Sema Panchejaw Na Tothood Afo Chiyos Chiwa Panchejawan Nonta Timpo Na Pilmiron Tolagan
9
Chiwa pilmiron tolagan Afo Chiyos ired ma tothoo, gwara iriy dinteg maypangkep na pesing na toon manchejaw komed si-katho. Gwara pay i iyanchayawan ched Afo Chiyos chiyed dobong. 2 Seja iyanchayawan cha, etolchaan tan chegwiy kwadto tho. Sema pilmiron kwadton nasimekepan cha, engaranan na Esantoan a Kwadto. Chiya kwadto, gwariy silow tan damisaan a naiyay-ejanan na tinapay a naiyaytangdal cha Afo Chiyos. Sema sakepan niya kwadto, esa-dinan na kortina. 3 Sema maykadgwen kwadton engaranan na Kasantoan a Kwadto, esa-dinan ngoy sakepan to na kortina. 4 Chiya kwadto, gwariy ebalitohan a altar a naepoolan na insinso tan sema baol na tolagan a eta-kepan a kolpi na balitok. Sema iren iyay-ejan chiwa baol, gwariy salaw a ebalitohan a iyay-ejanan na mekan a engaranan na manna. a Gwara pay chiwan i kosnod Aaron a iyanbolong tan chegwen echampig a bathon iyaysolathan na bili-bilin Afo Chiyos. 5 Chiwa tapow niwa baol, gwariy chegwen singen parsowen epayaran a engaranan na cherubim. Seman iriy naengibiybiy a gwares Afo Chiyos chiwan. Aokjad i payad cha say siroman toy tangeb niwa baol a nainpelkian na pari na chala na iyaytangdal say mepekawanan i basol na tothoo. Nem seja ira, nat iiksplikar kon emiin niman.6 Sema ingkaysagana na emiin a gwared ma naiyanchayawan ched Afo Chiyos, inges to jay. Gwiya-gwa-gwen nasimekep ira ma parid pilmiron kwadto say a-magen chiy obda ra. 7 Nem sema maykadgwen kwadto, sema kahejangan a pari bengat i mebedin a onsekep chiwan, tan sema isekep to, pinsak bengat na mahatawen. Nat mebedin pay a onsekep iwa pari no nagwariy chalen itangdal tod Afo Chiyos say mepekawanan i basol to, pati basol na tothoon nat amta ra i basol i imag cha. 8 Babaen iren jay a emiin, nainpaamta na Ispirito Santo i nat mebedin a onsekep i tothood ma podnon kad-an Afo Chiyos no onoran cha pay laeng ira ma chaan a dinteg maypangkep na panchayaw. Tep sema iren dinteg, kigwan to i nat mebedin a onsekep i tothood ma Esantoan a Kwadto tan sema Kasantoan a Kwadtod ma naiyanchayawan cha. 9 Seja iren emiin, arig a etongpal ma kagol Jesu Cristo. Tep seja iren animal tan sema iren ekila-kilasin naiyaytangdal cha Afo Chiyos, nat mebedin a kiyolpi chen ingkal i basol iren ma tothoo, isonga nat edinisan i konsinsiya ra. 10 Tep emiin a ima-imag na too, iyaybasar ired ma dinteg maypangkep na angel bengat a inges toy mekan, mainom, tan pandinis. Seja iren dinteg, mesepol bengat a onoran cha ingkathod sa-dathan Afo Chiyos na badon tolagan a mas mapmapteng.
11 Niman ma, kimowan ma alis Cristo say manbalin a kahejangan a pari thayo, et igwat tayo iriy mapteng a inkarin Afo Chiyos cha badon tolagan. Sema naiyansilbian Criston pari, mas epatpateg tan mas mapmapteng iy say sema iyanchayawan iren ma Hodjos nonta bayag da. Tep sema naiyansilbian Cristo, nat tooy engamag niwan, tan nat chiya dobong i kad-an to, no diket cha dangit. 12 Nonta simekep si Cristod ma naiyansilbian tod dangit a naiyay-arig chiwan a Kasantoan a Kwadto, pinsak bengat i insekep to tep on-anay ma iwan. Et nat chala na kanching tan baha i insekep to, no diket chala thon mismo. Tep sema chala tho, si-kathoy intangdal to say inkaro thoy chosa na basol tayo, et say maysalakan kiya na ingked ingka. 13 Agpayson gwariy silbi na chala na kanching tan bahen kalekian tan sema chep-ol pay na bahen bomedasang a kolpin epoolan a naiyaypelkid tothoo. Nem say silbi ra, mandinis bengat na angel na toon iyaybilang a ensekig cha nemnem Afo Chiyos say mebedin a mekichejaw mowan ired Afo Chiyos. 14 Isonga no mebedin a medinisan i angel na too babaen na chala na animal, mas epatpateg pay i silbi na chalen Cristo. Tep si Cristo, nagwaren polos i kolang to, et intangdal toy angel tod Afo Chiyos babaen na panakabalin na Ispirito Santon sibibiyag na ingked ingka. Isonga sema chala tho, gwariy kabaalan ton mandinis na konsinsiya thayon simekig kagol na ngaaw a imag tayo. Et sema ngaaw, naintorong to kiyed pathiy a chosen nagwariy pengingkaan to. Nem niman, kagol na chalen Cristo, edinisan miy konsinsiya thayo say mebedin a mansilbi kiyed sibibiyag a Afo Chiyos.
