Si Melchizedek A Pari
7
Sejay a Melchizedek, arid siyodad na Salem nonta bayag da. Pari pay a iyansilbid Afo Chiyos a Kahejangan. Nonta man-oolis Abraham ali nonta igwak to wiy epat a ari, iyaspol Melchizedek et binindisjonan to. 2 Et in-i-kan Abraham cha Melchizedek i ikasampolon ida thon kokowa iren ma epat a arin igwak to. Say banag na ngaran a Melchizedek, maronong a ari. Tan ari pay na talna tep sema siyodad a iyantorayan ton Salem, talnay banag na ngaran to. 3 Si Melchizedek, nagwariy iyaysolat maypangkep na aweto ni ineto, angken afo-afo tho la. Nat aamtaan pay i ingkay-anak to tan ingkathiy to. Isonga, sema kinapari tho, may-arig cha kinapari na Anak Afo Chiyos a pari na ingked ingka.4 Nemnem joy kinakayang Melchizedek tep angken si Abraham a edafoan tayon emiin a Hodjos, in-i-kanan tos Melchizedek na ikasampolon ida tho ired ma igwak to. 5 No polin Levi si Melchizedek, inam-ay komen ma-gwathan i kagol a engi-kanan Abraham cha si-katho tep gwariy bilin chiwa dinteg na Hodjon kigwan to i sema poli-polin Levi a iyanbalin a pari, mesepol a sema echom chen Hodjo, i-kanan cha ira na ikasampolod ma iyan-obdaan cha, angken poli iren Abraham a emiin. 6 Nem angken nat polin Levi si Melchizedek, in-i-kanan kitdin Abraham na ikasampolo. Et binindisjonan Melchizedek si Abraham, angken si Abraham i inkarian Afo Chiyos. 7 Isonga, amta thayo i si Melchizedek, ekayang iy say si Abraham tep sema toon gwariy karebengan ton manbindisjon, si-kathoy ekayang iy say sema bindisjonan to. 8 Say sa-kin kasi-nengan na kinakayang Melchizedek, sema iren parin polin Levi a naiyay-i-kanan na ikasampolo, naetiy iren emiin tep too bengat ira. Nem si Melchizedek a in-i-kanan Abraham na ikasampolo, singen sibibiyag pay tep nagwariy iyaysolat cha esel Afo Chiyos maypangkep na ingkathiy to. 9 Angken si Levi i afo la na paparin iyay-i-kanan na ikasampolo, singen iyayka-chom ngod Abraham nonta in-i-kan Abraham iwa ikasampolod Melchizedek. 10 Tep angken aneng pay i ingkay-anak Levi nonta iyaspol Melchizedek si Abraham, singen gwara wa les Levi cha angel Abraham tep si Abraham i afo tho la.
Sema Kinaparin Levi, Esa-dathan Na Kinaparin Melchizedek
11 Nonta in-i-kan Afo Chiyos iwa dinteg ired ma Hodjo, chiyotohan toy poli-polin Levi a manbalin na papari say si-kariy mengibalnay na tothoon mengonod niwa dinteg. Nem sema obda iren ma papari, nat mebedin a kiyolpi thon ingkal i basol na tothoo na ingked ingka et say mebedin a on-esop ired ma kad-an Afo Chiyos. Isonga mesepol a gwariy afil a parin mena-dat iren ma sigod a papari. Seja afil a pari, si-kathos Jesu Cristo. Seja kinaparin Jesus, singen inges toy kinaparin Melchizedek a afil cha kinaparin Aaron a polin Levi. 12 No mesa-dathan i kinapari, mesepol ngo pay a mesa-dathan i dinteg maypangkep niwa kinapari. 13-14 Amta thayo i sema kinapari tan sema dinteg, esa-dathan mala tep si Jesus a Afo thayon miyan tabtabala, nat polin Levi. Amta thayon emiin i si Judah i afo len Jesus, tan nagwaren polos i polin Judah a iyansilbin pari. Tan nagwara pay i kigwan Moses maypangkep na polin Judah a manbalin a pari.
15 Inam-ay a ma-gwathan i sema dinteg maypangkep na kinapari, esa-dathan mala tep gwara waliy afil a parin inges tos Melchizedek. 16 Sejay a parin si Jesu Cristo, nat iyanbalin a pari kagol na dinteg maypangkep no siyay afo tho la, no diket kagol na panakabalin a naedafod biyag ton nagwariy pengingkaan to. 17 Tep kigwan tod esel Afo Chiyos maypangkep cha Jesus i:
“Pari ka na ingked ingken
inges toy kinaparin Melchizedek nonta bayag da.” a
18 Isonga, sema sigod a dinteg, esa-dathan ma tep nagwariy kabaalan to tan nagwariy silbi tho. 19 Tep nat mebedin a kiyolpi thon ingkal i basol na tothoo. Nem niman ma, gwariy in-i-kan Afo Chiyos cha si-kathayon mas mapmapteng pay. Si Jesu Criston naedafoan na namnama thayo. Tep kagol na imag to, mebedin men on-esop kiyed Afo Chiyos.
20 Say sa-kin kasi-nengan a mas ekayang i kinaparin Jesus iy say kinapari na poli-polin Levi, si-kathoy siyapathaan Afo Chiyos. Tep nonta chiyotohan Afo Chiyos si Jesus a pari, iyansapathes Afo Chiyos. b 21 Nem nonta chiyotohan toy poli-polin Levi a manbalin na pari, nat iyansapathes Afo Chiyos. Tep si Jesus bengat i engowanan Afo Chiyos i:
“Si-kak a Afo Chiyos, isapathak i pari ka na ingked ingka
tan nat mesa-sa-dathan i nemnem ko.” c
22 Kagol na insapathen Afo Chiyos, sigoradon sema badon tolagan, mas mapmapteng iy say sema chaan a tolagan. Tan si Jesus i naengipaneknek i metongpal.
23 Gwara pay i sa-kin kasi-nengan i sema kinaparin Jesus, mas ekayang iy say kinapari na poli-polin Levi. Nontan chakel i papari tep naetiy ira et mesepol a mesa-dathan ira. 24 Nem si Jesus, sibibiyag na ingked ingka, isonga sema kinapari tho, nagwariy pengingkaan to. 25 Gwariy panakabalin Jesus a kolpin mengisalakan iren ma on-esop cha Afo Chiyos kagol na pamati ra. Tep sibibiyag si Jesus na ingked ingka, tan natiyakchelan to ira na olay cha sangoanan Afo Chiyos.
26 Isonga, si Jesus i kahejangan a parin mesepol tayo. Tep esantoan tan nagwaren polos i kolang to tan basol to. Iyay-afil cha si-kathayon managbasol tep oltimon mapteng. Kimayang cha dangit, tan sema kinachayaw to, nagwariy kay-ingesan to. 27 Si Jesus, nat inges toy echom a kahejangan a papari. Tep sema echom a papari, mesepol a gwiya-gwa-gwen naengitangdal nin ired Afo Chiyos para cha basol cha, et naengitangdal pay ira para cha basol na echom a tothoo. Nem si Jesus, pinsak bengat i inpangitangdal to na angel tod Afo Chiyos para cha basol na emiin a ketoo-too. Sema ingkathiy to, on-anay na ingked ingka. 28 Sema iren echotohan a kahejangan a parin iyaybasar cha dinteg, too bengat iren gwariy kolang cha. Nem nonta epalabas i chakel a tawen manipod nonta ingkay-i-kan na dinteg cha Moses, insapathen Afo Chiyos i sema chotohan ton kahejangan a pari, sema Anak ton nagwaren polos i kolang to na ingked ingka.