Iyodop Ches Paul Cha Roma
27
Idi iyakcheng iwan, niyemnem Gobirnador Festus a mandogan kawid bapor cha Italy, isonga in-awat ches Paul tan echom a balod cha Julius a kapitan na gropon sosolcharon engaranan na Gropon Caesar Augustus. 2 Et idi mimothok i akow na ida-jat mi, simekep kawid bapor a edafo did siyodad na Adramyttium a chanchanin onbetik da. Nasima-mad i bapor ired ma siyodad cha probinsiya na Asia a gwared kilig na baybay. Et dima-jat kawin iyodop mis Aristarchus a i-Thessalonica a siyodad cha probinsiya na Macedonia. 3 Idi gwa-gwa tho, sima-mad kawid siyodad na Sidon. Kiyaasian Julius si Paul, et intolok ton iyanbisited kakajem tod man say i-kan ched si-kathoy mesepol to. 4 Et bintihan miy Sidon et chidan miy kilig na Cyprus a esiroman tep pimekes alin pasiyay chahem cha si-kawi et man-aaloniy kawin iyan-aahad. a 5 Et iyaktang miy baybay a iyay-esop cha probinsiya na Cilicia tan Pamphylia, et mimothok kawid Myra a siyodad cha probinsiya na Lycia. 6 Et chiwan i enafolan Julius na bapor a edafod Alexandria a onkowan cha Italy, et inpandogan to kawid man. 7 Kagol na mapkes a chahem, imaloniy kawi na chakel a akow, et edigathan kawin may-esop cha siyodad na Cnidus. Idi mimothok kawid man, mapkes pay a pasiyay chahem, et eg kawi mahakowan cha chalan a piyan mi. Isonga, kimowan kawid afil a chalan, et chidan miy kilig na Crete a esiroman a dima-bas kawid dogad a Salmone. b 8 Et angken chidan miy esiroman a kilig na Crete, edigathan kawi pay ingkathod mimothok kawi wed dogad a engaranan na Esiroman a Sa-maran na Bapor a iyay-esop cha siyodad na Lasea.9 Kagol a ebayag a etaktak kawi na mapkes a chahem, emanekot men mandogan cha bapor tep sema akow na ayongar na Hodjos, epalabas mala tan niman miy timpo na powek. Isonga, binidin iren Paul i 10 “Kakajem, amtak i no ipilit tayon ontoloy, ngaaw i panpa-noan na biyahi thayo tep mechechal i kalka tan bapor, et gwara ngoy metiy.” 11 Nem sema kapitan na bapor tan mahabapor, piyan chen ontoloy. Isonga, sema kapitan na sosolcharo, inki-ngelan to ira, no diket si Paul. 12 Sema gwa-gwa-chen echom min mandodogan cha bapor, piyan cha ngon ontoloy tep sema dogad a sima-maran mi, nat mapteng a salchengan no timpo na powek. Kigwan cha i magangkana no ontoloy kawid Phoenix a sa-kin siyodad na Crete a nasima-maran na bapor tep esiroman iwa dogad. Et mebedin a man-iyan kawid man ingkathod onda-bas miy timpo na powek.
Powek Cha Baybay
13 Idi gwariy dodop a chahem a emangkedafod pesaw, kin cha i mebedin men ontoloy kawid Phoenix. Isonga, kiyojod cha diy danchok a engisalcheng na bapor, et dima-jat kawin chidan miy kilig na Crete. 14 Nem idi engkay, gwara diy powek a mapkes a edafo did Crete. 15 Kina na powek i bapor, et sema bapor, nat mahaabantin onsangod powek. Isonga, intolok cha wen intolchon na powek i bapor cha kompormin torongan to. 16 Idi sibi wid Cauda a otik a dogad a edikmothan na baybay, esiroman kawid man. Isonga, sema bangken miyan ikoyod, inkalka wid bapor mi say nat mechechal, nem edigathan kawin engamag. 17 Idi inkalka ra wiy bangka, in-iketan chiy bapor mi na mahedsang a pakod say nat mansi-si-jan. Et insa-kod cha ngoy banay a dofot a naintolchon na chahem say nat paspas wiy bapor. Tep ketahot iren maychengpel emoy bapor cha echarathan a dogad a engaranan na Syrtis a iyay-esop cha kilig na Libya. Et kimowan ired kompormin engitolchonan na chahem. 18 Idi gwa-gwa tho, mapkes pay laeng i powek, isonga inba-ba-tok chiy kalked baybay. 19 Idi maykatdon akow, inba-ba-tok cha ngoy ngano na bapor cha baybay. 20 Et nat sini-neng miy akow tan pasingsing na chakel a akow, et mapkes pay a pasiyay powek. Isonga, nat niyamnama wi wen manbiyag.
