—Tule-oturdaked pe tak,

¿Pabzhe-koled-neg akwa-purwijul ne-á?

¿Tegin neg-nugu-taklebal-á?

2 Tegin Jesús we chapinga chogal:

—Agzhal pe tak,

we neg totojul.

Tenal we neg kujal akwa askin aga chiji pel peiojul.

3 Tegin Jesús aga e-chapinganga chunmajad-cholbal,

Jesús aga e-chapinganbak Olivo-yalzhe nadmalzhun.

Tegin Jesús Olivo-yal omosmalgu,

Pabzhe-koled-neg-abin-opakal ampagusmalzhun.

Tegin Pedro,

Jacobo,

Juan,

Andrés,

amal-walbakegwad pidzhi Jesúszhe ekichialmal:

4 —¿Imis pe chunmajad,

inkwa kuo-wede?

¿Igidgin anmalga oyolego-wede?

Anmal pei,

pedin anmalga chog.

5 Tegin Jesús aga e-chapinganga chogalzhun:

“Tenal pe nue aga takermal,

tulemal pe-yardadamal.

6 Tenal tulemal kujal ichejul pemalga chunmanonimalo:

‘Antin a-tule,

Pab-akpene-chogzhad-palmidagoed.’

Tenal we tulemal íchejul tulemal-yardamalo ebak naigumalgal.

7 “Tegin pe itodamalbalo,

pila-nonai.

Tegin pe iche-iche itodamalbalo choglenai pila-nobi-kunai.

Tenal pe melle tobgudamalo,

tenal neg-pelgued ampa omojul.

8 Imi tulemal kaka-akal-chunmamaladbak pila-onononimalo,

tegin napa napa-pidbak pila-onononimalbalo.

Tegin neg-tutumaked akne-akne noniko,

tegin mas-kunned nikchul-kunonibalo.

Tenal we ponimal kep pinche iche kudanimal.

Tenal poni kujal pul-pule kunoniko.”

9 Tegin Jesús chogalbal:

“Tenal pedin nue aga takermal,

melle an-igegal.

Tenal tulemal kujal pe-kanonikil,

tule-tummaganga pe-ukmalo.

Tegin tulemal Judio-ormaked-neggin peyedzhe pe-ebiomalo.

Tenal pe-ankin-penzhulidbal pe gobernadormalga tegin erreymalga pe ankin chunmako,

tule-tummagan an-wisgumalgal.

10 Tenal neg ampayo pelgueddu Pab-kaka-nuegan pel-kwapa-nap-naid-ugakche choglegenab.

11 “Imi tulemal pe-kanonikoedgin,

tegin pega igal-itodagoedgin,

pe melle pukib-itomalo pe igi chunmako-dewa.

Imi tule-tummagan pemalga igal-itonaidgin Pabdin kep pega chunmanoniko,

pe igi chogo-dewa.

Tenal pe aga tukin chunmakojul,

Pab Purpa Nued pebal chunmako.”

12 Tegin Jesús chogalbal:

“Imi pe-kalgwenmalad pe-tuktigo pe-mesgal.

Tegin pabgan aga machi-tuktigo.

Tegin nuskan aga e-pabgan-tuktimogo tar-mesgal.

13 Tegin pemal anpal-naidbal tulemal-pel-kwapa istar pe-taknonimalo.

Tenal pemal poni-naid-pelguedzhe abin-purtismalal,

pemal abonolego Pabbak meggal.

14 “Tegin pe takalil,

Pabzhe-koled-neg-impabal,

Pab-kaka-palchoged-Daniel chogzhadyob immal-iskan-chigojulinadgin-chii,

tulemal-Provincia-Judeaginmalad ilgwen wakinenabmal yal-tummaganzhe.

(Imi tule we kaka apchogalil,

mag itogelen,

nabirin.)

15 Tenal tule-neg-uwas-askin-pukmalal,

melle neg-yabal pal togo immalmal weigal,

ilgwen neenabmal.

16 Tenal tule nagnugangin kudimalal,

melle negzhe pal tagmalo molmal amigal;

ilgwen aka neenabmal.

17 “Tegin te ibegin omegan-ponigwal-kwichimalad,

tegin omegan-nuskan-nunanimalad poni-peyedzhe-nooedbal peyedzhe wilemalo.

18 Tenal pemal peyedzhe Pabzhe kolenabmal,

we immal melle neg-peyedzhe-tampedgin kunonigal.

19 ¿Ibiga an teob pemalga chog?

Imi te ibegin Pab-neg-opinnijad-akar imisgwadzhe teob peyedzhe tule-wileged kwen kudijul,

tegin we poni-kunaid-cholbal weob peyedzhe neg-wileged pal kwen nonikojulbal.

