Si Jesus I Ekayang Iy Say Si Moses
3
Isonga aahik a pinispis Afo Chiyos a tothoo thon tiya-gway ton mayka-chom cha si-kathod dangit, nemnemnemen tayos Jesus. Tep si Jesus i into-non Afo Chiyos a apostolis tan kahejangan a pari na pamatin nainpodno thayo. 2 Tan si-kathoy chiyotohan Afo Chiyos, et naepiyal a engamag na emiin a kigwan Afo Chiyos. Tep si Jesus, inges to ngos Moses a naepiyal a iyansilbid emiin a tothoon pamiljen Afo Chiyos. 3 Nem naiyaybilang si Jesus a ekayang iy say si Moses. Tep sema engitegwen na baliy, ekayang iy say baliy a iyaytegwen. 4 Amta thayo i sa-ki tan sa-kin baliy, gwariy engamag, nem sema engamag na emiin ket, si Afo Chiyos. 5 Si Moses, naepiyal a iyansilbid emiin a kakadgwa thon pamiljen Afo Chiyos, nem bagaen bengat Afo Chiyos. Sema imag to, arig bengat cha ipaamten Afo Chiyos no sa-ki din akow. 6 Nem si Cristo, nat bagaen bengat Afo Chiyos, nem Anak to pay a naepiyal a mengitoray na pamiljen Afo Chiyos. Et si-kathayo, iyayka-chom kiya pay ngod ma pamilja tho la kitdi maytolo-toloy a etoled kiyed pamati thayo tan chadsahan tayoy namnama thayon tongpalen Afo Chiyos i inkari tho di.Tanchaanan Tayo Komen Nat Bebnekan Tayos Afo Chiyos
7 Isonga, mesepol a menemnem i bancha na Ispirito Santon kigwan to i:
“Niman a iki-ngelan joy niyankonen Afo Chiyos,
8 enog i benged a inges toy inpasing na afo-afo yo len
engonkontred si-katho
tan picha-pichas chiy anos to
nonta gwara ired ma dogad a nagwariy toon naiyan-iya-iyan.
Tep kigwan Afo Chiyos maypangkep iren ma too i
9 ‘Picha-pichas chaak
angken mita riy kaskasdaaw a ima-imag ko
na epat a polon tawen.
10 Isonga bimongetak a pasiyed si-karen kigwan ko i
“Nakimowa-kowan ira na olay cha afil,
tan eg cha piyan a a-magen i nainbilin ko.”
11 Isonga, kagol na banay i bonget kod si-kara,
inkarik i ekak ira ipaspaskep chiwa dogad a pan-inanaan a
insaganak para cha si-kara.’ ” a
12 Isonga aahik cha pamati, pantanchaan kayo, nahol ni gwared si-kayoy ngaaw i nemnem ton eg naematin mengegwis cha si-kayon manbebneg cha Afo Chiyos a sibibiyag. 13 Say a-magen jo koma wa, pankikinedsang kayod pamati yo na gwiya-gwa-gwa, nahol ni gwared si-kayoy onbenged tep esaol na basol. Et a-magen jo koma jay niman tep onmothok aliy akow a nagwara wiy gwaya yon maysalakan. 14 Tep no maytolo-toloy a onpetpet kiyed pamati tayo manipod nonta pilmiron emati kiya ingkathod kaonoran a akow, maytolo-toloy a maykadkadgwed Cristo.
15 Nemnemen tayo mowan i inpasolat Afo Chiyos a kigwan to i:
“Niman a iki-ngelan joy niyankonen Afo Chiyos,
enog i benged a inges toy afo-afo yo len
engonkontred si-katho.” b
16 Tep siya ira ma tothoon engonkontred Afo Chiyos angken inki-ngelan chiy kigwan to? Ampet siya iy nat si-kariy inbalnay Moses nonta bintihan cha diy Egypt? 17 Et siya ira ma tothoon engipabonget Afo Chiyos na epat a polon tawen? Ampet siya iy nat si-karen emiin i iyanbasol a etiy cha dogad a nagwariy toon naiyan-iya-iyan? 18 Et siya pay ira ma tothoon inkarian Afo Chiyos a eg to ira ipaspaskep chiwa dogad a pan-inanaan a insagana tho para cha si-kara? Sigoradon si-kariy nat emiyan a engamag na inbilin to. 19 Isonga, amta thayo i nat mebedin a onsekep ira ma tothood ma dogad a pan-inanaan tep eg ira ematid Afo Chiyos.