Sema Dogad A Pan-inanaan A Inkarin Afo Chiyos Ired Ma Tothoo To
4
Nem si Afo Chiyos, naintolo-toloy to pay a naengikari i mahasekep kiyed ma pan-inanaan a insagana tho para cha si-kathayo. Isonga, mantanchaan kiya, nahol ni gwared si-kathayoy eg mahasekep. 2 Tep inki-ngelan tayo wa ma mapteng a chamag a inges to iriy afo-afo thayo nontan da, nem sema mapteng a chamag, singen nagwariy panmaptengan tod si-kara tep eg cha piyati. 3 Si-kathayon naemati, si-kathayo bengat i onsekep chiwa pan-inanaan. Tep kigwan Afo Chiyos maypangkep iren ma eg naemati i:“Kagol a banay i bonget kod si-kara,
inkarik i ekak ira ipaspaskep chiwa pan-inanaan a
insaganak para cha si-kara.” a
Say podno, sema pan-inanaan, iyaysagana manipod nonta kincheng Afo Chiyos a emarsowa niya dobong. 4 Tep gwariy inpasolat Afo Chiyos maypangkep na maykapithon akow a kigwan to i “Nonta maykapithon akow, iyan-inanes Afo Chiyos tep iyakcheng men emiin i obda tho.” b 5 Seja inana, niyankona pay Afo Chiyos nonta kigwan to i:
“Inkarik i ekak ira
ipaspaskep chiwa
pan-inanaan
a insaganak
para cha si-kara.” c
6 Sema iren tothoon engi-ngel na mapteng a chamag nonta bayag da, eg ira simekep chiwa pan-inanaan tep eg cha imag i inbilin Afo Chiyos. Nem gwara pay iriy afil a toon piyan Afo Chiyos a onsekep. 7 Isonga pinispis Afo Chiyos i sa-kin timpon gwariy gwaya ren onsekep, et niman iwa timpo. Amta thayo jay tep nonta nat simekep ira ma tothoo nontan da, chakel i tawen a epalabas, et inpasolat Afo Chiyos cha David ira ma ese-esel a kigwan ko la na kemtang a:
“Niman a iki-ngelan joy niyankonen Afo Chiyos,
enog i benged.” d
8 Tep seja pan-inanaan a insaganen Afo Chiyos, nat sema dogad na Canaan a engibalnayan Joshua na afo-afo thayo nontan da. Tep no Canaan koma, nat kigwan pay Afo Chiyos i gwara pay laeng i sa-kin timpon gwariy gwaya na tothoon onsekep chiwan. 9 Isonga, sigoradon gwara pay i pan-inanaan iren ma tothoon Afo Chiyos say sema pan-inana ra, inges toy inpan-inanen Afo Chiyos nonta maykapithon akow. 10 Tep sema onsekep chiwa pan-inanaan, man-inanen kosto-kostod obda ton inges toy inpan-inanen Afo Chiyos nonta kincheng ton emarsowa na emiin. 11 Isonga, ipahat tayoy kabaalan tayon onsekep chiwa pan-inanaan say nat ingesen tayoy afo-afo thayo len eg ira mahasekep tep eg cha piyan a a-magen i inbilin Afo Chiyos.
12 Tep say esel Afo Chiyos, singen sibibiyag, tan chakel i mebedin a a-magen to. Mas tarem iy say ispaden chegwiy tarem ton maritem a mebedin a to-chohen toy iyan-aspolan na pohel tan othek na pohel. Tep sema esel Afo Chiyos, mebedin a onsekep cha nemnem tan ispirito, et mebedin a doktalan toy emiin a gwared nemnem na too, angken echalek a kakara tho tan kamkam to. 13 Emiin a piyarsowen Afo Chiyos, nagwaren polos i mahaemot cha si-katho tep nasini-neng Afo Chiyos na olay a emiin. Et si-kathoy kasongbathan na emiin a naima-imag tayo tan naniyemnemnem tayo.
Si Jesus I Kahejangan A Pari Thayo
14 Isonga, petpetan tayoy pamati thayon nainpodno thayo. Tep si Jesus a Anak Afo Chiyos, si-kathoy kahejangan a pari thayon kimowan ded dangit a mengiriprisintar cha si-kathayod sangoanan Afo Chiyos. 15 Et sejay a Kahejangan a Pari tayo, mebedin a kaasian to kiya maypangkep na kinakafoy tayo tep sema ekila-kilasin solisog a naepara-paras, piyaras to ngo, nem si-katho, polos a nat iyanbasol. 16 Isonga, etoled kiya komen on-esop cha Afo Chiyos a mahaasi tep no mekikaasi kiya, kaasian to kiya, et tolongan to kiya no timpo na gwariy kasepolan tayo.