Jesús errey-tummadyob Jerusalénzhe tognonikid
21
Tegin Jesús aga e-chapinganbak Jerusalén-neg-kwebur omodanigu,
Olivo-yal-naje nonimal,
Betfagé-neg-kwebur-omopen.
Tegin Jesús aga e-chapingan-walbogwadga chogal:
2 —Imi pemal we neg-kwebur-toto-pe-takchiidzhe pe nemalo.
Imi pemal we neg-kweburzhe omojal,
pedin,
pe taknatapo,
burro-nan etinal-un aga e-mimmibak.
Tegin pe moli-burromal-echikchal,
pe anka chedamalo.
3 Tenal tule peje ekichialil:
‘¿Ibiga pe moli-burromal-echiknai-wede?’
Pe we tulemalga chogo:
‘Tummaddin chog ede we molimal-pei.’
Tegin pe chogbalo:
‘Tummadde chog ede kujal pega kannan molimal-cheinonibalo.’
Tegin tule pemalga chogdamalbalo:
‘Tegil akalzhul pe moli-burromal-chedodo.’
4 Imi we immalmal-kujad akpene-Pab-kaka-palchoged chogzhad-yopí kus.
Tenal Pab-kaka-palchoged chogzhado:
5 Imi Pab Tummad chog:
Pe punamal-Sióngin-pukmaladga chogo:
“Pe tak,
pe-errey peje moli-burro-chapini-askin-chii-tani,
tenal lologwadgin tani,
urwedgin chul.”
Zac.
9:9
6 Tegin Jesús-e-chapingan-walbogid Jesús-chogzhad-yopí imasmalzhun.
7 Tegin Jesús-e-chapingan-walbogid Jesúsga moli-burro-nan tegin moli-chapini-cheinonimal.
Tegin Jesús-e-chapingan moli-burro-chapini-yankalgin aga e-molmal okismal.
Tegin Jesús kep moli-chapinigin nakwiszhun.
Tegin Jesús aga e-chapinganbak ukin nadmalzhun.
8 Tenal tulemal-íchejul errey-tummadyob Jesús-takedbal Jesús-iktual igalgin okin-okin aga e-molmal imasmal.
Tegin tule-kwénna-kwénna uga-ka kwachamalgu,
igalgin uga-ka okismalmo.
9 Tegin tulemal-Jesús-iktual-irmamamimalad tegin tulemal-Jesús-cholbal-tanimalad sapejul kolmanatapmal chogalmal:
—¡Imi we David-wagwa otummoledi-kuelen,
nabirinye!
¡Tenal we tule-Pab-nuggin-tanikidga ib-nued kuelen,
nabirbalinye!
¡Tenal we tule nikpa-neggin nug okannoledi-kuelen,
nabirbalinye!
Sal.
118:26
10 Tenal Jesús Jerusalénzhe tognonigu,
Jerusaléngin-pukmalad-pel-kwapa chogalmal:
—¿Ibi chogle-wede weob tanikidde?
¿E-iktueddé,
toa-tule-ade?
11 Tenal tulemal-irmadanimalad tule-Jerusaléngin-pukmaladga chogalmal:
—Imi we tule,
Jesúsde.
Tenal we tule Pab-kaka-palchoged-Nazaret-Galileagined.
Jesús Pabzhe-koled-neg-akar tule-immalmal-ukpukmalad-onijad
12 Tegin Jesús Pabzhe-koled-neg-impabal togzhagu,
pel-kwapa tule-immalmal-ukpukmalad tegin tule-immalmal-pakpukmalad-onis.
Tegin Jesús tule-mani-ogwabukmalad-e-mesamal okpis,
tegin tule-nu-ukpukmalad-e-kanmal okpisbal.
13 Tegin Jesús tule-immal-ukpukmaladga chogal:
—Imi Pab Tummad e-kartagin chogdo:
An-negdin unnila anche-kolgalbi.
Tenal pemaldin immalmal-aturzheed-negga anche-koled-neg imananimal.
Is.
56:7;
Jr.