20 Imi Pab Tummad we ibe-puled chikojulilen,

tulemal kwen unniguojulmaloen,

pél purkwemaloen.

Tenal Pab Tummad tule-chusmalad-pilaledbal ibe-puled chiko melle tule-chulesmalad twagdar wilegal.

21 “Tegin Pab-tule-oturdaked-wilub-omodanikil,

tule-wal-walgwen pega chunmanoniko:

‘Imi pe tak,

Pab-akpene-chogzhad-palmidagoed-tule itije noni.’

Chulil,

tule pega chogdabalo:

‘Pab-akpene-chogzhad-palmidagoed-tule wépal pato noni.’

Tenal pedin melle we tulebal ibzhao.

22 “Tenal te ibegin tule-Pab-akpene-chogzhad-palmidagoed-chunchunnadzhulmalad noniko,

tegin tule-Pab-kaka-palchoged-chunchunnadzhulmalad nonimalmogo.

Tenal we tulemal immalmal-taktijulid imanonimalo yami oyogal e-chunmaked ib-chunchunnad.

Tenal we tulemal Pab-itoleged-tule-chusmalad-yardabi-kunonimogoen,

tenal tule-Pabbal-chulesmalad yardalegojul-kuo,

pinche tulemal-yogasalmalad yardalenoniko.

23 “Wijir,

nue aga pe takermal.

Imi antin iktualeba pemalga pato pél chogzhado kujal igi neg-kuoed.”

24 Tegin Jesús chogalbal:

“Imi tule-peyedzhe-wilesmalad-cholbal,

26 Tegin Jesús chogalbal:

“Imi te ibegin tulemal taknonimalo an-Te-Tule-Chunna mogil-impabal-tani pela-pela kannalegedgin tegin pela-pela nugu-taklegedgin aktedani.

27 Tenal antin,

pel-kwapa-nap-naid-ugakche,

naga angelmal-palmido,

tule-an-tar-chusmalad-weinegal.

28 “Imi pemal wag-islub-chapigin turdakenabmal.

Imi pe wag-islub-chapi takalil,

e-aan-purwiganabal mullu-mullu ampagunoni,

tegin pe takalbalil e-kamal aknidanimalbal,

wedin choglejun neg pato yol omodani.

29 Tenal pemal wag-islubgin turdajad-yopí,

an-imis-pega-chogzhadyob pe neg takalmalal,

pemal pato wisgunonimalmogo an-Te-Tule-Chunna-kannan-tanikid pato iti-pakal.

30 “Imi an chunchunnad pemalga chogdo:

imi tule-te-ibegin-pukmalad yo purkwemaladdu,

an-pega-chogzhadyob keg-chulgu kued-wilub.

31 Imi nikpa-neg tegin iti-nap pelgunoniko,

tenal an-immal-chogzhad keg-chulgu kued-wilub,

an-kakapurwa kwen perienguojul-kuo.”

32 Tegin Jesús chogalbal:

“Imi Pab-Machi-iti-napche-tanikoed tule-pel-kwen-wichulmal,

angelmal-pel-wichul,

Pab-Machi aga tukin pel wichulmo.

Tenal Pab Tummadbi wiis,

ibi-ibegin ibi-wachigin Pab-Machi kannan taniko.

33 Tenal pemal kuakwa timalo,

melle an-tanikoedgin pe pinzhejul-kuo.

Tenal pemal wichul antin inkwa pemalzhe natapo.

34 “Imi an-chunmajad,

tule-mani-ibed neg-kwebur-pidzhe nejogalidgin,

aga e-mosmalga pél e-immalmal ebejadyob.

Imi we tule mosmal-ilbal,

e-immalmal ebes ega takegal.

Tegin tule-mani-ibed mos-walgwen ebesbal mutik ega neg-algegal.

35 “Tenal tule-mutik-neg-alge-tiidyob,

pemal kuakwá tiinabmalmo.

Imi pe wichulmal inkwa pe-tummad noniko,

chedo-dewa,

neg-kabgwen-dewa,

kallin-namakedbal-dewa,

neg-tal-tal-dewa,

wichulmal.

36 Al pe kuakwa tiinabmal pe-tummad arpak nonikoedgin melle kabzhii pe-taknonigal.

37 Imis an-pega-chogzhad pemalgabijul,

tenal tule-pel-kwapa-ankin-ibzhemaladga,

an chogmo:

‘Tenal an-tanikoedgin,

pe kuakwa tiinabmal.’ ”

Teob Jesús chogzhado.