5
Say kahejangan a pari na Hodjos, naepispis cha echom ton tothoo, et naechotohan a mengiriprisintar ired sangoanan Afo Chiyos. Si-kathoy naengitangdal na animal tan sema iren ekila-kilasin nain-i-kan na tood Afo Chiyos para cha basol cha. 2 Seja toon kahejangan a pari, man-ano-anos ired ma naiyanbasol a nat amta ra i nat kostoy chiyan amaga tep si-katho ngo, gwara ngoy kinakafoy to. 3 Kagol na iyanbasolan to, mesepol ngon mengitangdal say mepekawanan ngoy basol ton inges toy nainpangitangdal to para cha echom to say mepekawanan i basol cha.4 Nagwariy naemispis na angel ton manbalin a kahejangan a pari. Tep si Afo Chiyos bengat i naemispis a inges toy inpamispis tod Aaron a iyanbalin a pilmiron pari na Hodjos nonta bayag da. 5 Inges to ngo pay cha Cristo. Eg to inkayang i angel ton manbalin a kahejangan a pari, no diket si Afo Chiyos i emispis cha si-katho. Tep kigwan Afo Chiyos cha Cristo i:
“Si-kam i Anak ko.
Niman ipaamtak i si-kak i Awam.” a
6 Cha sa-kin birsikolo, kigwan pay Afo Chiyos cha si-katho i:
“Pari ka ingkathod ingken
inges toy kinaparin Melchizedek nonta bayag da.” b
7 Nonta gwares Jesus chiya dobong, iyankararag a kanangi-nangis tan mapkes i esel to, tan ekiadok cha Afo Chiyos tep gwariy panakabalin Afo Chiyos a menolong cha si-katho say nat metiy.c Inki-ngelan Afo Chiyos i kararag to tep iyankombabes Criston menongpal niwa piyan Afo Chiyos. 8 Tep angken si Cristoy Anak Afo Chiyos, mesepol a iyachal ton piyati thos Aweto babaen na diga-digat a diya-da-kam to. 9 Kagol na enongpalan ton emiin na piyan Afo Chiyos, iyanbalin na naedafoan niwa kaysalakanan na emiin a naengamag na nainbilin to na ingked ingka. 10 Et chiyotohan Afo Chiyos a kahejangan a parin inges toy kinaparin Melchizedek nonta bayag da.
Mantanchaan Kiya Say Nat Bebnekan Tayoy Pamati Thayo
11 Chakel pay i piyan kon ipaamted si-kayo maypangkep na kinaparin Cristo tan si Melchizedek, nem edigat a may-iksplikar cha si-kayo tep singen eg jo wala koston egwathan. 12 Tep ebayag a emati kayo wa, isonga si-kayo komay mantoro wa na echom jo, nem mesepol a gwara kitdiy mantoro mowan cha si-kayo iren ma edagwas a iyachal jo maypangkep na inpaamten Afo Chiyos. Singen iyanbalin kayo na ngoyat a kathas bengat i naininom to tep nat mahapangan nin na keneg. 13 Sema toon inges to jay, eg to mebedin a idasin i mapteng cha ngaaw tep singen nga-nga pay laeng. 14 Nem sema mahedsang i pamati tho, naigwathan toy echalek a toro-toron may-arig cha keneg a mekan. Sema toon inges to jay, aingsen naengidasin na mapteng cha ngaaw.