7:11
14 Tegin tule-aku-atamalad tegin tule-mego-mego-nanemalad Pabzhe-koled-negzhe Jesús-chiidzhe nonimal.
Tenal Jesús pel-kwapa we tulemal-nudasmal.
15 Tenal tule-irwal-Pabzhe-kolmalad-e-tummagan tegin Moisés-igalgin-tulemal-oturdamalad Jesús-immal-taktijulmalad takchamal.
Tegin Judio-tummagan itosmalbal purwigana Pabzhe-koled-neg-impabal Jesúsga kolmakalmal chogalmal:
“Imi pedin-David-e-wagwa otummoledi-kuelen,
nabirinye.”
Tenal Judio-tummagandin purwigana-chogzhad istar itononimal.
16 Tegin Judio-tummagan Jesúsga chogalmal:
—¿Imi pe-itos purwigana pegin igi chog?
Tegin Jesús tummaganga chogal:
—An itosdo,
purwigana igi chogmal.
Tenal anka wedin iwen-akalzhul.
¿Imi pe Pab-kartagin apchodijulzhí we immal kunaid?
Tenal Pab kartagin chogdo:
Imi pedin pato kuakwa
purwigana-tegin-mimmigan-nu-nunanimalad-urpis
pe-nug otummogal.
Sal.
8:2
17 Tegidgin Jesús aka-pukwa Judio-tummagan-ebes.
Tenal Jesús kannan Betania-neg-kweburzhe nadbal,
Betaniagin kabgal.
Jesús wag-islub-chapi ukapchajad
18 Tegin te pangin wakur,
Jesús kannan Jerusalénzhe albalgu,
igalbal ukulzhaal.
19 Tegin Jesús takal,
igal-pial wag-islub-chapi kwichi.
Tegin Jesús we chapi-chalzhe nad e-chan kwangal.
Tenal Jesús wag-islub-chalzhe nonigu,
takal chan kwen nikchul,
e-kabi unnila nika.
Tegin Jesús we chapiga choktejun:
—Imi pedin wegii pe pesgu-peine,
keg pal chanma.
Tenal wag-islub-chapidin ilgwen tinkuszhun.
20 Tenal Jesús-e-chapingan takchamalgu wag-islub-chapi tinkus,
weob pakal pesmal.
Tegin e-chapingan Jesúszhe ekichialmal:
—¿Wag-islub pulejul tinkujaddé,
igi kus-wede?
21 Tegin Jesús aga e-chapinganga chogal:
—Imi an chunchunnad pemalga chogdo:
imi pe immal imanail,
pe aga ulubgin pela-pela penzhulil,
pe we chapigabi pe chogojul:
‘Pedin tinkuo.’
Tenal pe nabir ampa we yal-kwichidga pe chogmogo:
‘Pe we-akar akniro,
termalzhe arkwano.’
Tegin pe yalga kaka-kochadbal,
pega kunonikodo.
22 Imi pe Pabgin penzhulil,
meke-ibi pe Pab Tummadzhe ekichial,
Pab Tummad pega imanoniko.
Judio-tummagan Jesúszhe ekichijad: “¿Pe toa-nuggin pe immal ima?”
23 Tegin Jesús Pabzhe-koled-neg-impabal togzhagu,
Pab-igalgin tulemal-oturdakalzhun.
Tenal Jesús tulemal-oturdanaidgin tule-irwal-Pabzhe-kolmalad-e-tummagan tegin tule-chelegan-tummagan Jesúszhe ekisnonimal:
—¿Imi pe toa-nuggin pe weob immal ima-wede?
¿Tegin toa pega igal-ukchabal-wede,
weob immal imagal?
Imi an peido,
pe anka chog.
24 Tegin Jesús Judio-tummaganga chogal:
—Tegil an pemalzhe inzhel immal ekisnegwel.
Imi pe anka chogzhal,
kep an pemalga chogmogo toa anka igal-ukcha weob immal imagal.
25 ¿Imi Juan-Bautista-tigin-tulemal-ogdi-kujad pia-akar tani-jogna?
