Ebꞌ Yet Xa Dios Yetoj Ebꞌ Yet To Yul Yibꞌankꞌinal Tiꞌ
4
Jex jin camcꞌulnebꞌil,
ta ey ebꞌ chi aloni,
tol yet Dios tzettaj yetal chi ecꞌ yalaꞌ,
man comonoj che chaꞌ je yabꞌ tet ebꞌ yin eymanil.
Sowalil che yakꞌ porobꞌal ebꞌ sbꞌabꞌelal,
ta yel jaꞌ Dios eyoc yetoj ebꞌ.
Yutol caw ey ebꞌ lekꞌtiꞌ yul yibꞌankꞌinal tiꞌ,
chi tzꞌaj yaloc sbꞌa ebꞌ ẍejabꞌoj Dios.
2 Tol chi waltoj je yabꞌe,
tzet utbꞌil chi yun kotajnen eloj,
mactxequel ebꞌ eyoc Naj Yespíritu Dios yin.
Ta chi yal ebꞌ jaxca tiꞌ:
“Jaꞌ Jesús,
jaꞌton Naj Cristo,
yel toni jix oc smimanil Naj yet jix julecꞌ yul yibꞌankꞌinal tiꞌ,”
ta chi yal ebꞌ jaxca tuꞌ,
je yotaj,
tol eyoc Yespíritu Dios yin ebꞌ xin.
3 Ta ey mac man jaxca oj tuꞌ yalon yin Jesús xin,
man eyoj oc Naj Yespíritu Dios yin ebꞌ,
chi yal tuꞌ.
Laan snaꞌbꞌal ebꞌ yetoj naj acꞌul oc yin Cristo,
chi yal tuꞌ.
Je yabꞌnaj xa,
tol jaꞌ naj oj oc acꞌulal yin Cristo sowalil oj juloj.
Jaꞌ tinaniꞌ eyxa ebꞌ laan snaꞌbꞌal jaxca oj yute sbꞌa naj chi wal tiꞌ.
4 Jex camcꞌulnebꞌil wu an,
yet jon xa Dios tinaniꞌ.
Cannajxa can ebꞌ lekꞌtiꞌ tuꞌ yalan ku.
Yutol jaꞌ Naj mac eyoc kin,
ecꞌbꞌan yipal yintaj jun eyoc yin ebꞌ yet yul yibꞌankꞌinal tiꞌ.
5 Jaꞌ ebꞌ tuꞌ,
yet cꞌal yul yibꞌankꞌinal tiꞌ yeoc ebꞌ.
Yuxan,
asan tzetyetal yet yul yibꞌankꞌinal tiꞌ chi yal ebꞌ.
Caw ey ebꞌ ánima chi yaoc xiquin yabꞌen tzet chi yal ebꞌ,
yutol yet tocꞌal yul yibꞌankꞌinal tiꞌ yeoc ebꞌ.
6 Jal jon jaon tiꞌ xin,
yet jon xa Dios.
Yuxan,
jaꞌ mac yet xa Dios ketoj,
chi yaoc xiquin ebꞌ yin tzet chi kalaꞌ.
Jal ebꞌ man yetoj Dios,
toj chi yaoc xiquin ebꞌ yin tzet chi kal tet.
Jaxca ton tuꞌ chi yun kotajnen eloj,
mactxequel ebꞌ eyoc Naj Espíritu yin,
jaꞌton Naj yel chi yalaꞌ,
cꞌal mactxequel ebꞌ jaꞌ lekꞌtiꞌ espíritu eyoc yin.
Jaꞌ Dios Camcꞌulal Toni
7 Jex wuẍtaj,
jex wanabꞌ camcꞌulnebꞌil wu an,
cu camcꞌulnelewej cu bꞌa,
yutol jaꞌ camcꞌulal tuꞌ,
jaꞌ bꞌey Dios chi tita.
Ta ey cu camcꞌulal,
yuninal jon xa Dios,
catuꞌ kotajxa Dios tuꞌ.
8 Ta cꞌam cu camcꞌulal,
man to kotajoj Dios,
chi yal tuꞌ,
yutol jaꞌ Dios chi camcꞌulnen ebꞌ ánima.
9 Caw jix xꞌox scamcꞌulal Dios ey jon.
Ilaꞌ,
tol jix ẍejtej jun qꞌuetxan Scꞌaal cam yul yibꞌankꞌinal tiꞌ,
yu jul yakꞌon can cu kꞌinal tol ey cꞌal yin tobꞌalkꞌinal.
