3 Kagol na pamati thayo, egwathan tayo i piyarsowen Afo Chiyos i emiin cha esel to bengat. Isonga, amta thayo i seja emiin a naesi-neng, edafod nat naesi-neng.

4 Nemnemen tayos Abel. Kagol na pamati tho, mas mapmapteng i intangdal tod Afo Chiyos iy say intangdal na ahi thon Cain. ^a Et kagol na pamatin Abel, inbilang Afo Chiyos a maronong. Sema kapaneknekan to, igwat Afo Chiyos i intangdal to. Isonga, angken etiy males Abel, gwara pay laeng i naintoro thod si-kathayon maypangkep na pamati.

5 Si Enoch pay nontan da, kagol na pamati tho, nat etiy, no diket inkayang den Afo Chiyos iy sibibiyag pay. ^b Isonga, angken naina-inap ched ja dobong, nat sipol cha tep inkayang malen Afo Chiyos. Tan kigwan tod esel Afo Chiyos i nontan a timpon gwares Enoch chiyed dobong, naechadsahan si Afo Chiyos cha si-katho. 6 Say podno, no nagwariy pamati na too, nat mebedin a pechadsak tos Afo Chiyos. Tep sema piyan ton on-esop cha Afo Chiyos, mesepol a patien to i gwares Afo Chiyos. Mesepol pay a patien to i gwariy i-kan Afo Chiyos a kongkoned ma mahapiyan a mengamted si-katho.

7 Nemnem jo wes Noah. Kagol na pamati tho, piyati thoy inbanchen Afo Chiyos maypangkep na jowjow ali angken eg to nin sini-neng. Isonga, imag toy inbilin Afo Chiyos, et engamag na bapor a pandoganan to tan pamilja tho say nat melned ira. ^c Kagol na ematian Noah cha Afo Chiyos, inbilang Afo Chiyos a maronong, nem emiin a echom a toon gwared dobong, chiyosa iren Afo Chiyos tep eg ira ematid si-katho.

8 Sa-ki ngo pay si Abraham a engamag na piyan Afo Chiyos kagol na pamati tho. Tep nonta inbilin Afo Chiyos cha si-katho i onkowan cha afil a ilin ipatawid Afo Chiyos cha si-katho, dimayat si Abraham a chakos, angken eg to amtiy konan to. ^d 9 Tan kagol na pamati tho, naiyan-ano-anos a naiyan-iyan cha etolchaan a singen bisita bengat chiwa ilin inkarin Afo Chiyos cha si-katho. Et inges to ngod Isaac a anak Abraham tan si Jacob a afon Abraham. Naiyan-iyan ira ngod etolchaan, angken inkarin Afo Chiyos i tegwiren cha ma ili. 10 Iyano-anosan Abraham ira jay a emiin tep sinigorado tho i mekiiyan chiwa siyodad a imag Afo Chiyos cha dangit a nagwariy pengingkaan to.

11 Tan si Sarah a imbaliy Abraham, gwara ngo pay i pamati tho. Angken ebasig tan eba-kol ma, in-i-kan Afo Chiyos i kabaalan ton man-anak tep piyatin Sarah i naepiyal si Afo Chiyos tan tongpalen toy inkari tho. ^e 12 Isonga, angken nat mahapotot komes Abraham tep aama wa, chimakel i poli-poli tho. Et nat mebedin a mebilang i poli tho tep sema bilang cha, singen inges toy bilang na pasingsing cha iyaykayang tan pasil cha kilig na baybay.

13 Seja iren emiin a tothoo, nonta etiy ira, emati pay ired Afo Chiyos. Angken eg cha pay igwat i inkarin Afo Chiyos cha si-kara, singen tiyakmang cha ma may-i-kan cha si-kara no sa-ki din akow, et echadsahan ira. Et basta sibibiyag ira, inpaamta ra i bisita bengat iren nagwariy podnon ili red ja dobong. 14 Say tothoon seman i nemnem cha, nainpaamta ra i gwariy sa-kin dogad a konan chen podnon ili ra. 15 Sema ilin naniyemnem cha, nat sema ilin bintihan cha tep no seman, mahaoli ira komed man. 16 Sema ilin piyan chen konan kitdi, mas mapmapteng a ilin gwared dangit. Isonga, nat enbaing si Afo Chiyos a naengaranan a Chiyos cha. Et amta thayo i podno jay tep engisagana wales Afo Chiyos na siyodad a pan-iyanan ched dangit.

17 Nemnemen tayos Abraham mowan. Kagol na pamati tho, tiyongpal toy inbilin Afo Chiyos nonta pichas Afo Chiyos a itangdal Abraham i anak ton Isaac. Esaganes Abraham a a-magen to ma inbilin Afo Chiyos angken sa-sa-kin anak tos Isaac, tan inkarin Afo Chiyos i chakel aliy polin Abraham babaen Isaac. ^f 18 Tep kigwan Afo Chiyos cha Abraham nontan i “Si Isaac bengat i kedepoan na poli-polim ali.” ^g

20 Si Isaac pay, piyati tho i tongpalen Afo Chiyos i inkari tho, et kagol na pamati tho, binindisjonan Isaac iriy potot ton si Jacob tan si Esau. Et kigwan tod si-kara i gwara iriy bindisjon a i-kan Afo Chiyos cha si-kara no sa-ki din akow. ^h

21 Inges to ngod Jacob. Inbiybiy to i mahedsang ngoy pamati tho. Tep nonta chanchanin metiy, binindisjonan to ira ma afo thon potot Joseph. Nonta imag to man, iyaralan to ngoy kosnod to et chijaw tos Afo Chiyos. ⁱ

