Natiyoroan To Kiyen Afo Chiyos A Awa Thayo Babaen Na Diga-digat
12
Seja iren tothoon mahedsang i pamati ra nontan da, singen banay iren gropon naaalibongbongan a kebinoyed si-kathayo, et naiyaypakedsang i nemnem tayo kagol na pamati ra. Tep si-kathayon naemati, singen may-arig kiyed mekidongba. Isonga, maonoran komay naimag na mekidongba say ma-kal i kompormin naenaktak cha si-kathayo, pati basol a naemedbed cha si-kathayo. Et memasig kiya komen memtik a mapkes chiwa dongben inbilin Afo Chiyos cha si-kathayo. 2 Maytofog komay nemnem tayod Jesus tep si-kathoy naengibalnay kiya maypangkep na pamati thayo tan si-kathoy oltimon naesi-nengan na pamatin gwara koma ngod si-kathayo. Intoled ton iyaydansed koros, tan eg to piyagan-anoy kel-ing na tood si-katho kagol na chadsak a iyamta thon egwathen to no mekcheng miy digat to. Et niman, mantoktokkong med gwanan Afo Chiyos cha dangit a mekitoray.3 Nemnemnem jon pasiyay inpasing Jesus a iyano-anosan toy epaladon inpangontra na managbasol cha si-katho say eg kayo mebdiy tan eg kayo pay medismaya. 4 Tep angken edigathan kayo kagol na nainpandaban jo na basol, nagwara nin cha si-kayoy etiy kagol niwan. 5 Diningding jo ayay kigwan Afo Chiyos cha si-kayon aanak to say maypakedsang i nemnem jo? Kigwan to i:
“Anak ko, enog i dinisjon no toroan token Afo Chiyos,
tan enog i dismaya no ibonget toka.
6 Tep si Afo Chiyos, natiyoroan toy ensemek to,
tan nachiyosa thoy emiin a nainbilang ton aanak to.” a
7 Isonga, anosi yoy diga-digat a namimothok cha si-kayo tep si-kathoy naiyosal Afo Chiyos a mengitorod si-kayo. Tan seman i naengamtaan jo i nainbilang to kayon Afo Chiyos a aanak to. Tep nagwariy anak a nat natiyoroan na aweto. 8 Isonga, no nat natiyoroan to kayon Afo Chiyos tan nat nachiyosen to kayo, nat agpayson anak to kayo, no diket singen iyayka-daw kayo bengat. Tep emiin a aanak Afo Chiyos, natiyoroan to ira tan nachiyosa tho ira. 9 Say awa thayo ngod ja dobong, chiyosa ra kiya, et rinispiktar tayo ira tep imag cha man. Isonga, sinto pay ipatoray tayo komay angel tayod Awa thayod dangit say gwariy biyag tayon nagwariy pengingkaan to. 10 Tep say awa thayod ja dobong, chiyosa ra kiya na kemtang bengat ingkathod bimadeg kiya wa, tan nonta chiyosa ra kiya, imag cha bengat i gwared nemnem chen kon-oren tayo. Nem si Afo Chiyos, podnon amta tho i kon-oren tayo, tan nachiyosa tho kiya say mesantoan kiyen inges to. 11 Podnon no mechosa kiya, eg kiya maradsak tep ensahit. Nem no mepalabas maliy chosa thayo iy metoroan kiya wa, mapteng i panbanagan to tep onmapteng i a-magen tayo tan ontalnay nemnem tayo.
Mechosa Iriy Memneg Cha Afo Chiyos
12 Isonga, angken singen kimapsot kayo tan iyabdiy kayon pasiya tep diya-kaman joy chakel a diga-digat, pekedsang joy nemnem jo tan petpeti yoy pamati yo. 13 Itolo-toloy jon man-ekad cha chalan na kinachonong say sema iren gwariy pamati ren singen epilay, nat mema-may chegwa-chegwa ra, no diket onkedsang i pamati ra.
