Jesús neg-tuku-omodanikidgin neg-igi-kunonikoedgin chunmajad
24
Tegin Jesús Pabzhe-koled-neg-akar nodgu,
pato nadedgin e-chapingan Jesúsga chogalmal:
—Tummad,
pe tak,
Pabzhe-koled-neg yer-takle-á.
2 Tenal Jesús aga e-chapinganga chogal:
—We neg pinche pe tak yer-takle.
Tenal an chunchunnad pemalga chogdo:
imi Pabzhe-koled-neg-chiid kujal pel-kwapa eyarilego,
akwa-askin-chii pel peiojul.
3 Tegin Jesús kep nadzhun Olivo-yalzhe.
Tegin Jesús Olivo-yalgin ampagutapmalzhun.
Tegin e-chapingan Jesúszhe nonimalgu,
pidzhi Jesúszhe immal ekichialmal:
—Imi an pei pe anmalga chog,
imis pe-Pabzhe-koled-neggin-chunmajad,
inkwa kunoniko.
¿Tenal anmalga igi wilub-oyolenoniko pe-kannan-tanikoed pato omodani?
¿Tegin anmal igi wisgumalbalo neg-tuku pato omodanibal?
4 Tegin Jesús aga e-chapinganga chogal:
“Nabir.
Tenal pe nue aga takermal tule pe-yardadamal.
5 Imi tulemal-ichejul an-nuggin yami chunmanonimalo.
Tenal we tulemal chognonimalodo:
‘Antin Cristo.’
Tenal we tule-kakanzhenonimalad íchejul tulemal-yardanonimalo.
6 “Tegin pe itodamalbalo pila-nonai.
Tegin pe iche-iche itodamalbalo choglenai pila-nobi-kunai.
Tenal pe melle tobgudamalo.
Imi an-pemalga-chogzhiidyob kued-wilub,
tenal neg-pelgued ampa omojul.
7 Tegin pe itodabalo tulemal,
kaka-akal-akal-chunmamaladbak pila-ononanimal,
tegin napa,
napa-pidbak pila-ononanimalbal.
Tegin napa-pid-pidgin mas-kunned nikchul-kunoniko,
tegin neg-tutumaked akne-akne nonibalo.
8 Tenal we ponimal kep pinche iche-iche kudanimal.
Tenal ponimal kujal pul-pule kunonimalo.
9 “Imi neg weob kunonikil,
tulemal kep pe-kanonimalo tule-tummaganga pe-ukegal sapejul pe-oturdagal.
Tenal tule-tummagan sapejul pe-imamalo tegin pe-mesmalbalo.
Tenal pe-anpal-naigujadbal,
tulemal-pel-kwapa istar pe-taknonimalo.
10 Tegin te ibegin tule-anpal-naigusmalad-íchejul an-akar nomalo.
Tegin tulemal-an-akar-nosmalad tule-tummaganga aga emal-emal tuktinonimalo.
Tegin we tulemal aga emal-emal istar taknonimalbalo.
11 “Tenal Pab-kaka-palchogmalad-chunchunnadzhulmalad-ichejul nonimalo.
Tegin Pab-kaka-palchogmalad-chunchunnadzhulmalad íchejul tulemal-yardanonimalo ebak naigugal.
12 Tenal iskued pul-íchejul naigunonikidbal,
tulemal-akpene-Pab-pilalgusmalad-ichejul Pab-igenonimalo.
13 Tenal pemal neg-puled-naid-pelguedzhe abin-purtismalal,
pemal abonolego Pabbak meggal.
14 “Tenal Pab-neg-takmaid-kaka-nuegan pel-kwapa-nap-naid-ugakche choglego,
tule-kaka-akal-akal-chunmamalad wisgunonimalgal Jesús tule-abono.
Tenal Pab-kaka-nuegan-pel-kwapa-choglejadgin kep neg-pelgunoniko.
15 “Tenal pe takalil,
Pabzhe-koled-neg-impabal Pab-kaka-palchoged-Daniel chogzhadyob,
immal-iskan-kwichi,
16 tulemal-Provincia-Judeagin-pukmalad ilgwen wakinenabmal yal-tummaganzhe.
(Imi tule we kaka apchogalil,
mag itogelen,
nabirin.)
17 “Tenal tule-neg-uwas-askin pukmalal,
melle neg-yabal pal togo immalmal weigal,
ilgwen neenabmal.
18 Tenal tule nagnugangin kudimalal,
melle negzhe pal togmalo molmal amigal,
ilgwen aka neenabmal.
19 “Tenal te ibegin omegan-ponigwal-kwichimalad tegin omegan-kin-nuskan-nunanimalad ib-kuoedbal peyedzhe wilemalo.
20 Tenal pemal peyedzhe Pabzhe kolenabmal we immal melle peyedzhe neg-tampedgin,
o chulil,
ulukued-ibegin kugal.
21 Imi te ibegin kepe-nap-naigujad-akar imisgwadzhe teob peyedzhe tule-wileged kwen kudijul.
Tenal te-cholbal neg-peyedzhe-wileged weob pal kwen nonikojulbal.
22 “Imi Pab Tummad we ibe-puled chikojulilen,
tulemal kwen unniguojulmaloen,
pél purkwemaloen.
Tenal Pabdin tule-chulesmalad-pilaledbal ibe-puled chiko tule-Pabbal-chulesmalad melle twagdar peyedzhe wilegal.
23 “Tenal te ibegin tule pega chogalil:
‘Pe tak,
wegin Cristo-Pab-akpene-chogzhad-palmidagoed,’
o chulil,
pega chogdabalo:
‘Wépal Cristo kudii,’
melle pe we tulebal ibzhao.
24 Tenal Cristo-chunchunnadzhulmalad tegin Pab-kaka-palchogmalad-chunchunnadzhulmalad akninonimalo.
Tenal we tulemal peyedzhe immal-taktijulmalad imanonimalo,
yami oyogal e-chunmakeddin ib-chunchunnad.
Tenal we tulemal tule-Pab-itolegedbal-chulesmalad yardabi-kunonimogoen,
tenal tule-Pabbal-chulesmalad yardalegojul-kuo,
tenal pinche tulemal-yogasalmalad yardalenonimalo.
25 Tenal pe nuekwa an-chunmajad itomalo,
antin pemalga pato iktualeba pel-kwapa chogzhado,
neg igi kuoed.
26 “Al tule pega chogalil:
‘Wépal neg-nikchulidbal,
Cristo kudii,’
tenal pe melle webal pe nao.
Tegin tule pega chogdamalbalo:
‘Wegin Cristo neg-yabal otukal chii,’
tenal pe melle we tulebal ibzhemalo,
wedin pinche kakanzhemal.
27 “Tenal an-Te-Tule-Chunna kannan tanikil,
mariped tad-nakwedzhik tad-arkwanedzhik ipedyob an mag taklenonimogo.
28 Imi immal-purkwaled pia nungumaídin,
tebal mulamal keg-chulgu ampagunonimalo.
Tenal an pega chogzhiidyob pe neg takalil,
an-kannan-tanikoed pato omodani.”
Pab-Jesús kannan-tanikoedgin chunmajad
29 Tegin Jesús chogalbal:
“Imi tule-peyedzhe-wilesmalad-cholbal,
ampa te ibegin tadgwadin akinnoniko,
tegin nidin neg pal kwen otalogojul,
tegin iskwadin nikpa-akar apatnoniko,
tegin nikpa-neg-kanalejiid pela-pela tutumanonimalbalo.
Is.
13:10; 34:4
30 “Imi te ibegin tulemal nikpa an-Te-Tule-Chunna-e-wilub taknonimalo.
Tenal tule-kaka-akal-akal-chunmamalad nap-naid-ugakche pel-kwapa peyedzhe pukib-itononimalbalo.
Tenal tulemal-kaka-akal-akal-chunmamalad taknonimalo,
an-Te-Tule-Chunna mogil-impabal pela-pela nugu-taklegedgin tegin kannalegedgin noniko.
31 Tenal Pab-angelmal kal-trompeta okotel,
an-Te-Tule-Chunna naga angelmal-palmido pel-kwapa napa-naid-ugakche tule-an-tar-chusmalad-weinegal.
32 “Imi pemal wag-islub-chapigin pe turdakenabmal.
Imi pe wag-islub-chapi takalil,
e-aan-purwiganabal mullu-mullu ampagunoni,
tegin pe takalbalil,
e-kamal aknidanimalbal,
wedin chogle,
neg pato yol omodani.
33 Tenal pe wag-islubgin turdajad-yopí an-pega-chogzhadyob pe neg takalil,
pemal pato wisgunonimalmogo,
an-Te-Tule-Chunna-kannan-tanikoed pato iti-pakal.
34 “Tenal an chunchunnad pemalga chogdo:
imi tule-te-ibegin-pukmalad,
yo purkwemaladdu,
an-pega-chogzhadyob keg-chulgu kued-wilub.
