Intangdal Cristoy Angel Ton Mismo
10
Sema dinteg Moses, singen alichon bengat iren ma mapteng a i-kan Cristo. Isonga, sema iren naiyanchayaw cha Afo Chiyos, angken tiyawen a naintangdal cha ma iyaybilin chiwa dinteg, nat iya-kal a kolpiy basol cha. 2 Tep no iya-kal a kolpiy basol cha, nat intolo-toloy cha komen iyantangdal tep iyamtaan cha i edinisan miy konsinsiya ra. 3 Nem sema podno, seja iren intangtangdal cha na tiyawe-tawen, nainpalagip to i gwara pay laeng i basol cha. 4 Tep sema chala na bahen kalekian tan kanching, nagwariy kabaalan ton mengkal na basol.5 Seman i kagol a nonta chanchanin onkowan alis Cristo did ja dobong, kigwan tod Afo Chiyos i:
“Nat animal a naeparti tan nat sema iren ekila-kilasin
naiyaytangdal i piyan mo,
no diket emarsowa ka na angel para cha si-kak
say mahaamag koy piyan mo.
6 Tep sema iren animal a naepoolan
tan sema iren echom a
naiyay-i-kan a mengkal na basol,
nat seman iriy naengipachadsak cha si-kam.
7 Isonga, kowan kona i ‘Ajaak, Afo Chiyos.
Kimowanak ali say a-magen koy piyan mo,’ a
inges toy iyaysolat maypangkep cha si-kak
chiwed ma dibcho na dinteg.” a
8 Nemnemen tayoy banag na kigwan Cristo. Kigwan to nin cha Afo Chiyos i “Nat piyan moy animal a naeparti tan sema iren ekila-kilasin naiyaytangdal ono animal a naepoolan tan echom a naiyay-i-kan a mengkal na basol. Nat seman iriy mengipachadsak cha si-kam.” Kigwan Cristo man angken kigwan tod ma dinteg Afo Chiyos i mesepol a mengitangdal i tothoo. 9 Et kigwan ngon Cristo pay i “Ajaak, Afo Chiyos. Kimowanak ali say a-magen koy piyan mo.” Kigwan to man say ipaamta tho i ingkal toy sigod a nainpasing chen naengitangdal cha Afo Chiyos et say mesa-dathan niwa ingkaytangdal na angel ton mismo tep seman i piyan Afo Chiyos. 10 Et kagol na engamagan Jesu Cristo na piyan Afo Chiyos, edinisan kiyed basol tayo tep intangdal Cristoy angel to et nat mesepol men polos a a-magen to mowan.
11 Sema iren papari na Hodjos, gwiya-gwa-gwen naimakgwat iren a-magen chiy obda ra. Gwiya-gwa-gwen nain-i-kan chiy man-iinges a kilasin tangdal. Nem sema iren tangdal, nagwariy kabaalan chen mengkal na basol. 12 Nem si Cristo, pinsak bengat i ingkaytangdal na angel to para cha basol na tothoo, et on-anay ma iwan na ingked ingka. Sema kapaneknekan to, idi kincheng Criston engamag niwan, timokkong med ma gwanan Afo Chiyos. 13 Et igwan med man a manseseked na ka-gwak iren ma naengontred si-katho. 14 Kagol na sa-sa-kin ingkaytangdal Cristo, kiyolpi thon ingkal i basol na tothoo na ingked ingka et iyanbalin ma iren esantoan.
15 Sema Ispirito Santo ngo, nainpaneknek tod si-kathayo i podno ira jay kagol na inpasolat ton kigwan to i:
16 “ ‘Sejay i badon tolagan a a-magen kod si-kara
no sa-ki din akow,’ kigwan Afo Chiyos.
‘Ikamid ko iriy dinteg kod poso ra.