¿Pab-akar o tule-akar?
Anka chogdo.
Tegin Judio-tummagan aga emal-emal chunmakalmal:
—Imi anmal chogzhal:
‘Juan-Bautista-tigin-tulemal-oged Pab-akar tani,’
we Jesús anmalga chogdago:
‘¿Tede ibiga pemalde Juangin keg ibzhemalzhun?’
26 Tenal anmal chogzhabalil:
‘Juan-Bautista-tigin-tulemal-oged tule-akar tani,’
tulemal-anmalzhe-uludagoedbal anmal kwakidamalo.
Imi tulemal-pel-kwapa chogmal:
‘Juan-Bautistadega Pab-kaka-palchoged.’
27 Al Judio-tummagan Jesúsga chogalmalzhun:
—Anmal kwen wichulmal Juan-Bautista-tigin-tule-oged,
pia-tani.
Tegin Jesús Judio-tummaganga chogal:
—Tegil an pemalga kwen chogojulmodo,
toa anka igal-ukcha weob immal imagal.
Jesús purpal machi-walbogidgin chunmajad
28 Tegin Jesús Judio-tummaganga chogalbal:
“¿Imi an-chogoed,
igi pe itomalmogo-dewa?
Imi tule-walgwen machi-walbo nika.
Tegin e-pab machi-walgwenga chogal:
‘Machi,
imis pe nagnuje uva eminao.’
29 Tenal we machi e-pabga chogal:
‘An kwen nejul.’
Tenal we machi te-cholbal pinzheal ede pul nao.
Tenal machi yabli nadzhun nagnuje uva emigal.
30 Tegin e-pab machi-pidga chogalmo:
‘Machi,
imis pe nagnuje uva eminemogo.’
Tenal we machi e-pabga chogal:
‘Tegil nabirde.’
Tenal we machi yabli kwen nadzhul-kus nagnuje uva emigal.”
31 Tegin Jesús chogalbal:
—¿Imi piti machi-walbogid pul e-pab-chogzhad-pallí immal imas?
¿Kepegined o chol-napi-ka-chogzhad?
Tegin Judio-tummagan Jesúsga chogalmal:
—Kepegin-e-pab-ka-chogzhad.
Tegin Jesús Judio-tummaganga chogalbal:
“Teobdo.
Imi an chunchunnad pemalga chogdo:
imi tule-Romano-tummadga-mani-egwanmalad tegin ome-macherganbi-wismalad pemalga pul-pulejul Pab-neg-takmaidgin togmamimal.
Imi we tule-iskana akpene-Pab-itojulidgin aga ulubgin pukib itononimal,
we machi-kepeginedyob.
32 ¿Ibiga an teob chog?
Imi Juan Bautista pemalzhe noni pemalga igal-napírragwad oyogal.
Tenal pemal Juan-chogzhadgin kwen ibzhaszhulmal.
Tenal tule-Romano-tummadga-mani-egwanmalad tegin ome-macherganbi-wismalad Juan-chognonikidgin ibzhenonimal.
“Tenal pemal takchamal tule-Romano-tummadga-mani-egwanmalad tegin ome-macherganbi-wismalad Juan-ega-chogzhad abingasmal.
Tenal pemal aga ulubgin iskuedbal kwen pukib-itononijulmal.
Tegin pemal Juangin ampa kwen ibzhaszhulmalbal.”
Jesús purpal uva-nagnu-ololchajadgin chunmajad
33 Tegin Jesús Judio-tummaganga chogalbal:
“Imi antin pemalga purpal immal chognebal:
imi tule-nagnu-ibed-walgwen nagnugin uva tigzha.
Tegin tule-nagnu-ibed pel-kwapa ebiris aga nagnu chaktis.
Tegin tule-nagnu-ibed kuakwa uva-nis-abingeed chobzhabal.
Tegin tule-nagnu-ibed nikpa kalu chobzhabal pel-kwapa nagnu algegal.