22 Si Joseph pay, kagol na pamati tho, nonta chanchanin metiy, kigwan toy maypangkep na ibetik ira na poli-polin Israel cha Egypt. Et inbilin to pay i itahin chiy pohel to no onbetik ira say ibeka red ma ilin konan cha. ^j

23 Sema parintis Moses, gwara ngoy pamati ra. Isonga, nonta ihay-anak Moses, in-emot cha na tedon bolan tep mita ren gwariy kaafilan ton mapteng. Nat timahot iren engamag niwan angken inbilin na arid Egypt i emiin a ihay-anak a dalekin aanak na Hodjos, mesepol a bonoen cha ira. ^k

24 Tan si Moses pay, gwara pay i pamati tho. Tep nonta bimadeg ma, eg to piyan a maybilang a anak niwa biin emadeg angken sema bii, potot Pharaoh a arid Egypt. ^l 25 Say piyan Moses kitdi, mayka-chom cha echom ton Hodjon toon Afo Chiyos, angken mekida-kam na diga-digat cha. Tep piyategan to pay i kayka-chom tod tothoon Afo Chiyos iy say kanas na basol a naepohaw a chakos. 26 Tep niyemnem Moses i mas mapmapteng a man-anos a nadiyamsis cha kagol na ematian tod Cristo iy say pengeda tho na emiin a kinabaknang cha Egypt. Tep singen natiyakmang to na olay i kongkonen i-kan Afo Chiyos cha si-katho no sa-ki din akow.

27 Et kagol na pamatin Moses, bintihan toy Egypt, tan nat tikothan toy bonget na ari. Angken diya-kaman toy chakel a diga-digat, iyan-ano-anos tep singen nasini-neng to na olay si Afo Chiyos a nat masi-neng. ^m 28 Kagol na pamatin Moses, inbilin to ired ma echom ton Hodjos i a-magen cha koma no ito-non Afo Chiyos i anghil ton memonon emiin na kafangodowanan cha Egypt. Kigwan to i ipelki riy chala na kalnirod bengbeng na baliy cha say no onda-bas iwa anghil, eg to bonoen i kafangodowanan a aanak cha. Sejay i timpon tiyakchelan Moses i Piyasta na Inda-bas na Anghil cha Hodjos. ⁿ

29 Kagol na pamati na Hodjos, chidan chiy Depang a Baybay a singen man-aahad ired emahen chaga. Nem nonta pichas na i-Egypt a mengonod cha si-kara, iyalned a emiin ira ma i-Egypt.^o

30 Tan kagol na pamati na Hodjos cha Afo Chiyos, sema ekayang a tofing a dinigwed to ma siyodad na Jericho, etongba nonta kincheng na Hodjos a dinigwe-digwen cha ma siyodad na pithon akow. ^p 31 Gwara pay chiwa siyodad i biin engaranan na Rahab a naekidahi-dahi. Kagol na pamati thod Afo Chiyos, sinintil to ira ma into-non Moses a mandipdip chiwa siyodad, et tiyolongan to ira. Isonga nat inpakibono ra ired ma kaidian ton nat ematid Afo Chiyos. ^qr

32 Chakel pay komay mebedin a konen ko maypangkep na pamati na afo-afo thayo la, nem nat on-anay i timpo no iistoriyak cha si-kayos Gideon, si Barak, si Samson, si Jephthah, si David, si Samuel, tan sema iren profita. ^s 33 Seja iren emiin, gwariy pamati ra. Tan kagol na pamati ra, gwariy echom a engagwak cha kobat na echom a ili, iyantoray i echom na kosto-kosto, tan igwat na echom i inkarin Afo Chiyos. Sema echom, tinmem chiy lion say nat kedathen ira na lion. 34 Echom pay, eg ira epoolan nonta inba-tok cha ired birangdang a afoy, tan echom pay ngo, bintihan cha iriy memonod si-kara. Ekapsot i echom, nem inpakedsang iren Afo Chiyos. Echom pay, etoled iren ekidaban cha kobat, et inpabtik cha iriy edafod afil a ili say mekidaban ired si-kara. 35 Gwara pay i bibiin iyangketiy i anak chen iyanpanpawil.

Nem gwara ngo pay iriy echom a epadigat ingkathod ingkathiy cha tep nat piyan chen bebnekan i pamati ra et say maybolos ira. Tep sema chiyan namnamaa, sema kamaptengan a biyag cha dangit no manpawil ma ira. 36 Echom pay, paladon dinisjon cha ira tan siyepdat cha ira. Echom pay, kiyadinaan cha ira tan inkalebos cha ira. 37 Gwara pay ira chinchintog cha ingkathod etiy ira. Echom pay, inpanchegwa riy angel cha na dakari, tan sema echom pay, biyono ra ira na ispada. Sema baro na echom, bedat bengat na kalniro tan kanching. Nagwaren polos i kokowa ra, tan napiyadigat ira na tothoo tan ngaaw i ima-imag ched si-kara. 38 Sejay iren tothoo, naiyan-aha-ahad bengat ired dogad a nagwariy toon naiyan-iya-iyan tan chonchontog, tan naiyan-iyan ired dohang tan ebot cha chaga. Nem say podno ket, sema iren tood ja dobong, nat iyaybagay iren mayka-chom cha si-kara.

39 Seja iren tothoon emiin, iyapolbaran iren Afo Chiyos kagol na pamati ra. Nem angken seman, eg cha igwat i inkarin Afo Chiyos. 40 Tep si Afo Chiyos, gwara liy niyemnem ton a-magen ton mas mapmapteng. Sema niyemnem to, mansesked a tongpalen toy inkari tho ired ma tothoo nonta bayag da ingkathod mayka-chom kiya cha wa pay. Et no mayka-chom kiya wed si-kara, si Afo Chiyos, panbalin to kiyen emiin a tothoon nagwaren polos i kolang to.