3 Sema emiin a kahejangan a paparid ja dobong, naechotohan iren mengitangdal na animal tan sema iren ekila-kilasin nain-i-kan na tood Afo Chiyos. Isonga si Jesus a kahejangan a pari thayo, mesepol ngon gwariy itangdal tod Afo Chiyos. 4 Nem sema naiyansilbian Jesus a kahejangan a pari, nat chiyed ja dobong, no diket chiwed ma dangit. Tep no gwara pay laeng si Cristod ja dobong, nat mebedin a mansilbin pari tep gwara wa iriy paparin poli-polin Levi a naengitangdal na iyaybilin chiwa dinteg. 5 Nem sema naiyansilbian iren ma papari, singen arig tan alichon bengat na podnon gwared dangit. Amta thayo tan tep nonta chanchanin itakchel Moses iwa panchayawan iren ma Hodjo, binidin Afo Chiyos i “Isingpet mon mengitakchel niwa panchayawan say may-inges a kosto-kostod ma planon inbiybiy kod si-kam cha chontog.” ^b 6 Nem sema obden inpiyal Afo Chiyos cha Cristo, mas mapmapteng iy say obda ira na sigod a paparid ja dobong tep sema badon tolagan Afo Chiyos ired ma tothoon intolong Jesus a engitakchel, mas mapmapteng iy say sema chaan a tolagan. Tep sema inkarin Afo Chiyos cha badon tolagan, mas mapmapteng iy say sema inkari thod chaan a tolagan nonta bayag da.

7 No nagwara komay kolang niwa pilmiron tolagan, nat mesepol komen mesa-dathan na bado. ^c 8 Nem inpaamten Afo Chiyos i sema pilmiron tolagan, gwariy kolang to tep nat mebedin a inpachonong niwa tolagan i tothoo tep nat iyonoran chiy emiin a bili-bilin niwa dinteg. Isonga, kigwan Afo Chiyos ired ma tothoo i: