Sema Dahin I-Gerasa A Iya-janan Na Chakel A Dimonyos
5
Intoloy iren Jesus a bima-sil chiwa baybay ingkathod mimothok ired sahop a naiyan-iyanan iren ma i-Gerasa. a 2 Idi imepas si Jesus chiwa bangka, gwariy sa-kin dahin engaspol cha si-kathon iya-janan na dimonyo. Edafod ma dogad a iyaybekaan na iyangketiy 3 tep chiwan i naiyan-iyanan to. Nagwara wiy mahabalod angken kadinay iyosa-osal cha. 4 Tep eminchakel a nakiyadinaan cha, nem nakiyetchang toy kadined diwa tho tan nakiyomek tod seki tho. Nagwariy mahatengel tep mahedsang a pasiya. 5 Gwiya-gwa-gwa tan diyabi-dabin naiyan-aha-ahad cha dogad a iyaybekaan na iyangketiy tan chiwa chonchontog a nakimelkeljaw tan nasiyoga-sogat toy angel to na batho.6 Idi tiyakmang na dahis Jesus, bintek to et iyantalimohod iwa dahid sangoanan to. 7 Et inpekes toy esel ton kigwan to i “Jesus, Anak Afo Chiyos a Kahejangan, ngoy pekibiyangan mod si-kak? Isafatam cha Afo Chiyos i eg moak chosaen.” 8 Kigwan to man tep inbilin Jesus da i “Si-kam a dimonyo, awas ked ta too!”
9 Et inbagen Jesus i “Siyay ngaran mo?”
Insongbat na dahi i “Si Diniboy ngaran ko tep chakel kawi.” 10 Et ekiadok cha Jesus i eg to ira pebtik chiwa sahop.
11 Iyaytompong a gwariy chakel a kechel a kekinakan chiwa chontog, 12 et iyadok iren ma dimonyos si Jesus i “Itolok mo kawin onkowan ired ma kechel say may-i-jan kawid si-kara.” 13 Et intolok ma iren Jesus. Bintihan ma iren ma dimonyos iwa dahi et iyay-ejan ired ma kechel. Et sema ngo iren kechel, iyanbetik ma iren chimalong a iya-kas mala ired ma baybay et iyalned ma ira. Sema karakel iren ma kechel, chanchanin chegwen dibo.
14 Sema ngo iren manbanbantay na kechel, iyanbetik ira et ingwanggwang ired siyodad tan iyay-esop a doga-dogad. Et kimowan ma iriy too say si-nengen chiy epasamak. 15 Idi mimothok ired ma kad-an Jesus, mita ra ma dahin sigod a iya-janan na dimonyos. Mantoktokkong a ebaroan tan imoli wed mapteng a nemnem to. Et timahot ira. 16 Sema iren toon eni-neng, ingwanggwang cha wiy epasamak chiwa dahi tan sema iren kechel. 17 Et ekiadok ira ma tood Jesus i bebtihan to ma sahop cha.
18 Idi mankebkeb-ong si Jesus chiwa bangka, sema dahin iya-janan na dimonyos nontan, ekiadok i mekiolop. 19 Nem nat intolok Jesus a kigwan to i “Mapmapteng no onbetik ked ma echom mo et iis-istoriyam a emiin i inpasing Afo Chiyos cha si-kam tep kiyaasian toka.” 20 Et iyamtik ma iwa dahi et iyan-aha-ahad chiwa sahop na Decapolis b a engiis-istoriya na inpasing Jesus cha si-katho. Et iyasdaaw iriy too.
Sema Anak Jairus Tan Biin Mansekit
21 Idi imoli ches Jesus cha piig na baybay a iyandogan cha bangka, esa-sa-nop i chakel a tood ma kilig na baybay a imepasan to. 22 Gwara ngoy sa-kin toon mimothok a si Jairus i ngaran to a sa-kin aafo niwa synagog. Idi mita thos Jesus, iyantalimohod cha sangoanan to, 23 et ekiadok i “Chanchanin metiy i anak min bii. Pangpangaasim, kowan ka din isagpat moy diwam cha si-katho say onmapteng et nat metiy.” 24 Et ekiolop si Jesus. Et iyono-onod ngo na chakel a toon naiyansisinagid iren ebo-bo-ngol ired Jesus.
25 Gwara ngoy sa-kin biin manbobolos i chala tho na oneg na sawal na chegwen tawen. 26 Ika-ikasan na chakel a doktor, nem inpandigat cha et a pasiya. Kiyastos ton emiin i pilak to, nem eg pay laeng aagasan. Ema-ma et i sahit to. 27 Chimag toy maypangkep Jesus, et dimesot chiwa chakel a toon kimowan chiwa benekan Jesus et kiyapkap toy baro tho. 28 Tep gwared nemnem to i “Basta kapkafen koy baro tho, onmaptengak.”
29 Apaman a imag to man, simalcheng a chakos i chala thon manbobolos, et iyamta tho wa i mimapteng. 30 Nontan ngo, diyeknen Jesus i gwariy panakabalin ton imawas cha si-katho. Ingwasgwas to wiy matha tod ma chakel a toon kigwan to i “Siyay engapkap na barok?”
31 Et kigwan na disipolos to i “Chakel i toon kesinagid cha si-kam. Apay nga mowan ibaga no siyay engapkap ka?”
32 Nem ina-inap et Jesus no siyay engapkap. 33 Iyamten ma biiy epasamak cha si-katho, isonga kimowan med kad-an Jesus a manbabayedbed a iyantalimohod chiwa sangoanan to, et inistoriya thon emiin i epasamak. 34 Et kigwan Jesus i “Anak ko, mimapteng ka wa kagol na pamatim cha si-kak. Taha wa betik et gwariy talned nemnem mo. Eg on-oliy sahit mo.”
35 Idi niyankonen Jesus iwan, gwara ngo iriy toon mimothok a edafo ired baliy Jairus a kigwan cha i “Enog i tiyaktak itha maistoro tep etiy iwa anak mo.” 36 Nem nat inkaskason Jesus iwa kigwan cha. Kigwan to et cha Jairus i “Enog i tahot. Basta pemati ka.”
37 Et nat intolok Jesus a gwariy mekiolop, malaksid si Peter bengat tan si James ni John a san-ahi. 38 Idi mimothok ired baliy Jairus, miten Jesus i kenginalawngaw a toon keninangis tan kenginogngogngog. 39 Simekep si Jesus a kigwan to i “Niyana keninotheng kayo tan keninangis kayo? Nat etiy iwa nga-nga, manjo-jo-kow bengat.” 40 Nem ngini-ngi-ngian cha, isonga inpaawas Jesus ira ma emiin a too. Et tiya-gway toy awa tan inen ma nga-nga tan sema iren disipolos to, et simekep ired ma kad-an na nga-nga. 41 Et iyagchian Jesus i diwen ma nga-ngen kigwan tod si-katho i “Talitha koum,” a sema banag to, “Anak, konen kod si-kam i bangon ka.” 42 Et bimangon a chakos iwa nga-nga et iyan-ahad. Sawal na chegwiy tawen to. Sema iren eni-neng niwan, iyasdaaw iren pasiyen emiin. 43 Et tiyengteng iren Jesus i eg cha igwanggwanggwang cha angken sa-kin too i epasamak. Et kigwan tod si-kara i pekanen chiy nga-nga.