong kiyed Afo Chiyos tan kaonong ngos Afo Chiyos cha si-kathayo, in-i-kan Afo Chiyos i Ispirito thod si-kathayo. 14 Sini-neng min mismoy Anak Afo Chiyos tan ingwanggwang mi i into-no din Afo Chiyos cha dobong say si-katho komay mengisalakan na too. 15 Angken siyen toon mengipaamta i si Jesus i Anak Afo Chiyos, kaonong cha Afo Chiyos tan kaonong ngos Afo Chiyos cha si-katho. 16 Et amta thayo tan patien tayo i ensemek to kiyen Afo Chiyos.
Masmek si Afo Chiyos. Sema mahasemek Afo Chiyos tan echom, kaonong cha Afo Chiyos tan kaonong ngos Afo Chiyos cha si-katho. 17 No si-kathoy panbiyag tayo na olay, nagwariy kolang na semek tayo di. Et no onmothok aliy akow na pengowis Afo Chiyos na too, nagwariy metekothan tep sema ogadi thayod ja dobong, inges to ngod ogadin Cristo. 18 Isonga, no gwara na olay i semek, nat mebedin a gwara ngoy tahot tep sema semek a nagwariy kolang to, chagchagen toy tahot. Nem no gwariy toon mathekot tep nachimana-chanag maypangkep na chosen Afo Chiyos, kolang pay laeng i semek to.
19 Ensemek tayo iriy echom tep si Afo Chiyos, edagwas i semek tod si-kathayo. 20 Angken siyen toon naengowan i ensemek tos Afo Chiyos iy maramen en-owes toy echom to, maitek. Tep no eg to ensemek i echom ton nasini-neng to, nengoy pesing ton menmek Afo Chiyos a eg to nasini-neng? 21 Sejay i bilin Afo Chiyos cha si-kathayon angken siyen toon mahasmek Afo Chiyos, mesepol a sesmeken to ngoy echom to.