15 Isonga, si Cristoy enolong a engitakchel na badon tolagan Afo Chiyos cha tothoo say emiin a epispis a mekika-chom cha Afo Chiyos, mebedin a egwathen chiy emiin a bindisjon a nagwariy pengingkaan ton inkarin Afo Chiyos. Tep etiy si Cristo say inkaro thoy chosa na basol a imag na tothoo nonta timpo na pilmiron tolagan Afo Chiyos.
16 Amta thayo i mesepol a etiy si Cristo tep seja badon tolagan Afo Chiyos, may-arig cha bili-bilin a insolat na too maypangkep na kay-ap-ap na itawid to no metiy ma. Mesepol nin a metiy ma iwa too asan may-ap-ap iwa tawid. 17 Tep seja bili-bilin, nat metongpal no sibibiyag pay laeng iwa toon mengitawid, no diket metongpal bengat no metiy iwa too. 18 Isonga, angken sema pilmiron tolagan Afo Chiyos, nat etongpal koma no nagwariy chalen engipaneknek a gwariy etiy a animal. 19 Tep sema imag Moses nontan da, kigwan tod ketoo-tooy emiin a bili-bilin na dinteg Afo Chiyos. Et ida thoy chala na baha tan kanching, et kiya-choman to na chanom. Et ida tho ma bowek na kalniron ekoloran na depang, in-iket tod ma ebedberan a hyssop a do-bet, et inpisok tod chala. Et inpelki tho ma chaled dibcho na dinteg, pati emiin a tothoo. 20 Et kigwan Moses i “Seja chala, si-kathoy mengitakchel na tolagan a inbilin Afo Chiyos a onoran jo.” b 21 Piyelkian pay Moses iwa naiyanchayawan cha tan emiin a naiyosal chen manchejaw. 22 Tep say kigwan tod ma dinteg, chanchanin emiin ket, mesepol a medinisan na chala. Tep no nagwariy chalen imayos, nat mebedin a mepekawanan i basol.
23 Seja iren naaosal a panchayaw cha Afo Chiyos chiya dobong, singen arig bengat na igwed dangit a podno, nem mesepol pay laeng a medinisan ira man na chala na animal a iyaytangdal. Nem sema iren igwed dangit a podno, mas mapmapteng pay, isonga say maytangdal a mandinis na igwed dangit, mesepol ngon mas mapmapteng pay. 24 Tep nat simekep si Cristod ja Kasantoan a Kwadtod ja dobong a imag na toon arig bengat niwa podnon kad-an Afo Chiyos, no diket simekep si Cristod dangit. Et chiwan i kad-an to niman a naengiriprisintar kiyed sangoanan Afo Chiyos. 25 Sema imag Cristo, afil ngod ma imag iren ma kahejangan a papari na Hodjos. Tep sema iren papari, tiyawen a nasimekep ired ma Kasantoan a Kwadton nainsekep chiy chala na animal a iyaytangdal. Nem si Cristo, nat pinidgwa thon engitangdal na angel to. 26 Tep no seman, mesepol komen eminchakel i inpandigat to manipod nonta ingkaparsowa niya dobong. Nem say podno, pinsak bengat i inkowan to did ja dobong niman a kaonoran a timpo say a-kalen toy basol na tothoo babaen na ingkaytangdal na angel to. 27 Amta thayo i metiy i emiin a too na pinsak bengat, et kowisen iren Afo Chiyos. 28 Inges to met laeng cha Cristo. Intangdal toy angel to na pinsak bengat say ikaro thoy chosa na basol na chakel a tothoo. Sigoradon on-oli mowan ali, nem nat say ikaro thoy chosa na basol na tothoo mowan, no diket isalakan to iriy manseseked cha si-katho.