35 Imi nikpa-neg tegin iti-nap pelgunoniko,
tenal an-immal-chogzhad keg-chulgu kued-wilub,
an-kakapurwa kwen perienguojul-kuo.”
Tule kwen wichul ibi-ibegin Jesús kannan taniko
36 Tegin Jesús chogalbal:
“Imi Pab-Machi-iti-napche-tanikoed tule pel kwen wichulmal,
angelmal pel wichul,
Pab-Machi aga tukin pel wichulmo ede ibi-ibegin noniko.
Tenal Pab Tummadbi wiis ibi-ibegin,
ibi-wachigin Pab-Machi iti-napche kannan taniko.
37 “Imi akpene Noé-maigu igi kúsdin,
an-Te-Tule-Chunna iti-napche kannan tanikil,
ampa Noégin-kujadyob kunonimogo.
38 Tenal Noé-maigu,
ampayo mu-tummad tageddu,
tulemal mas-kunnedginbi pul pinzhenanimal,
kobedgin pul pinzhenanimal,
ome-nikuedgin pul pinzhenanimal,
tegin pabgan machiga-ome-ukedgin pul pinzhenanimal,
tegin pabgan punaga machered-ukedgin pul pinzhenanimal.
Tenal Noé ul-tummadzhe-togzhadzhe tulemal ampa kwen ogwaledzhulmal.
39 Tenal we tulemal immal-kwen-wichul pukwamal mu-tummad neg-odononikidzhe.
Tenal mu-tummad pél tulemal-ocheles.
Imi an-Te-Tule-Chunna kannan tanikoedgin,
tulemal ampa immalgin-kwen-pinzhejul-pukmaladgin kunonimogo.
40 “Tenal an-tanikoedgin machergan-walbo nagnugin arpananikil,
walgwen chulenoniko,
tegin walgwen peio.
41 Tenal ome-walbo ob nagnanikil,
walgwen chulenoniko,
tegin walgwen peio.
42 “Al an pemalga chogzhundo:
pemal kuakwa kudiguenabmalmo,
pe wichul ibi-ibegin pe-Tummad noniko.
43 Al an wisgal pega chogdo:
imi neg-ibed wisgujalen mutik ibi-wachigin tule-immal-aturzheed noniko,
we neg-ibed pali-pali neg algenain melle ebi-immal aturzhalegal.
44 Tenal pemal-an-abintajulidgin an-Te-Tule-Chunna pemalzhe kannan noniko-choggu,
al pemal kuakwa kudiguenabmalmo an-abingegal.”
Jesús mos-nuedgin tegin mos-iskanagin chunmajad
45 Tegin Jesús chogalbal:
“¿Imi toa-tule-jogna inniki nanemogo mos-immal-wijiidbal e-tummad-chogzhadyob inniki nanajadyob?
Nabir.
Imi teun takalgu neg-ibed mos-walgwen-ebes ega mos-pimalad-takegal,
tegin e-tummad-chogzhadyob masgin mos-pimalad-okunkalbal.
46 “Tenal neg-ibed kannan nonikil we tummad taknoniko we mos e-chogzhad-pallí inniki immal imanai,
we mos ib-nued imas,
tegin we mosga ib-nuedga kunoniko.
47 Tenal an chunchunnad pemalga chogdo:
imi mos-yer-nanajadbal e-tummad pél we mosga e-immalmal ebeo ega takegal.
Imi an-Te-Tule-Chunna we tummad-aga-e-mos-imajadyob pemal-imamogo.
48 “Tenal mos-iskana aga pinzhedago:
‘An-tummad imiszhul noniko.’
49 Tegin mos-iskana sapejul mos-pimalad-sakidago.
Tegin we mos tule-mumurgumaladbak mes mas-kuntago,
tegin inna-kobdabalo.
50 Tenal mos-iskana-e-tummad ampa abintajulidgin moszhe noniko.
51 “Tenal mos-e-tummad nonikil,
koa-koa mos-iskana-imanoniko.
Tegin e-tummad igal-uko mos-iskana tule-pinche-askinbi-nued-nanemaladbak mes sapejul oturdalegal.
Tenal tule-oturdalegedgin,
we tulemal peyedzhe podamalo,
tegin peyedzhe wilejiidbal nugal kotamalbalo.
Imi an-Te-Tule-Chunna kannan tanikil,
tummad e-mos-iskana-imajadyob antin pemal-istar-an-chapingan-imasmalad-imanonimogo.
Pitogua.”