Sema Gwaya-gwaya Na Naematid Cristo
5
Si Cristo, indibchi tho kiya say gwariy podnon gwaya-gwayed si-kathayo. Isonga, pemasig kayon mena-din nitha gwaya-gwaya jo. Enog i iyonoran ira ma naengipilit i patien jo ma dinteg Moses, nahol ni manbalin kayo mowan na bagaen. 2 Nemnem jo jay tep si-kak a si Paul i mengowan niyay. No manpakogit kayo tep kin jo i kafidithan say pechonong to kayon Afo Chiyos, sema inpasing Cristo, nagwaren polos i silbi thod si-kayo. 3 Konen ko mowan cha si-kayo i sema manpakogit, mesepol ngon patien to ma emiin a bili-bilin na dinteg Moses. 4 Sema mengipara-paras a maypachonong babaen na pemati na dinteg, iyaysi-jan cha Cristo, tan binekan toy kaasin Afo Chiyos. 5 Nem si-kathayo wango, sigorado kiya i onmothok aliy akow na kayparang tayon maronong cha sangoanan Afo Chiyos babaen na panakabalin na Ispirito Santo tan pamati tayod Cristo. Isonga, manseseked kiya niwa akow ali. 6 Tep no iyayka-chom kiyed Cristo Jesus, nat ainportanti no ekogit kiya, ono enchi. Say ainportanti, si-kathoy pamati tayon mesi-neng cha semek tayod echom.7 Nontan da mapteng i inpango-pangonod jod Cristo. Siyay iyantiped kayo say eg jo pay patien i podno? 8 Sema afil a toro, nat edafod Afo Chiyos a ena-gway cha si-kayo. 9 Tanchaani yo tep no onoran jo ma toro, onoran jo emo ngoy echom a toro-toron nat edafod Afo Chiyos, et sema panpa-noan to, mesa-dathan a kostoy pamati yo. Tep podnoy kigwan na toon “Angken otik i para debag, ondebag iwa intiron iyaydaohan to.” a 10 Nem kagol a naemati kiyen emiin cha Afo, sigoradoak i egwathan joy kowan kona. Et sema toon naiyandistorbo na nemnem jo, chosaen Afo Chiyos angken siyen too.
11 Nem, aahik, enog i piyati ira ma naengowan i naintorok kono i mesepol a manpakogit i too say pechonong Afo Chiyos. No podno tan, eg chaak pay koma pedi-pedigathen. Tep no naintorok i mesepol a mekogit i too, eg iyasnit koma ira ma Hodjos na naintorok i maypangkep na ingkathiy Cristod koros. 12 Sema iren naengichanag kayo, mapteng no nat manpakogit ira bengat, nem manpakapon ngo ira!
Sema Koston Osal Na Gwaya-gwaya Thayo
13 Si-kayon aahik, tiya-gway to kayon Afo Chiyos a maydibchi. Nem enog i iyosal i ingkaydibchi yon mengonod na ngaaw a kamkam jo, no diket osal jo ma ingkaydibchi yod pansilbi na sa-ki tan sa-ki babaen na semek jo. 14 Tep emiin a bilin na dinteg, iyaykolpin emiin chiya sa-kin bilin a “Semek moy echom mon inges to ngoy penmek mo na angel mo.” b 15 Nem no itolo-toloy jon manbekal a inges toy animal a iyankinalat, tanchaani yo tep say pantongpalan to, manchinaral kayo.
16 Say kowan koned si-kayo, sejay a itolok joy Ispirito Santon mengitorong cha si-kayo. Tep no pesing jo man, nat onoran joy ngaaw a kamkam a gwared nemnem jo. 17 Tep seja iren ngaaw a kamkam a gwared nemnem jo, iyaykontra ngod ma piyan na Ispirito Santo. Sema piyan na Ispirito Santo, iyaykontra ngod ma ngaaw a kamkam a gwared nemnem tayo. Kagol na iyankontraan cha, eg jo naimag i piyan jo. 18 Nem no sema Ispirito Santo i naengitoro-torong kayo, nat itorayan to kayo wa na dinteg.
19 Sema iren nainpasing na toon naedafod ngaaw a kamkam cha, inam-ay a maamtaan. Sejay ira: mekibii tan mekidahi, mengemag na ensekig, tan mengibiyang na koston ogadi; 20 manchayaw na nat Afo Chiyos tan mena-gway na ngaaw a ispiritos; mengokes, inam-ay a memekal, mengamkam na kegwen na echom, inam-ay a onbonget, tan mengikayang na kasasaad to; mahontra na olay, meki-chom cha gropo tho bengat, 21 tan maapal; mabotheng tan mekiechom cha kihanan a manbalin na paladon botheng; tan mengemag na echom a inges to jay. Biyanchaanan tahejo nontan, tan banchaanan tahejo mowan niman a sema iren naengipasing iren jay, eg ira mayka-chom cha pantorayan Afo Chiyos.
22 Nem sema nainpabo-day na Ispirito Santod biyag na too, sejay ira: semek, imdeng, talna, anos, kaasi, mapteng a aramid cha echom, kepiyal, 23 kaykombaba na angel, tan penifel na piyan na angel. Nagwariy dinteg a mengiparit iren jay. 24 Sema iren iyayka-chom cha Cristo Jesus, singen iyaydansa ngod ma koros a emiin i ngaaw a piya-piyan to tan ngaaw a kamkam to. 25 Et gwariy badon biyag tayo babaen na Ispirito Santo, isonga mesepol ngon si-kathoy mengitorong na biyag tayo. 26 Mesepol a nat ondastog kiya, mesepol a nat mantinangsit kiya, tan mesepol a nat man-inapal kiya.