Sema Kaonoran A Bili-bilin
13
Itolo-toloy jon mansisinemek a singen san-aahi. 2 Kajoi yoy bisita angken no nat am-amta yo ira. Tep gwariy echom a engamag na inges to man, et sema iren tothoon kiyajoan cha, anghilis gayam ira. 3 Tolongi yoy iyaykalebos, et kaasi yo iren singen ekikalebos kayo ngod si-kara. Inges to ngo ired ma edigathan. Kaasi yo iren singen ekida-kam kayo ngo na diga-digat cha.4 Si-kayon emiin, pategan jo komay itsora na pengimbaliy, tan eg kayo koma mekibii-bii tan mekidahi-dahi. Tep chosaen Afo Chiyos i menarog na nat imbaliy to.
5 Enog i intolok a sema kinaagom jo pay na pilak i mantoray na biyag jo, no diket kapnek kayod ma gwared si-kayo. Tep kigwan Afo Chiyos ngo i:
“Eg tahejo bebebtihan.
Eg tahejo iola-olay.” a
6 Isonga, marinel kiyen mengowan i:
“Si Afo Chiyos i naenolong cha si-kak.
Isonga, ekak ontahot cha kompormin
a-magen na tothood si-kak.” b
7 Nemnem jo ira ma sigod a engibalnay cha si-kayon engitorod si-kayo na esel Afo Chiyos. Nemnem jo pay i mapteng a iyanbanagan na biyag cha say onoran joy pamati ra.
8 Si Jesu Cristo, eg naesa-sa-dathan, no diket man-iinges nontan tan niman tan ingked ingka. 9 Isonga, eg kayo manpasaol cha ekila-kilasin toro-toro. Tep say naengipakedsang na nemnem tayo, kaasin Afo Chiyos, nat sema pemati thayo na bilin maypangkep na mekan. Sema iren naengonod na bilin a inges to jay, nagwariy intolong tod si-kara.
10 Gwariy altar tayon sema koros a iyaytangdalan Cristo para cha basol. Si-kathayon naematid Cristo, gwariy karebengan tayon mekida-kam chiwa kaysalakanan a iyantongpalan niwa ingkaytangdal to. Nem sema iren naengitangdal na animal para cha basol a naengonod na dinteg Moses, nagwariy karebengan chen mekida-kam chiwa kaysalakanan. 11 Nagwariy karebengan cha tep angken dinteg Moses, kigwan tod man i nat iyaypalobos a kakanen cha ma animal a iyaytangal para cha basol. Tep sema iren animal a eparti, nainsekep na kahejangan a pariy chala red Kasantoan a Kwadto say itangdal tod Afo Chiyos para cha basol. Nem sema iren angel na animal, nain-awas ched ma siyodad say mepoolan. 12 Inges to ngo pay cha Jesus. Tep edigathan et etiy cha awas na siyodad say medinisan i tothoo na basol cha kagol na chala tho. 13 Isonga, mekikowan kiyed si-kathod awas na siyodad a sema piyan ton a-seden, isalcheng tayo koma wen mengonod na aramid na Hodjos, angken no kelkel-ingan cha kiyen inges toy inpangel-ing chen Cristo. 14 Tep sema pan-iyanan tayo na ingked ingka, nat chiya dobong, no diket sema din siyodad a igwed dangit a emangkesked.
15 Isonga, kagol Jesus, chejawen tayo na olay si Afo Chiyos a mekegwan i si-kathoy Afo. Et sema iren chayaw tayo, inges toy kaytangdal cha si-katho. 16 Nat dingdingen tayo pay a mengemag na mapteng tan menolong na echom tep no a-magen tayo ira jay, si-katho pay i kaytangdal na kapnekan Afo Chiyos.
17 Pati yo iriy naengibalnay cha si-kayo, et amag jo ma nakigwan cha. Tep si-kariy naemantay na pamati yo, et amta ra i songbathan cha ngos Afo Chiyos maypangkep na imag cha. Isonga, pati yo ira ma naengibalnay say maradsak ired pengemag na obda ra. Tep no eg jo ira patien, mesekithan i nemnem cha, et nagwariy kon-oren jo.
18 Ikararagi yo kawi na olay tep amta wi i edinis i konsinsiya wi tan piyan mi na olay a mengemag na mapteng. 19 Pangaasi yo, ikararagi yoak say ipaoli thoak Afo Chiyos ded tan a chakos.
Sema Kaonoran Na Solat
20 Si Afo Chiyos a naedafoan na talna, si-kathoy engipawil Jesus a Afo thayo. Et si Jesus, iyanbalin men manakabalin a naemantay cha si-kathayon singen kalniro tho. Tep sema chala tho ket, si-kathoy engitakchel na badon tolagan Afo Chiyos a nagwariy pengingkaan to. 21 Isonga, sapay koma ta i-kanan to kayon Afo Chiyos na emiin a mapteng a kasepolan jo say mebedin a a-magen joy piyan to. Tan sapay koma ta panbalin to kayo pay na tothoon nainpaimdeng to babaen Jesu Cristo. Sapay koma mechejaw si Afo Chiyos na ingked ingka. Amen.
22 Pangaasi yon aahik, pati yo jay a insolat kon mengipakedsang na nemnem jo tep seja solat ko ket, nat enchokiy a besaen jo.
23 Piyan kon ipaamted si-kayo i inbolos ched kalebosan si Timothy a ahi thayod pamati. No onmothok alid jay a chakos, odofen ko led tan no metaen tahejo.
24 Kowan komostain emiin i naengibalnay cha si-kayo tan emiin a tothoon Afo Chiyos chithan. Sema iren echom tayon naematin edafod Italy, chiyan komostai kayo ngo.
25 Sapay koma ta gwared si-kayon emiin i kaasin Afo Chiyos.