10 Jaꞌ scamcꞌulal tuꞌ,
jaꞌcaw camcꞌulal toni,
yutol manaj jon jaon tiꞌ jix bꞌabꞌi cu txꞌox cu camcꞌulal tet Dios.
Tol jaꞌ Dios bꞌabꞌel jix xꞌox scamcꞌulal ey jon.
Jix ẍejtej Scꞌaal,
jix jul yakꞌon cam sbꞌa stooloj cu penail.
11 Jex wuẍtaj,
jex wanabꞌ camcꞌulnebꞌil wu an,
jaxca ton tuꞌ jix cu yute scamcꞌulnen Dios tiꞌ.
Yuxan,
sowalil chi cu camcꞌulnele cu bꞌa pax oj.
12 Caxcꞌal mi cꞌamto junoj chi ilon yin Dios juneloj,
ta chi cu camcꞌulnewej cu bꞌa,
caw caan oc kin,
chi yal tuꞌ.
Catuꞌ chi tzꞌajna oc scamcꞌulal tuꞌ kin.
13 Yu Naj Yespíritu jix scabꞌa oc kin,
yuxan kotaj,
tol ey jon ton oc yin Dios,
catuꞌ ey pax oc Dios kin junjun jon.
14 Kilnaj Naj Scꞌaal Dios tuꞌ jaon tiꞌ.
Yuxan chi kakꞌ cu bꞌa testigoal yin,
tol jaꞌ cu Mam Dios chejnentej Scꞌaal tuꞌ yu jul scolon can el ánima yul yibꞌankꞌinal tiꞌ.
15 Jaꞌ mac chi alon jaxca tiꞌ:
“Jaꞌ Naj Jesucristo,
Scꞌaal ton Dios,”
ta ẍi,
tol eyoc yin Dios,
chi yal tuꞌ,
catuꞌ ey pax oc Dios yin.
16 Chi kaoc yin cu cꞌul,
tol jaꞌ Dios chi cu camcꞌulneni.
Caw kotaj jun tiꞌ sicꞌlebꞌil.
Chi camcꞌulnele ebꞌ ánima yu Dios,
yuxan,
ta ey cu camcꞌulal jaon tiꞌ,
tol ey jon oc yin Naj,
chi yal tuꞌ,
catuꞌ ey pax oc Naj kin.
17 Queyton tiꞌ chi yun stzꞌajna el cu camcꞌulal,
yet watxꞌ jaꞌ yet oj jul jun cꞌual yet chi naꞌle oc kin,
cꞌam chi cu xiwa sattaj Dios.
Yutol jaxca sbꞌeybꞌal Cristo,
queytuꞌ jix kute cu bꞌeybꞌal yul yibꞌankꞌinal tiꞌ.
18 Ta yel ey cu camcꞌulal,
cꞌamxa chi cu xiwi.
Jaꞌ mac tzꞌajan xa scamcꞌulal,
cꞌamxa chi xiwi.
Yutol jaꞌ yet chi cu xiw tuꞌ,
chi yal yeloc apnoj tol man to kotajoj camcꞌulal.
Yuxan,
jaꞌ ebꞌ chi to xiwi,
cꞌamto chi tzꞌajna el scamcꞌulal ebꞌ,
chi yal tuꞌ.
19 Ey cu camcꞌulal yin Dios tinaniꞌ,
yutol jaꞌ jix bꞌabꞌi cu scamcꞌulneni.
20 Kꞌinaloj ta chi kalaꞌ,
tol lalan cu camcꞌulnen Dios,
ta chi chichon pax oc cu cꞌul yin junoj kuẍtaj,
ma yin junoj kanabꞌ,
lekꞌtiꞌ jon,
chi yal tuꞌ.
Ta cꞌam chi cu camcꞌulne ebꞌ kuẍtaj,
ma ebꞌ kanabꞌ tol chi kiloc yin yetoj cu sat,
¿tzet wal oj kute cu camcꞌulnen Dios tol cꞌam chi kiloc yin?
21 Jaꞌ Cristo jix akꞌon can jun chejbꞌanile tiꞌ ey jon.
Ẍi jun chejbꞌanile jaxca tiꞌ:
“Jaꞌ ebꞌ chi camcꞌulnen Dios,
sowalil chi scamcꞌulnele pax sbꞌa ebꞌ yetoj yuẍtaj cꞌal yetoj yanabꞌ,”
ẍi.