Imi Pab Tummad E-Purpa-Nuedbal tulemal-imas Pab-choged-pallí inniki karta nermagal. Imi kwenadgan pel-kwapa we karta pimal “Pab Tummad Karta” (La Biblia.) Tenal Pab Tummad Karta chogbo mai. Kwéntin pimal “Pab-Tummad-kepegin-igal-mezhijad” (Antiguo Testamento,) kwéntin pimal Pab Tummad Jesucristobal-igal-pin-mezhijad (Nuevo Testamento.) Tenal Pab-Tummad-kepegin-igal-mezhijad-kartagin nermales: Pab kepe-saglagin nap-opinnijad-igal, tegin Pab pél immalmal opinnijad-e-igalbal. Tegin we kartagin nermalesbal Adanbal neg-iskunonikid tegin tadgan-ampagusmalad-igal tegin Pab Tummad Abrahamga kaka-ukchad tegin Pab Moisésbal-igal-mezhijad tegin Pab e-kaka-palchogmaladbal iktualeba Jesúsgin tegin immalmal-pid-kuoedgin chunmajad.

Tenal Pab Tummad Jesucristobal igal-pin-mezhijad-karta-choga-tulagwen-kaka-kugle nermakal mai. Tenal karta-chogbake mai, Jesús iti-napkin kudigujadgin chunmajii (Mateo, Marcos, Lucas, Juan.) Tenal Hechos-kartagin chunmajibal Pab-kaka-nuegan igi mimiles tegin kwenadgan kepe-saglagin kudigusmalad-igal.

Tegin Pablo akal-akal karta nermasmo Pab-igalgin kwenadgan-okannogal melle noal-nanemalgal (Romanos-karta-akar Filemón-kartaje.) Tenal Hebreos-kartagin nermales Pab-Machi Jesucristo anmal-irwal-Pab-Tummadzhe-koled-pul-tummadga mai.

Tegin Santiago, Pedro, Juan, Judas, amal akal-akal karta nermasmalmo kwenadgan pul-nuekwa Pab-Jesúsbal naigugal (Santiago-karta-akar Judas-kartaje.)

Tegin napigin Pab-ega-immal-oyojadbal Juandin kartagin neg-kujal-igi-kuoed-igal nermasmo (Apocalipsis.)

Tenal Pab-Tummad-Karta pel-kwapa nermales tulemal wisgunonimalgal Pab Tummad igi mai tegin Pab Tummad pela-pela tule-pilaled-igal tegin tule Jesúsgin-pengunonikojulidbal Pabbak igi igal-nudanoniko.

Imi kepe-saglagin Pab Tummad Jesucristobal-igal-pin-mezhijad-kartadin pel-kwapa Griego-kakagin nermales. Tegin te cholbal-untaradgin kwenadgan kaka-pimaladgin Pab-karta ogwanonimal kwenadgan-pimalad pul mag-itogalmo. Al kwenadgan wag-kakaje Pab-karta ogwasmo, tegin napigin kep anmal tule-kakaje ogwalenonimojun. Pitomalgu.