21 Ebayag a eg kawi enga-engan. Isonga, imakgwat si Paul cha sangoanan na tothoo, et kigwan to i “Aahi, no inki-ngelan jo komay kigwan ko, nat dima-jat kiyed Crete, et nagwara komay echaral tan iyayba-ba-tok. 22 Nem angken seman, pekedsang joy nemnem jo tep nagwared si-kayoy metiy, no diket sema bapor bengat i mechechal. 23 Amtak iyay tep nonta edagwi si Afo Chiyos a nachijaw ko tan iyayda-kaman ko, engito-no na anghil a iyanparang a man-ak-akgwat cha askang ko. 24 Et kigwan na anghil i ‘Paul, enog i tahot tep mesepol a kowisen token Caesar a gwared Roma. Et kagol cha si-kam, kaasian Afo Chiyos i emiin a ekidogan cha si-kam say nagwared si-kariy metiy.’ 25 Isonga, aahi, pekedsang joy nemnem jo tep gwariy piyal kod Afo Chiyos tan napiyatik i metongpal i kigwan tod si-kak. 26 Nem maychengpel i bapor cha dogad a edikmothan na baybay.”
27 Idi sawal na epat a dagwi manipod nonta iyanchogiy powek, towan itolchon kawi pay na chahem cha baybay a Adria. Et nonta chanchanin kawa na dagwi, sema iren naiyan-obded bapor, diyekna ra i man-eesop kawid chaga. 28 Isonga, diyohod chiy chalem na chanom, et epat a polon mitroy chalem to. Idi kimi-ki-nan ma ira, diyohod cha mowan i chalem na chanom, et tedon polon mitro wa. 29 Et timahot iren maychengpel i bapor ired ma boleka. Isonga, insa-kod chiy epat a danchok a edafod oget na bapor say isalcheng chiy bapor, et iyankararag ira i onnihal nem engkay. 30 Et sema iren naiyan-obded bapor, piyan chen on-ekal. Isonga, insa-kod chiy bangked baybay a inbili-biling chen onkowan cha sango na bapor say isa-kod cha iriy danchok chiwan. 31 Nem kigwan Paul cha kapitan na sosolcharo i “No on-ekal ira ma naiyan-obded bapor, metiy kayon emiin.” 32 Isonga, kiyetno na sosolcharoy pakod na bangka et iyaypayas.
33 Idi chanchanin kagwis, pinidit Paul a mengan i emiin a tothoon kigwan to i “Sawal na epat a akow ma et jowan chanagiy mepesamak cha si-kathayo. Et ingkathod niman nagwariy kiyakan jo. 34 Isonga, pangaasi yo, pengan kayo say onkedsang kayo tep nagwared si-kayoy metiy.” 35 Idi kigwan men Paul iwan, engala na tinapay et iyansalamat cha Afo Chiyos cha sangoanan chen emiin. Et piyetpet-ing toy tinapay et engan. 36 Et kimedsang i nemnem na emiin a too et engan ngo ira. 37 Sema bilang min emiin a mandodogan cha bapor, chegwen dasos tan pithon polo tan enem. 38 Idi engan kawin emiin et iyapsel kawi, inba-tok chiy wheat cha baybay say onka-jas i bapor.
Echaral I Bapor
39 Idi nimihal, gwariy tiyakmang min chaga, nem sema iren naiyan-obded bapor, eg cha piyeschian iwa dogad. Nem gwariy mita ren dogad a echarathan cha kilig na baybay, et niyemnem cha i mahaparada ra emoy bapor chiwan. 40 Isonga, kiyetno riy pakod iren ma danchok et inpayas ched baybay. Biyasbas cha ngoy pakod a iyay-ike-iket cha kejow a naengitorong na bapor. Et inkayang chiy banay a dofot cha sango na bapor say itolchon na chahem i bapor cha kilig na baybay. 41 Nem iyaychengpel i bapor cha echaratan a dogad a ka-jat i chanom to. Iyay-istuck i sango tho et nat mahakiykiy. Sema oget to, chiyeng-chengpel na chalojon ingkathod iyansi-si-jan.
42 Idi epasamak iwan, niyemnem na sosolcharo i bonoen cha iriy balod, nahol ni mannangoy ira et memtik da ira. 43 Nem sema ngon kapitan, nat piyan ton metiy si Paul. Et insalcheng toy sosolcharo. Et inbilin na kapitan i sema iren mahanangoy, onjaptok koma ired chanom et mannangoy ired kilig na baybay. 44 Et sema ngo iren echom, onoren chen onpeket ired ma tabda tan kejow a iya-kal cha bapor. Et si-kathoy inpasing min emiin a imekal cha bapor et sibi wiy chaga.