Chijaw Na Chakel A Toos Jesus Nonta Mimothok Cha Jerusalem
11
Idi mankokowan ires Jesus cha Jerusalem, imesop ired Bethphage tan Bethany a sa-kod na Chontog na Olivas. Et engidagwas si Jesus na chegwen disipolos ton 2 kigwan to i “Tahejod ma otik a siyodad a iyaysongbob. Apaman a onmothok kayod man, gwariy sebien jon kilaw a donkey a iyay-iket a eg esaha-sahayan. Ogas joy iket to et ala jo did jay. 3 No gwariy mengibaged si-kayo i ‘Niyana jowan ogasa tan?’ kowan jo i ‘Mesepol na Afo wi et ioli thon chakos.’ ” 4 Et imekal ma ira, et sibi riy kilaw cha kalsaren iyay-iket cha sakepan na baliy. Idi chiyan ogasa, 5 sema iren toon kainakgwat chiwan, kigwan cha i “Niyana jowan ogasa tan?” 6 Insongbat iren ma disipolos i “Mesepol na Afo wi et ioli thon chakos.” Et intolok iren ma toon a-daen iren ma disipolos iwa kilaw a donkey.7 Et intolod iren ma disipolos iwa kilaw cha kad-an Jesus, in-ap-ap chiy baro red beneg na kilaw, et iyansahay si Jesus. 8 Sema iren chakel a toon gwared man, in-ap-ap chiy ta-kep na baro red kalsara. Sema iren echom, engala cha na ebolongan a panga-pangen kiyetno red payo-payow, et in-ap-ap ched kalsara. 9 Sema iren iyangkedagwas tan sema iren kaono-onod, kekineljaw ira i “Hosanna! Mabindisjonan i into-no din Afo Chiyos! 10 Mabindisjonan i pantorayan alin David a afo thayo la. Hosanna! Sapay koma maychejaw si Afo Chiyos a gwared dangit.”
11 Idi simekep ired Jerusalem, kimowan si Jesus cha timplo, et sini-neng ton emiin i gwared man. Et imawas et ekikowan med sawal na chegwen disipolos tod Bethany tep emangkedagwi wa.
Sema Kejow A Fig A Nagwariy Dawes To
12 Nonta gwa-gwa thon emangkedafo di ires Jesus cha Bethany, aofa. 13 Gwariy tiyakmang ton kejow a fig a mabolong, et kimowan a meni-neng no gwariy dawes to, nem mabolong bengat tep nat timpo na sidawesan. 14 Isonga, kigwan men Jesus chiwa kejow i “Sapay koma eg ka wa mandawe-dawes mowan.” Et inki-ngelan na disipolos to ma kigwan to.
Chiyagchag Jesus Iriy Kedinahod Timplo
15 Idi imolis Jesus cha Jerusalem, kimowan mowan chiwa bo-dayan na timplo, et enagchag iren ma kedinaho tan sema iren ketinongkal na naiyaytangdal cha Afo Chiyos. Tingwang to pay iriy damisaan iren ma naena-dat na pilak tan tokkongan iren ma naiyandaho na kalapati. 16 Inparit to pay iriy naenakbat na kalken manchedan cha bo-dayan na timplo. 17 Et intoroan to wa iriy toon kigwan tod si-kara i “Iyaysolat cha esel Afo Chiyos i ‘Say baliy ko, mengechanan na baliy a pankararagan na emiin a too.’ Nem si-kayo, inpanbalin jo na pandoko-dokoan jo na echom.” a
18 Sema iren aafo na papari tan mamaistoro na dinteg, inki-ngelan chiy inpasing Jesus, et engana-anap ira na pesing chen memono. Piyan chen bonoen tep entahot cha tep iyasdaaw iriy chakel a too na naintoro-toro tho.
19 Idi emangkedagwi wa, bintihan iren Jesus i siyodad.
Sema Iyakpit A Kejow A Fig
20 Nonta dadabi, diya-basan iren Jesus iwa kejow a fig a iyakpit da, angken damot to. 21 Et niyemnem men Peter iwa kigwan Jesus, et kigwan to i “Maistoro, matham kechi a. Seja kejow a biyotbot mo, iyakpit.”
22 Et insongbat Jesus i “Pemati kayod Afo Chiyos. 23 Sejay a konen kod si-kayo, podnon no patien jo i metongpal i konen jo tan nagwariy chegwa-chegwa yo, mebedin a konen jod ma chontog i ‘Mo iba-tok i angel mod baybay,’ et metongpal. 24 Isonga, konen kod si-kayo i no gwariy ibaga yod Afo Chiyos, egwathen jo basta patien jon may-i-kan. 25 Tan no mankakararag kayo iy gwariy toon iyanbasol cha si-kayo, pakawani yo say si Awejon gwared dangit, pekawanan to kayo ngo. 26 Nem no eg jo pekawanan, si Awejon gwared dangit, eg to ngo pekawanan iriy basol jo.”
Sema Salodsod Maypangkep Na Karebengan Jesus
27 Imoli mowan ires Jesus cha Jerusalem. Idi man-aahad si Jesus cha bo-dayan na timplo, sema iren aafo na papari, mamaistoro na dinteg, tan iyangkaama, kimowan ired kad-an ton 28 kigwan cha i “Ngoy karebengan mon mengipesi-pesing iren tan? Siyay engi-kan nitha karebengan mo?”
29 Insongbat Jesus i “Gwara nin i ibagak cha si-kayo. No songbathan jo, igwanggwang kod si-kayo no nengoy karebengan kon mengema-emag iren jay. 30 Sejay i salodsod ko. Siyay engi-kan cha John na karebengan ton memonjag na too? Si Afo Chiyos ono too? Kowan joak.”
31 Et iyantatabalan cha wa i “Ngoy konen tayo? No konen tayo i si Afo Chiyos i engi-kan na karebengan John, konen to emo i ‘No setan ngarod, apay nga eg jo piyati?’ 32 Nem no konen tayo i too bengat i engi-kan, imeno wa?” Kigwan cha man tep entahot chiy pesing na tood si-kara tep napiyati na emiin a too i agpayson profites John.
33 Isonga, kigwan cha wed Jesus i “Nat amta wi.”
Et kigwan men Jesus i “Angken si-kak ngo, ekak igwanggwang cha si-kayo no siyay engi-kan na karebengan kon mengema-emag iren jay.”