Tegin tule-nagnu-ibed nejogalgu tulemalga uva-naid ololchas kujal uva-weied-omojal aga abal kamalgal.
Tegin tule-nagnu-ibed napa-pidzhe nadzhun.
34 “Tenal uva-nabgued-ibe omosgu,
tule-nagnu-ibed tule-nagnu-takchimaladzhe aga e-mosmal-palmis uva-chan-abal-ega-uklegoed amigal.
35 “Tenal mosmal tule-nagnu-takchimaladzhe nonimalgu,
tule-nagnu-takchimalad we mosmal-kasmal.
Tegin tule-nagnu-takchimalad mos-ebiosmal,
kwen mos-mechamal,
kwen akwagin sagyeal mos-mechamalbal.
36 Tegin tule-nagnu-ibed pul-melu e-mosmal-pimalad-palmialbal.
Tenal mosmal nonimalgu,
tule-nagnu-takchimalad ampa akpenegwadyob mosmal-pimalad-imasmalbal.
37 Tegin tule-nagnu-ibed napigin aga e-machi-chunnad-palmialzhun.
Tenal tule-nagnu-ibed pinzhasdo:
‘We tulemal an-machi-ulgin,
an-machigin atagenabmal.’
38 “Tenal tule-nagnu-takchimalad takchamalgu nagnu-ibed-e-machi tani,
aga emal-emal chunmakalmal chogalmal:
‘We machi-tanikid,
e-pab purkwijal,
we nagnu e-machigadga kunoniko.
Al anmal we machi-mejenabmal,
nagnu pél anmalgadga kunonigal.’
39 Tegin tulemal-nagnu-takchimalad machi-kasmalgu,
nagnu-tikalzhe machi-chesmal.
Tegin tule-nagnu-takchimalad nagnu-tikalbal kep machi-mechamalzhun.”
40 Tegin Jesús Judio-tummaganga chogalbal:
—Imi tule-nagnu-ibed nagnuje nonikil,
tule-ebi-machi-mechadbal ¿igi tule-nagnu-takchimalad-imako pe ebinzhe?
41 Tegin Judio-tummagan Jesúsga chogalmal:
—Imi tule-nagnu-ibed ilgwen we tule-iskana-opelononiko.
Tegin tule-nagnu-ibed tule-pimaladga nagnu uko ega takegal.
Tenal tule-pimalad uva-nabgued-ibegin keg-chulgu nagnu-ibedga uva-chan-ega-uklegoed ukmalo.
42 Tegin Jesús Judio-tummaganga chogalzhun:
—Teobdo.
¿Tenal pemal Pab-kartagin apchodimalzhulzhí,
Pabdin igi chog?
Tenal Pab-kartagin chogdo:
Imi tule-neg-chobmalad akwa-mete,
Tenal akwa-meted
akwa-pul-chunchogedga kunoni.
Imi Pab Tummad weob akwa-imas,
al Pab-weob-immal-imajadbal anmal weob pakal pesmal.
Sal.
118:22-23
43 Tegin Jesús Judio-tummaganga chogalbal:
—Al an pemalga chogdo:
imi Pab-neg-takmaid pemalgin idirilenoniko,
tegin tule-pimaladga uklenoniko.
Tenal we tulemal Pab-neg-takmaid-igalgin kep nuekwa nanedamalo.
44 Imi antin we akwa-metedyob.
(Tenal meke-ibi-tule we akwa-askin arkwajal,
ilgwen e-kalmal pisli-pisli peio.
Tenal we akwa tule-askin arkwannonikil,
we tule ilgwen akpudo.)
45 Tenal tule-irwal-Pabzhe-kolmalad-e-tummagan tegin Pariseomal,
Jesús-purpal-ega-chogzhad itosmalgu,
mag itosmal Jesús emalgin chunmas.
46 Al we Judio-tummagan igal-amialmal Jesús-kagal.
Tenal tulemal Pab-kaka-palchogedyob Jesús-takedbal,
Judio-tummagan tulemalgin kwakialmalbal.
Al Judio-tummagan Jesús-kwen-kaszhul-kusmal.