14 Ipahat joy kabaalan jon mekiolnos cha emiin a tothoo. Tan kayko-tig kayon onoran joy esantoan a panbiyag tep say toon nat esantoan, nat mebedin a si-nengen tos Afo Chiyos. 15 Tanchaani yo i nagwared si-kayoy memneg na kaasin Afo Chiyos. Tanchaani yo pay i nagwariy manbalin a singen enpait a do-bet a onsimit a naiyandawes na sabirong, nahol ni chakel cha si-kayoy ma-dinan na sabirong to et mengemag kayo na ngaaw a inges to ma too. 16 Tan tanchaani yo pay i nagwared si-kayoy menarog na nat imbaliy to tan nagwared si-kayoy inges tos Esau a eg to niyemnem si Afo Chiyos. Tep si Esau, insa-dat toy karebengan ton kafangodowanan a anak na sa-kin pangan bengat. 17 Amta thayo i nonta iyakcheng, iyanbabawis Esau na imag to tep piyan ton bindisjonan aweton iyaybagay cha si-kathon kafangodowanan. Nem angken iyanpakpakaasin kenangi-nangis, nat mebedin tep nagwara wiy pesing a mena-dat niwa iyanpa-noan na imag to.
18 Memasig kiyen memati tep sema nainpasing tayon on-esop cha Afo Chiyos, afil cha inpasing ira na afo-afo thayo len imesop cha si-katho. Tep sema iren afo-afo thayo la, insofan chiy mahasi-neng chen Chontog a Sinai a emangkepooli, tan enbolinget chiwan a dogad tan mapkes a chiliy chahem. 19 Et inki-ngelan cha pay i trompita tan sema esel Afo Chiyos. Nonta inki-ngelan chiy kigwan Afo Chiyos cha si-kara, ekiadok ira i nagwara wiy konen to. 20 Tep ketahot iren pasiya tep inbilin Afo Chiyos i “No gwariy onkathin chiya chontog, angken animal bengat, chedtogen cha et say metiy.” b 21 Sema sini-neng iren ma tothoo, podnon emanekot, et angken si Moses, kigwan to i “Ketahotak tan manbabayedberak.” c
22 Nem si-kathayo, imesop kiyed chontog a Zion tan Jerusalem cha dangit a siyodad na sibibiyag a Chiyos. Chiwan pay i naiyan-iyanan na dinibon anghilis a maradsak a kechinayaw cha Afo Chiyos. 23 Sema imesofan tayo, chiwan i esi-nofan na emiin a nainbilang Afo Chiyos a kafangodowanan a aanak ton iyaysolat i ngaran ched dangit a iyayka-choman tayo. Chiwan pay i kad-an Afo Chiyos a naengowis na emiin a tothoo. Tan chiwan pay i kad-an na ispiritos na emiin a maronong a tothoon iyangketiy den nagwara wiy kolang cha. 24 Imesop kiya pay cha Jesus a enolong a engitakchel na badon tolagan Afo Chiyos. Tan sema chala tho, singen iyaypelkid si-kathayo say medinisan kiyed basol tayo. Tan sema chala tho, mas mapmapteng iy say sema chalen Abel tep say iyanbanagan na pathiy Abel, bales bengat, nem say iyanbanagan na pathiy Jesus ngo ket, kaysalakanan.
25 Isonga, tanchaani yo i eg jo bebnekan i niyankonen Afo Chiyos. Tep no chiyosen Afo Chiyos iriy afo-afo thayo la nontan da tep nat imag chiy kigwan tod si-kared Chontog a Sinai chiya dobong, mas sigoradon chosaen to kiya ngo no eg tayo a-magen i towan kona did dangit cha si-kathayo. 26 Tep nonta imesel si Afo Chiyos cha Chontog a Sinai nontan da, sema panakabalin na esel to, injegjeg toy dobong. Nem niman ma, gwariy inkari thon nat etongpal nin a kigwan to i “Pinsak pay ijegjeg koy dobong, et nat dobong bengat, nem pati dangit pay.” d 27 Nonta kigwan Afo Chiyos i pinsak pay i ijegjeg toy dobong, piyan ton a-seden i emiin a piyarsowa thon mebedin a mayjegjeg, mepokaw say sema nat mebedin a mayjegjeg, on-onong.