Sema Iyandasinan Iren Ma Hodjos
3
Konen jo emod nemnem jo i “Nengo ngarod i iyandasinan iren ma Hodjos cha Gentiles? Nengoy panmaptengan na pankogit tayo?” 2 Chakel nowan i panmaptengan. Pilmiro, inpiyal Afo Chiyos i ese-esel to ired ma Hodjos. 3 Konen jo emo i “Nem sema iren echom a Hodjos, nat naepiyal.” Podnon sema echom a Hodjos, nat naiyonoran chiy esel Afo Chiyos. Nem piyan ton a-seden aya i nat naepiyal ngos Afo Chiyos tan nat tongpalen toy inkari tho? 4 Enchi! Angken man-itek i emiin a too, polos a nat mebedin a man-itek si Afo Chiyos. Nemnem joy iyaysolat cha esel Afo Chiyos a“No on-esel ka, Afo Chiyos, maamtaan i agpayson podnoy mowan kona.
Tan no gwariy manpabasol cha si-kam, eg ka ma-gwak.” a
5 Gwara konoy pilosofon kigwan cha ngo i “Nem no mengemag kiya na ngaaw, mapteng tep naiyaybiybiy konoy kinachonong Afo Chiyos no may-inges cha basol tayo.” Nengo ngarod i mekegwan? Nat kosto aya no chosaen to kiyen Afo Chiyos? (Seman i nakigwan na echom a too.) 6 Enchi! Tep no nat maronong si Afo Chiyos, nat mebedin a kowisen ton emiin i tothoo. 7 Say songbat emo iren ma pilosofo, “Nem no kagol na pan-itekan ko, mas iyaybo-day i kinapodnon Afo Chiyos et say mechejaw si Afo Chiyos, apay nga inbasolan toak Afo Chiyos a mabesol?” 8 No seman i tabtabalan cha, singen chiyan kona i “Ma-mag ngarod i ngaaw et say mapteng i panpa-noan to.” Sema echom a too, naiyomang chaak tan chiyan kona i seman i naintoro-torok, nem nat podno. Bagay ton mechosa ira.
Mabesol I Emiin A Too
9 Nengo ngarod i mekegwan? Ampet siya iy mapmapteng kawin Hodjos iy say Gentiles cha sangoanan Afo Chiyos? Enchi tep kigwan ko la i say basol, naintorayan ton emiin i too, pati Hodjos tan Gentiles. 10 Tep iyaysolat cha esel Afo Chiyos i:
“Nagwaren polos i toon maronong, angken sa-ki.
11 Nagwariy mahaawat maypangkep Afo Chiyos
tan nagwariy naenganap a mengamted si-katho.
12 Binekan chen emiin si Afo Chiyos
tan nagwara wiy silbi ren emiin.
Nagwariy naengamag na mapteng, angken sa-ki.” b
13 “Say temi ra, inges toy
panchon a enbanget
tan naiyosal chiy esel
ched penaol.” c
“Sema nakigwan cha, naenogat a inges toy sabirong na oleg.” d
14 “Sema esel cha, iyapno na olay
na pait tan bonget.” e
15 “Inam-ay chen memono
16 tan kompormin
nakimowanan cha,
igwa ira ma nachichal cha
tan nainpa-ngos cha.
17 Nat amta riy chalan a
ontorong cha talna.” f
18 “Nagwariy tahot ched
Afo Chiyos.” g
19 Setan i iyaysolat cha esel Afo Chiyos, tan amta thayo i sema engibanagan to, sema iren Hodjos a iyay-i-kanan na esel Afo Chiyos. Isonga, nagwariy toon mebedin a mengowan i nagwariy basol to. Emiin a too, iyanbasol ired Afo Chiyos et chosaen to ira. 20 Tep nagwariy toon nainbilang Afo Chiyos a maronong kagol na pengonoran to na dinteg. Say pangkep na dinteg bengat, ipaamta thod too i iyanbasol iwan.
Sema Kinachonong Babaen Na Pamati Bengat
21 Nem niman, say pesing Afo Chiyos a mengibilang na toon maronong cha nemnem to, iyaypaamted dinteg Moses tan sola-solat iren ma profita. Kigwan to ired ma sola-solat i nat nainbilang Afo Chiyos i tothoon maronong kagol na pengonoran cha na dinteg, 22 no diket pamati red Jesu Cristo. Emiin a naematid Cristo, nainbilang iren Afo Chiyos a maronong tep nagwariy toon idasin to. 23 Tep emiin a too, iyanbasol, isonga nat mahasagwi riy kinamapteng tan kinahejang Afo Chiyos. 24 Nem kagol na kaasin Afo Chiyos cha si-kathayon rigalo tho, nainbilang to kiyen Afo Chiyos a maronong babaen na imag Cristo Jesus a engidibchid si-kathayo. 25 Intangdal Afo Chiyos si Criston metiy say ikaron Cristoy chosa thayon iyanbasol, tan babaen na chala tho, mepekawan i basol tayo no memati kiyed si-katho. Imag Afo Chiyos iwan say pebiybiy to i maronong et chosaen ton emiin i toon iyanbasol. Tep nontan da iyano-anosan Afo Chiyos iriy iyanbasol, tan iyanseke-seked ingkathod timpo na ingkathiy Cristo asan to ira koston chosaen. 26 Imag ngon Afo Chiyos iwan say pebiybiy to niman i maronong mismo. Tan maronong pay si Afo Chiyos no ibilang ton maronong i toon naematid Jesus tep koston inkaro wen Jesus i chosa na toon iyanbasol.
27 Isonga, nagwaren polos i mebedin a iki-tek tayod sangoanan Afo Chiyos. Nat mebedin tep say kaysalakanan, nat naedafod mapteng a nainpasing tayo, no diket cha pamati thayo. 28 Tep sigorado kiyen nainbilang Afo Chiyos i toon maronong tep naematid Jesu Cristo, nat sema nainpangonod to na dinteg Afo Chiyos. 29 Kin jo emo i si Afo Chiyos, si-kathoy Afo Chiyos iren ma Hodjos bengat. Nem si-katho ngo pay i Afo Chiyos iren ma Gentiles. 30 Tep sa-ki bengat i Afo Chiyos, tan ibilang to iriy Hodjos a maronong kagol na pamati red Cristo, tan ibilang to ngo iriy Gentiles a maronong kagol na pamati red Cristo. 31 Sejay a kowan kona maypangkep na pamati, piyan ton a-seden aya i ikepil tayo met laeng i dinteg? Enchi tep no naemati kiyed Jesu Cristo, onda-da-toy pengonod tayo na dinteg.