Mantinolong Kiya Koma
6
Aahik, no gwariy mengemag na ngaaw, si-kayon naintorong na Ispirito Santo, bilin jo say on-olid ma koston ogadi, nem dododop jo jay. Et pantanchaan kayo, nahol ni mesolisog kayo ngo. 2 Pantitinolong kayo no ebel-athan kayo na digat tep no pesing jo jay, tongpalen joy inbilin Cristo. 3 Tep seman a eg to tolongan i echom tep gwared nemnem to i gwariy kebedinan to ono kasasaad to, nem enchi, nasiyaol toy angel to. 4 Mesepol a kowisen na emiin a tooy aramid to ngo. No kostoy nainpasing to, sema imdeng to, nat maybasar cha kay-ingesan na nainpasing na echom, no diket chiwa nainpasing to ngo. 5 Tep say sa-ki tan sa-kin too, mahaamta na aramid to ngo.6 Sema naiyaytoroan na esel Afo Chiyos, mesepol ngon ibingayan to ma naengitorod si-katho na emiin a mapteng a gwared si-katho.
7 Enog i siyaol i angel jo. Nat baybay-an Afo Chiyos no diyamsis cha. Tep sema itanem na too, si-katho ngoy enien to. 8 Sema naengonod na ngaaw a kamkam to, enien toy chosen nagwariy pengingkaan to, nem sema naengonod na Ispirito Santo, enien to ngoy biyag a nagwariy pengingkaan to. 9 Et eg kiya koma on-apton mengemag na mapteng tep no onmothok aliy koston timpo, igwan i mapteng a enien tayo no eg kiya medismaya et onsalcheng kiya. 10 Isonga, no gwariy gwaya thayo, mengemag kiya na mapteng cha emiin a too, agdalo no sema iren aahi tayon naemati.
Sema Kaonoran Na Solat
11 Si-kak a mismoy mansosolat cha si-kayo. Matha jo ja kabenay niyay a solat ko. 12 Sema iren naengipilit i manpakogit kayo, piyan chen chejawen ira na too. Say kagol bengat a chiyan ipasing iwan, eg cha piyan a mepedigat. Tep amta ra no itoro cha i say kaysalakanan, mebedin bengat babaen na ingkathiy Cristod ma koros, pedigathen iren ma echom chen Hodjos. 13 Angken sema iren ekogit, eg cha ngo naiyonoran a emiin i bilin cha dinteg Moses, nem piyan chen manpakogit kayo say mebedin a iki-tek cha i si-kara konoy engawis kayo. 14 Nem no si-kak, nagwariy nain-kitek ko, malaksid niwa ingkathiy Jesu Criston Afo thayod ma koros. Tep kagol na ingkathiy to, nat piyategan ko wiy epateg chiya dobong, tan si-kak ngo, nat epategak med nemnem iren ma naemateg iren jay. 15 Nat ainportanti no ekogit i too, ono enchi. Say ainportanti, inpanbalin to kiyen Afo Chiyos na badon too. 16 Sapay koma ta sema talna tan kaasin naedafod Afo Chiyos, gwared emiin a naengonod na kigwan ko. Si-kariy podnon toon Afo Chiyos.
17 Manipod niman, nagwara koma wiy memedigat cha si-kak ma. Tep gwariy kabat cha angel ko kagol na pansilsilbik cha Jesus, tan si-kathoy kasi-nengan to i si-kak i bagaen to.
18 Aahik, sapay koma ta gwared si-kayoy kaasin Jesu Criston Afo thayo. Amen.