6
Isonga, nat pidgwaen tayo ira ma edagwas a iyachal tayon maypangkep cha Cristo, no diket achalen tayo pay i echalek a toro-toro say onkedkedsang i pamati thayo. Tep amta yo wa ira ma toro-toron inges toy iyaytakchelan na pamati thayon sema panbebneg jo na aramid a nagwariy silbi tho tan pamati yod Afo Chiyos. 2 Amta yo pay i toro-toro maypangkep na panbonjag, pandinis, tan sema pengisagpat na diwa yod echom jon mankararag. Amta yo ngo pay i maypangkep na panpawil na iyangketiy tan sema kekowis na tothoo a nagwariy pengingkaan na panbanagan to. 3 Say a-magen tayo wa koma, no ipalobos Afo Chiyos, achalen tayo komay echalek a toro-toro say onkedkedsang pay i pamati thayo.4 Tep sema iren tothoon binekan chiy pamati ra, nat mebedin a maawis iren manbabawi mowan. Tep nontan a esilowan i nemnem cha maypangkep na podno na mapteng a chamag ket, diya-kaman chiy kaasin naedafod Afo Chiyos cha dangit tan ekida-kam ired ma Ispirito Santo. 5 Nimathan cha pay i kinamapteng na esel Afo Chiyos, tan pichas chiy panakabalin Afo Chiyos a ipasi-neng ton kosto-kosto no sa-ki din akow. 6 Sema iren tothoo, angken diya-kaman chen emiin ira jay, simalcheng iren memati. Isonga, nat mebedin a manbabawi mowan ira tep nonta insalcheng chen memati, singen inges toy indansa ra mowan i Anak Afo Chiyos cha koros tan biyaingan ched sangoanan na tothoo.
7 Si-kathayon tothoo, may-arig kiyed payow a naaora-oranan. No magebay i iyaytanem chiwan, gwariy silbi thod ma mahapayow. Sema toon inges to ma payow, bindisjonan Afo Chiyos. 8 Nem no do-bet tan sebit bengat i simimit chiwan, botbothen na mahapayow et poolan to tep nagwariy silbi tho. Sema toon memneg na pamati tho, inges to ma payow a edo-do-betan tan iyas-asbithan, et chosaen Afo Chiyos.
9 Aahik a ensemek ko, angken seman i kowan kona, sigoradoak a nat mepesamak cha si-kayo man, no diket egwathen jo iriy mapteng a nain-i-kan Afo Chiyos cha emiin a nainsalakan to. 10 Tep maronong si Afo Chiyos. Nat dingdingen toy ima-imag jon mapteng tan sema semek jod si-kathon nainbiybiybiy jo manipod nontan ingkathod niman cha nainpanolo-tolong jo na echom jon tothoon Afo Chiyos. 11 Say piyan ko, sa-ki tan sa-kid si-kayo, pemasig kayon namnamaen jo i tongpalen Afo Chiyos i inkari tho ingkathod kaonoran na timpo. 12 Tep no a-magen jo jay, eg kayo onsarot cha pamati yo, no diket onoran joy tothoon mengegwat na inkarin Afo Chiyos kagol na pamati ra tan anos cha.
Sigoradon Tongpalen Afo Chiyos I Inkari Tho
13 Nemnemnemen tayos Abraham. Nonta bayag da, gwariy inkarin Afo Chiyos cha si-katho, et insapatha to i metongpal iwa inkari tho. Tep kagol a nagwariy ekayang iy say si Afo Chiyos, angel ton mismoy iyosal ton engisapatha. 14 Kigwan to i “Sigoradon bindisjonan taha tan sigoradon ipachakel koy poli-polim.” a 15 Et iyan-ano-anos si Abraham a iyanseke-seked ingkathod igwat toy inkarin Afo Chiyos.
16 Say too, no piyan ton ipaamted echom to i podnoy towan kona, naiyosal ton nainsapathay ekayang iy say si-katho. Tep no a-magen to man, seman i salchengan na sosongbat cha. 17 Si Afo Chiyos ngo, piyan ton sema iren mengegwat na inkari to, amtaen cha i eg mesa-sa-dathan iwa inkari thod si-kara. Isonga, inchoman to na sapatha to ma inkari to. 18 Sejay a inkarin Afo Chiyos tan siyapathaan to, eg mesa-sa-dathan tep nat polos a mebedin a man-itek si Afo Chiyos. Isonga, si-kathayon bimetik cha Afo Chiyos say mansirom kiyed si-katho, maypakedsang i nemnem tayo kagol na engikarian to tan engisapathaan to. Kagol niyay a chegwen imag Afo Chiyos, memasig kiyen mannamnamed inkari tho. 19 Seja namnama thayo, si-kathoy naengipakedsang na pamati thayo tep sigoradon metongpal. Kagol na namnama thayo, singen singkep tayo wiy podnon kad-an Afo Chiyos a inges toy nainsekep na kahejangan a parid ma Kasantoan a Kwadton esa-dinan na kortined ma timplo. 20 Edagwas males Jesus a simekep chiwan a mengiriprisintar kiyed sangoanan Afo Chiyos tep si-kathoy iyanbalin a kahejangan a pari na ingkathod ingken inges toy kinaparin Melchizedek nonta bayag da.