Singen isolat kod nemnem cha.’ ” b
17 Et gwara pay i inpaamta na Ispirito Santon kigwan Afo Chiyos a:
“Ekak ma nemnemnemen i basol cha
tan sema ngaaw a ima-imag cha.” c
18 Isonga, no epakawanan ma ira jay, nat mesepol i pengitangdal mowan.
Mebedin A On-esop Kiyed Afo Chiyos Kagol Cristo
19 Isonga, aahi, kagol na chalen Jesus a imayos nonta ingkathiy to, nat entahot kiyen onsekep cha podnon kad-an Afo Chiyos a naiyay-arig cha Kasantoan a Kwadto. 20 Sema ingkathiy Jesus, may-arig cha ingkabi-nik niwa kortinen ena-din niwa Kasantoan a Kwadto. Tep nonta intangdal Jesus i angel to, singen iya-kal iwa kortina say mahasekep iriy tothood ma Kasantoan a Kwadto. Nonta imag Jesus iwan, engamag na badon chalan say mahasagwi kiyed ma kad-an Afo Chiyos. Singen sibibiyag iyay a chalan tep sejay a chalan ket, si Jesus a sibibiyag. 21 Tan si Jesus, si-katho pay miy pari thayon nagwariy kay-ingesan to, tan natiyorayan ton emiin i iyayka-chom cha pamiljen Afo Chiyos. 22 Isonga, on-esop kiyed Afo Chiyos, et no a-magen tayo jay, podno komay nemnem tayo tan mahedsang komay pamati thayo. Tep amta thayo i edinisan kiyed basol tayon singen epelkian kiya na chalen Cristo, tan singen iya-mes i angel tayo pay na moling a chanom. 23 Tan mepetpetan i namnama thayon nainpodno thayo. Nat manchegwa-chegwa kiya koma tep naepiyal si Afo Chiyos tan tongpalen toy inkari tho. 24 Tan menemnem i pesing tayon mantitinolong say ma-ma-choman pay i semek tayo tan mapteng a aramid tayo. 25 Eg tayo isalsalcheng a mansi-si-nop a manchayaw cha Afo Chiyos a inges toy naimag na echom, no diket pankikinedsang kiya na nemnem tayo, agdalo iy amta thayo i man-eesop aliy akow a ioli din Cristo.
Memasig Kiyed Pamati Thayo
26 Tep no amta thayo wiy podno maypangkep Cristo et nainchoro-chorog tayon manbeso-besol, nagwara wiy mebedin a maytangdal a mengkal na basol tayo. 27 Nagwara wiy seseskeren tayo, malaksid niwa emanekot alin pengowis Afo Chiyos cha si-kathayo tan sema birangdang a afoy a towan poolin emiin i naengontred Afo Chiyos. 28 Nemnemen tayoy epasamak chiwa toon naiyandisjon na dinteg Moses nontan da. No gwariy chegwa ono tedon mantistigo i podnon iyanbasol, nagwaren polos i kaasi red si-katho, no diket nabiyono ra. 29 No inges nithan i chosa na naiyandisjon na dinteg Moses, mas enbelbel-at pay i chosen ma toon naiyandisjon na Anak Afo Chiyos tan naengibilang na chalen Criston nagwariy silbi tho, angken seman a chaliy naengitakchel na badon tolagan Afo Chiyos tan seman i iyandinis cha basol to. Sema toon naengamag niwan, nakiyel-ingan toy Ispirito Santon naengaasid si-kathayo. 30 Tep amta thayo i kigwan Afo Chiyos a “Si-kak i mahaamten mengibales. Si-kak i menosa ired ma naengamag na ngaaw.” d Kigwan pay Afo Chiyos i “Si-kak a Afo, si-kak i mengowis na tothook.” e 31 Isonga, emanekot a chilin meda-kaman iwa chosa na sibibiyag a Afo Chiyos.
32 Nemnem jo ma epalabas nonta esilowan i nemnem jo et emati kayo wed Cristo. Tep angken diya-da-kaman joy digat, iyano-anosan jo pay tan mahedsang pay i pamati yo. 33 No singka-chom nakiyel-ingan cha kayo tan napiyadigat cha kayod sangoanan na chakel a too. No singka-chom pay, naekida-kam kayod echom jo na digat cha tep nakiyaasian jo ira. 34 Tep naiyaykaasian kayod echom jon iyaykalebos. Et nonta piningil chiy kokowa yo, iyanosan jo, tan iyanchadsak kayo et tep amta yo i igwed si-kayo iriy mas mapmapteng pay a nagwariy pengingkaan to kagol na pamati yod Cristo. 35 Isonga, itole-toled jo tep no itolo-toloy jon memiyal cha Cristo, banay i kongkona yo. 36 Tep mesepol a memasig kayon man-ano-anos say no tongpalen jo waliy piyan Afo Chiyos, egwathen joy inkari tho. 37 Tep kigwan tod esel Afo Chiyos i:
“Sema onkowan ali, onmothok ali no eng-engkay,
et nat medaraw.
38 Sema tothook a inpachonong ko,
manbiyag ira babaen na pamati ra,
nem no gwariy memneg na pamati tho,
ekak imdengan.” f
39 Nem si-kathayo, nat iyayka-chom kiya ired ma iyamneg na pamati ren maysi-jan cha Afo Chiyos na ingked ingka, no diket iyayka-chom kiya ired ma gwariy pamati ren maysalakan.